Выбрать язык
Книги Ветхого Завета
Книги Нового Завета
с русским текстом1 Ефрем курыкысо Рамафаим-Цофим олаште ик еҥ илен. Тудо Ефрем тукым гыч улмаш, лӱмжӧ Елкана лийын. Елкана Иерохамын эргыже, тудыжо Илийын эргыже, Илийже Тохун эргыже, тудыжо Цуфын эргыже улмаш.2 Елканан кок ватыже лийын: иктыжын лӱмжӧ Анна, весыжын – Феннана. Феннанан йочаже-влак лийыныт, а Аннан лийын огытыл.
3 Кажне ийын палемдыме жапыште Елкана шке олаж гыч Господь Саваофлан кумалаш да надырым пуаш Силомыш коштын. Тушто [Илий да] тудын кок эргыже, Офни ден Финеес, Господьын иерейже-влак лийыныт.4 Надырым кондымо кечын Елкана шке Феннана ватыжлан да тудын чыла эргыж ден ӱдыржылан нунын шыл ужашыштым пуэден.5 [Аннан йочаже лийын огылат,] Елкана тудлан эн сай ужашым пуэн. Господь Анналан шочшым пуэн огыл гынат, Елкана тудым [Феннана деч чотрак] йӧратен.6 Господь Аннам шочшым ыштен кертдымым ыштен, сандене марийжын вес ватыже тудым эре ойгандарен, игылт воштылын.7 Кажне ийын Аннан Господьын пӧртышкыжӧ коштмыж годым тыге лийын: Феннана тудым ойгандарен, Аннаже [ойгырен] шортын да кочкын огыл.8 Елкана марийже тудлан каласен: «Анна!» [Тудыжо вашештен: «Мый тыште улам». Елкана манын:] «Мом тый шортат да молан от коч? Молан тыйын шӱм-чонет ойганыше? Мый тыланет лу эрге деч сайрак омыл мо?»
9 Икана, Силомышто кочкын-йӱмеке, Анна кынелын [да Господь ончыко шогалын]. Иерей Илий тунам Господьын пӧртышкыжӧ пурымо вер воктене шинчен.10 Чонжо дене ойгырен, Анна кочын шортын да Господьлан кумалын.11 Тудо сӧрен каласен: «Господь Саваоф, [Чылакертше Юмем]! Тый тарзетын ойгыжым ужат да мыйым шарналтет гын, шке тарзетым от мондо да тудлан эрге азам пуэт гын, мый тудым ӱмыржӧ мучкылан Господьлан [пӧлек шотеш] пуэм. [Тудо йошкар аракамат, моло руштыктарышымат йӱаш ок тӱҥал,] да тудын ӱпшӧ нигунам тӱредме ок лий».
12 Аннан Господьлан кужу жап кумалмыж годым Илий тудын умшажым эскерен.13 Анна шке семынже шып ойлен, тудын умшаже веле тарванылын, а йӱкшӧ шоктен огыл, садлан Илий тудым йӱшылан шотлен.14 Илий тудлан каласен: «Мыняр жап тый тыште йӱшӧ шогаш тӱҥалат? Шӧрлӧ аракат деч [да кай Господьын чурийже деч]».15 Анна вашештен: «Уке, озам. Мый ойгырышо чонан ӱдырамаш улам, нимогай аракам йӱын омыл. Мый Господь ончылно чонем почын кутырем.16 Мыйым, шке тарзетым, шотдымо ӱдырамашлан ит шотло: кугу шӱлыкем да ойгем дене мый тыге кужун кутыренам».17 Илий тудлан вашештен: «Тыныс дене кай. Израильын Юмыжо мом йодметым шукта».18 Анна каласен: «Тек тыйын тарзет шинча ончылнет поро кумылым сула!» Вара тудо шке корныж дене каен, кочкын, да тетла чурийже ончычсо семын ойган лийын огыл.
19 Эрдене нуно кынелыныт, Господьлан вуйыштым савеныт да Рама олашке, шке мӧҥгышкышт, пӧртылыныт. Елкана Анна ватыж дене мален, да Господь Анна нерген шарналтен.20 Тудо мӱшкыран лийын да эрге азам ыштен. Йочалан Самуил*а лӱмым пуэн, вет тудо ойлен: «Господь [Юмо Саваоф] деч йодын налынам».
21 Вес гана, кунам Елкана марийже [Силомыш] уло ешыж дене Господьлан ий еда кондымо надырым, сӧрымӧ пӧлекым [да мланде лектыш деч луымшо ужашым] пуаш каен,22 Анна [тудын дене] каен огыл. Тудо марийжылан каласен: «Кунам азалан чызым пукшымым чарнем да тудо изишак кушкеш, тунам мый йочам шке намиен кодем. Тудо Господь ончыко шогалеш да тушан йӧршешлан кодеш».23 Елкана марийже тудлан вашештен: «Мом сайлан шотлет, тудым ыште. Чызым пукшен чарнымешкет мӧҥгыштак лий. Тек Господь [умшат гыч лекше] мутетым пеҥгыдемда». Ватыже мӧҥгыштӧ кодын да чызе деч кораҥдыме жап марте эргыжлан шке шӧржым пукшен.
24 Чызым пукшен чарнымеке, Анна эргыж дене Силомыш каен. Пеленже кум самырык ӱшкыжым, [киндым,] ик ефа ложашым да ик шувыш йошкар аракам налын. Тудо [йочаж дене] Силомыш Господьын пӧртышкыжӧ толын. Йоча эше изи лийын.25 [Тудым Господь ончыко шогалтеныт, а ачаже Господьлан кажне ийын пуышаш надырым конден.] Ӱшкыжым шӱшкылыныт. [Анна] йочажым Илий деке вӱден конден26 да каласен: «Тыйын илышет дене товатлем, мыйын озам: мый лач тудо ӱдырамаш улам, кӧ тыйын ончылнет шоген да Господьлан кумалын.27 Теве тиде эргым мый йодын кумалынам. Мом йодмем Господь шуктен.28 Мый тудым Господьлан пуэм, тек эргым ӱмыржӧ мучко Тудлан служитлаш тӱҥалеш». Анна Господьлан вуйжым савен.
*а 1:20 Еврей йылмыште Самуил лӱм «Господь деч йодын налме» манме дене ик семынрак шокта.
Глава 1