Выбрать язык
Книги Ветхого Завета
Книги Нового Завета
с русским текстом1 Ефрем эрге-влак Гедеон деч йодыныт: «Молан тый тыге ыштенат? Молан мадиан-влак дене кредалаш кайымет годым мемнам ӱжын отыл?» Нуно тудлан чот сырыше лийыныт.2 Гедеон нунылан вашештен: «Тендан дене таҥастарымаште мый мом тыгайым ыштенам? Ефремын пытартышлан погымо виноградше Авиезер урлыкын погымо чыла виноградше деч сайрак огыл мо?3 Юмо тендан кидыш Орив ден Зив мадиан он-влакым пуэн. Мыйын мом ыштымем тендан ыштымыда дене таҥастараш лиеш мо?» Кунам Гедеон тиде мут-влакым каласен, нунын сырымышт лушкен.
4 Гедеон ден тудын кумшӱдӧ сарзыже Иордан деке толыныт да эҥер гоч вонченыт. Нуно нойышо [да шужышо] лийыныт, но поктымыштым чарнен огытыл.5 Сокхофышто илыше-влаклан Гедеон каласен: «Мыйын почеш толшо калыклан киндым пуыза, нуно нойышо улыт. Мый Зевей ден Салманым, мадиан кугыжа-влакым, поктен каем».6 Сокхоф он-влак вашештеныт: «Мемнам сарзет-влакым пукшаш йодат? А тый Зевей ден Салманым кученатат мо?»7 Гедеон каласен: «Кунам Господь Зевей ден Салманым мыйын кидышкем пуа, тыге ойлымыланда тендам ир мландысе иман вондо да коршаҥге дене чуриктарем».8 Тушеч тудо Пенуэлыш каен да тушто илыше-влак деч тидымак йодын. Нунышт тудлан Сокхофышто илыше-влак семынак вашештеныт.9 Гедеон нунылан каласен: «Кунам мый сеҥен пӧртылам, тиде башньым сӱмырем».
10 Зевей ден Салман тунам латвич тӱжем наре сарзышт дене – эрвел калыкын сарзывийже деч тынар еҥ кодын улмаш – Каркорышто шогеныт. А чылаже нунын саргуралым нумалше шӱдӧ коло тӱжем еҥышт колен улмаш.11 Гедеон Новах ден Иогбега деч эрвелкыла, омашлаште илыше-влак деке, каен да азапым вучыде шинчыше тушман сарзывий ӱмбаке керылтын.12 Зевей ден Салман куржыныт. Гедеон нуным поктен каен да мадиан кугыжа-влакым когыньыштымат кучен, уло станым ӧрткымашыш пуртен.
13 Кунам Гедеон, Иоас эрге, кредалме деч вара Херес кӱкшака гыч пӧртылын,14 тудо Сокхофышто илыше ик рвезым руалтен кучен да тудын деч йодыштын. Тудыжо Гедеонлан Сокхофысо шымле шым он ден кугурак-влакын лӱмыштым возен пуэн.15 Гедеон Сокхофышто илыше-влак деке толын да каласен: «Теве Зевей ден Салман. Нунын верч те мыйым мыскылен ойлышда: ”Мемнам нойышо сарзет-влакым пукшаш йодат? А тый Зевей ден Салманым кученатат мо?”»16 Тудо олан кугуракше-влакым руалтен кучен, Сокхофышто илыше-шамычым иман вондо да коршаҥге дене лупшен.17 Гедеон тыгак Пенуэлысе башньым сӱмырен да олаште илыше-влакым кырен шалатен.18 Зевей ден Салманлан тудо каласен: «Фаворышто пуштмо еҥда-влак могайрак лийыныт?» Нунышт вашештеныт: «Нуно тый гает лийыныт. Кажныже кугыжа эргыла койын».19 Гедеон каласен: «Тиде мыйын иза-шольым-влак, авамын эргыже-шамыч, лийыныт. Господь дене товатлем: те нуным илышым кодеда ыле гын, мый тендам ом пушт ыле».20 Тудо шке Иефер кугэргыжлан каласен: «Пушт нуным». Но рвезе самырык лийын да лӱдын, сандене кердыжым луктын огыл.21 Зевей ден Салман каласеныт: «Тый шке мемнам пушт, вет пӧръеҥын вийже пӧръеҥынак». Тунам Гедеон Зевей ден Салманым пуштын, верблюдыштын шӱйыштым сӧрастарыше прежа-влакым поген налын.
22 Израильтян-влак Гедеонлан каласеныт: «Лий мемнан вуйлатышына, тый дечет вара – эргыч, вара – эргычын эргыже. Вет тый мемнам мадиан-влакын кидышт деч утаренат».23 Гедеон нунылан вашештен: «Мыят, мыйын эргымат тендан вуйлатышыда огына лий. Тек тендан вуйлатышыда Господь лиеш».24 Вара Гедеон каласен: «Тендан деч иктым йодам: кажныже мыланем руалтен налме погыда гыч ик кӧрж дене пуыза». Вет тушман-влак Измаил тукым гыч лийыныт, нуно шӧртньӧ кӧржым чиен коштыныт.25 Израильтян-влак вашештеныт: «Пуэна». Нуно вургемым шареныт да тушко руалтен налме погышт гыч ик кӧрж дене пыштеныт.26 Гедеонын погымо шӧртньӧ кӧрж-влакын чумыр нелытше тӱжем шымшӱдӧ сикль лийын. Тидын деч посна эше тӱрлӧ сӧрастарыш, алга, мадиан кугыжа-влакын шемалге-йошкар вургемышт да нунын верблюдыштын шӱйыштышт лийше [шӧртньӧ] шинчыр-влак лийыныт.27 Тиде шӧртньӧ гыч Гедеон ефодым ыштен да тудым шке олаштыже, Офраште, вераҥден. Тиде ефодлан кумалын, израильтян-влак Господь деке тупынь савырненыт. Гедеон ден ешыжланат тудо оптыш лийын.
28 Тыге мадиан-влак израиль эрге-шамыч ончылно ӱҥышемыныт да тетла вуйыштым нӧлталаш тоштын огытыл. Гедеон илыме годым мландыште нылле ий тыныс лийын.
29 Иоас эрге Иероваал, тудак Гедеон, мӧҥгыжӧ пӧртылын да туштак илен.30 Гедеонын шымле эргыже шочын, вет тудын шуко ватыже лийын.31 Сихемыште илыше кулватыжат эргым ыштен, Гедеон тудлан Авимелех лӱмым пуэн.32 Гедеон, Иоас эрге, пеш кугу ийготан колен. Тудым ачажын шӱгарыштыже, Авиезер тукым мландысе Офраште, тоеныт.33 Гедеон колымеке, израиль эрге-шамыч адакат ваал-влаклан кумалаш тӱҥалыныт да шке юмыштлан Ваалверифым шогалтеныт.34 Йыр улшо чыла тушман деч утарыше Господь Юмыштым нуно шарналтенат огытыл.35 Нуно Иероваалын, вес семынже Гедеонын, тукымжыланат тудын Израильлан мом ыштымыжлан порылык дене тӱлен огытыл.
Глава 8