Выбрать язык
Книги Ветхого Завета
Книги Нового Завета
с русским текстом1 Иероваал, тудак Гедеон, да тудын чыла еҥже эр эрдене кынелыныт да стан дене Харод памаш воктеке толын шогалыныт. Мадиам стан нунын деч йӱдвелныла лапверыште, Морэ кӱкшака воктене, лийын.
2 Господь Гедеонлан каласен: «Тый денет калык утыждене шуко. Мый мадиан-влакым нунын кидыш ом пу, уке гын Израиль Мыйын ончылнем кугешна да ”мыйым шке кидем утарен” манын каласа.3 Калыклан увертаре: ”Кӧ лӱдын чытыра, тек Галаад курык гыч мӧҥгеш кая”». Тыге коло кок тӱжем еҥ мӧҥгеш каен, а лу тӱжемже кодын.4 Господь Гедеонлан каласен: «Калык садак эше шуко. Нуным вӱд деке наҥгай, тушто мый тыланет еҥ-влакым ойырем. Кӧн нерген Мый ”тиде тый денет кая” манын ойлем, тек тудо тый денет кая, а кӧ нерген ”тиде тый денет ок кай” манын каласем, тек тудо огеш кай».
5 Гедеон калыкым вӱд деке наҥгаен. Господь тудлан каласен: «Кӧ вӱдым пий семын йылмыж дене йӱэш, нуным пулвуйыш сукен шинчын йӱшӧ-влак деч ойыро».6 Кидкопа гыч йылме дене йӱшӧ-влак кумшӱдӧ еҥ лийыныт, а молышт чыланат пулвуйыш сукен шинчын йӱыныт.7 Господь Гедеонлан каласен: «Кидкопа гыч йылме дене йӱшӧ кумшӱдӧ еҥ дене Мый тендам утарем да кидышкыда мадиан-влакым пуэм. А молышт тек мӧҥгышкышт каят».8 Кумшӱдӧ еҥым коден, Гедеон моло калыкым мӧҥгышкыжӧ колтен. Нуно кайыше-влак деч кочкыш шапаш ден пучыштым налын коденыт. Мадиан-влакын станышт ӱлнӧ, лапверыште, лийын.
9 Тиде йӱдым Господь Гедеонлан каласен: «Кынел, станыш воло. Тудым Мый тыйын кидышкет пуэм.10 А каяш лӱдат гын, тушко Фура тарзет дене пырля миен тол11 да мом кутырымыштым колышт. Тиде тылат нунын станышт ӱмбак керылташ чолгалыкым пуа». Тунам Гедеон ден Фура тарзыже станыште улшо сарзывий деке воленыт.12 Мадиан ден амалик-влак да эрвелне илыше-шамыч лапвереш шурнышырчык наре верланеныт улмаш. Верблюдыштым шотлен пытараш лийын огыл, нуно теҥыз серысе ошма пырче наре лийыныт.13 Гедеон тушко толын. Тудо ик еҥын весылан шке омыжым каласкалымыжым колын: «Мый омым ужынам. Мадиан станыш пуйто йыргешке шож кинде пӧрдын толеш. Омаш деке толын шумекше, тудым туге тӱкыш – омаш йӧралте да сӱмырлыш».14 Вес еҥже тудлан вашештен: «Тиде весе огыл, а израильтян Гедеонын, Иоас эргын, кердыже. Мадиан-влак ден уло станым Юмо тудын кидыш пуэн».
15 Омым да тудын мом ончыктымыжым колмеке, Гедеон Господьлан вуйжым савен. Вара тудо израиль станыш пӧртылын да каласен: «Кынелза! Мадиан станым Господь тендан кидыш пуэн!»16 Кумшӱдӧ еҥым тудо кум отрядлан шелын. Кажныжлан кидышкыже пучым, яра кувшиным кучыктен. Кувшин кӧргыштӧ факел лийын.17 Тудо нунылан каласен: «Мыйым ончыза да мыйын семын ыштыза. Стан дек миен шумекем, мом ышташ тӱҥалам – теат тидымак ыштыза.18 Кунам мый да пеленем улшо-влак пучым пуалтена, теат стан йыр шке пучда дене пуалтыза да кычкырыза: ”Господьын да Гедеонын [кердыже]!”»
19 Станыште йӱд орол черет вашталтмеке, тушко Гедеон да тудын пелен шӱдӧ еҥ толыныт. Орол-влакым кынелтен, нуно пучым пуалтеныт да кидыштышт улшо кувшиным шалатеныт.20 Тунам кум отрядге пучым пуалтеныт, кувшин-влакым шалатеныт. Шола кидыште факелым, а пурлаште пучым кучен, нуно чыланат пучым пуалтеныт да кычкыреныт: «Господьын да Гедеонын кердыже!»21 Кажныже стан йыр шке верыштыже шоген, а мадиан-влак ончыч стан мучко кычкырен куржталыныт, вара куржаш пижыныт.22 Кунам кумшӱдӧ еҥ пучым пуалтен, Господь станыште улшо-влакын кердыштым икте-весышт ӱмбак савырен. Нунын сарзывийышт Царера могырыш, Бефшитта марте, Табаф воктенысе Авел-Мехола чек марте куржын.
23 Тунам Неффалим, Асир да уло Манассий тукым гыч израильтян-влакым ӱжыныт, да нуно мадиан-влакым поктен куржыныт.24 Гедеон Ефрем курыклаш уверзе-влакым тыге каласаш колтен: «Мадиан-влак ваштареш лекса да нунын деч ончыч Бефвара марте вӱд улмо вер ден Иордан гоч вончымо верлам руалтен налза». Ефрем тукым еҥ-влак погыненыт да Бефвара марте вӱд улмо вер ден Иордан гоч вончымо верлам руалтен налыныт.25 Нуно кок мадиам оным – Орив ден Зивым – кученыт. Оривым Цур-Оривыште, а Зивым Иекев-Зивыште пуштыныт. Вара мадиан-влакым умбакыже поктен каеныт. Орив ден Зивын вуйыштым Гедеон деке Иордан вес велке намиеныт.
Глава 7