Выбрать язык
Книги Ветхого Завета
Книги Нового Завета
с русским текстом1 Иосифын Манассий кугэргыжын тукымжыланат шерева почеш мланде ужаш пуымо лийын. Манассийын Махир кугэргыжын тукымжылан Галаад ден Васаным пуэныт улмаш. Махир Галаадын ачаже лийын, тиде тукым тале сарзыже-влак дене ойыртемалтын.2 Манассийын моло эргыжын тукымыштланат урлык еда – Авиезер, Хелек, Асриил, Шехем, Хефер, Шемида урлык-влаклан – мланде ужаш пуымо лийын. Тиде – Манассийын, Иосиф эргын, эргыже-влак, тиде тукымын урлыкшо-влак.
3 Салпаадын, Хефер эргын – Хефер Галаадын, Галаад Махирын, Махир Манассийын эргыже лийын – ӱдыр йочаже-влак гына лийыныт, а эргыже-шамыч лийын огытыл. Ӱдыржӧ-влакын лӱмышт – Махла, Ноа, Хогла, Милка да Фирца.4 Нуно иерей Елеазар, Нав эрге Иисус да калык вуйлатыше-влак деке толыныт да каласеныт: «Господь Моисейлан мланде ужашым тукым иза-шольыланна пуымо семынак мыланнат пуаш кӱштен». Господьын кӱштымыж семынак, нунылан мланде ужаш ачаштын иза-шольыж-влак дене пырля пуымо лийын.5 Иордан вес велнысе Галаад ден Васан мландым пуымо деч посна Манассий тукымлан эше лу кундемым пуэныт.6 Вет Манассий тукым ӱдыр-влак мланде ужашым эрге-шамыч дене иктӧр налыныт. А Галаад мланде Манассийын моло эргыжын тукымыштлан логалын.
7 Манассий [эрге-влакын] мланде чекышт Асир кундем деч тӱҥалын да Сихем ваштареш улшо Михмефаф деке каен, тушечын – кечывалвелкыла, Ен-Таппуахыште илыше-шамыч деке.8 Таппуах йыр улшо мланде Манассийлан логалын, а Манассий чек дене улшо Таппуах ола шкеже – Ефрем эрге-влаклан.9 Тушечын чек кечывалвелкыла, Кана йогын деке, волен. Тушто улшо ола-влак Манассий тукымын олаже-влак коклаште верланеныт гынат, Ефремын лийыныт. Вара Манассийын чекше эҥерын йӱдвел могыржо дене эртен да теҥыз дене мучашлалтын.10 Кечывалвелныла улшо мланде Ефремын лийын, йӱдвелныла – Манассийын. Теҥыз Манассий мландын чекше лийын. Асирын мландыже тудын деч йӱдвелныла, а Иссахарын мландыже эрвелныла лийыныт.
11 Иссахар ден Асирын мландыштышт Беф-Сан ден Ивлеам ола-влак, нунын йыр улшо илем-влак, тыгак Дорышто, Ен-Дорышто, Фаанахыште, Мегиддошто илыше-шамыч, нине ола йыр улшо илем-влак да Нафефын ик кумшо ужашыже [ялла дене пырля] Манассийын лийыныт.12 Манассий эрге-влак нине олаште илыше-шамычым поктен колтен кертын огытыл, да хананей-влак тиде мландыштак илаш кодыныт.13 Варарак, кунам израиль эрге-влак вийым погеныт, хананей-шамыч ӧкым пашам ыштен иленыт, но пӱтынек поктен колтымо лийын огытыл.
14 Иосиф эрге-влак Иисус деч йодыныт: «Молан тый мыланна ик мланде ужашым, ик кундемысе мландым гына пуэнат? Вет мемнам Господь суапландарен, да ме шукын улына».15 Иисус нунылан вашештен: «Те тынар шукын улыда да Ефрем курык тыланда шыгыр гын, чодырашке кайыза да тушто, ферезей ден рефаим мландылаште, шкаланда [верым] сеҥен налза».16 Иосиф эрге-влак каласеныт: «Мыланна курыклаште вер шагал. А лопышто илыше хананей-влакын – Беф-Сан да йыр улшо илемлаште илыше-шамычынат, Изреель лапверыште илыше-влакынат – сарлык кӱртньӧ орвашт уло!»17 Но Иисус Иосиф эрге-влаклан – Ефрем ден Манассий тукым-влаклан – тыге каласен: «Те шуко еҥан улыда, да вийда шуко. Тендан тиде ик мланде ужаш гына ок лий:18 курыкат, чодырат тендан лийыт. Чодырам те сеҥен налыда, да тудо пӱтынек тендан лиеш. Кеч хананей-влакын кӱртньӧ орвашт уло да нуно шкештат виян улыт, те нуным поктен колтеда, [те нуным сеҥеда]».
Глава 17