Выбрать язык
Книги Ветхого Завета
Книги Нового Завета
с русским текстом1 Иосиф тукым эрге-влаклан шерева почеш логалше мландын чекше Иерихон воктенысе Иордан деч, Иерихонысо вӱд дечын эрвелныла, тӱҥалын да ир мланде дене Вефиль кундемысе курык велке каен.2 Вефиль дечын – Луз деке, вара Архи кундемыш, Атароф марте,3 тушечын теҥыз деке, Иафлет кундемыш, ӱлыл Беф-Орон ден Газер деке, волен да теҥыз дене мучашлалтын.4 Теве тыгай мланде ужашым Иосифын Манассий ден Ефрем эргыж-влаклан пуэныт.
5 Теве Ефрем тукымын, тудын урлыкшо-влакын мланде чекышт. Эрвелне чек Атароф-Адар деч тӱҥалын да кӱшыл Беф-Орон [ден Газара] деке каен,6 вара теҥыз деке миен шуын. Йӱдвелне тудо Михмефаф деч эрвелкыла, Фаанаф-Силом деке, савырнен да эше умбакыла Ианох деке каен.7 Ианох дечын чек Атароф ден Наараф деке волен, Иерихон деке лишемын да Иордан марте миен шуын.8 Таппуах дечын теҥыз велке, Кана йогын деке, каен да теҥыз дене мучашлалтын. Теве Ефрем тукымын, тудын урлыкшо-влакын мланде чекышт.9 Тышке тыгак Манассий тукымын мландыште Ефрем эрге-влаклан пуымо ола-влак да нунын йыр улшо илем-шамыч пуреныт.
10 Но [Ефрем эрге-влак] Газерыште илыше хананей-влакым поктен колтен огытыл. Хананей-влак таче кечынат нунын коклаште ӧкым пашам*а ыштен илат. [Газерыш варажым фараон, египет кугыжа, толын. Тудо олам сеҥен налын да йӱлалтен, хананей ден ферезей-шамычым, Газерыште илыше-влакым кырен шалатен да олам шке ӱдыржылан олно семын пуэн.]
*а 16:10 Ӧкым паша – принудительный труд.
Глава 16