Выбрать язык
Книги Ветхого Завета
Книги Нового Завета
с русским текстом1 Уло израиль калык Силомыш погынен. Тушан нуно Юмо дене вашлийме омашым шогалтеныт. Пӱтынь мланде сеҥен налме лийын,2 но шым израиль тукым эше мландым налде кодын.3 Иисус израиль эрге-влаклан каласен: «Те эше мыняре юватылаш тӱҥалыда? Молан огыда кай да Господьын, ача-кочадан Юмыжын, пуымо мландыжым шкаланда огыда нал?4 Кажне тукым гыч кум еҥым ойырыза, мый нуным пӱтынь тиде мландым ончен лекташ колтем. Тек нуно мландым кузе пайлаш лийме нерген возат да мый декем пӧртылыт.5 Тек нуно мландым шым ужашлан пайлат. Иуда тек шке мландыштыже кечывалвелне кодеш, а Иосиф тукым – шке мландыштыже йӱдвелне.6 Мландым шым ужашлан пайлен возыза да мом возымыдам мылам кондыза: мый тыште, Господь Юмына ончылно, тендан шотышто шеревам кудалтем.7 Левит-влакын тендан коклаште мланде ужашышт ок лий, нунын пайышт – Господьлан иерей семын служитлымаш. А Гад ден Рувим тукым-влак да Манассийын пел тукымжо мландым Иордан деч эрвелныла налыныт. Тудым нунылан Моисей, Господьын тарзыже, пуэн».
8 Нине еҥ-влак корныш тарванен каеныт. Иисус нунылан тыге кӱштен каласен: «Кайыза, мландым шымлен лекса, тудым кагазыш пыштыза да мый декем пӧртылза. Мый тыште, Силомышто, Господь ончылно тендан шотышто шеревам кудалтем».9 Нуно каеныт, мланде мучко коштын савырненыт, [тудым ончен лектыныт]. Ола-влакым кагазыш возен, мландым шым ужашлан шелыныт. Вара Силомыш, Иисус деке станыш, толыныт.10 Иисус Силомышто Господь ончылно шеревам кудалтен да израиль эрге-влакын тукымышт коклаште мландым шеледен.
11 [Икымше] шерева Вениамин тукым ден тудын урлыкшо-влаклан лектын. Шерева почеш нунылан мланде Иуда ден Иосиф тукым-влакын мландышт коклаште логалын.12 Нунын йӱдвел чекышт Иордан дечын тӱҥалын да Иерихоным йӱдвел могыржо гыч эртен каен, вара касвелкыла курыкыш кӱзен да Беф-Авен ир мландыш миен шуын.13 Тушечын чек Луз – вес семынже Вефиль – велыш каен, тудын кечывалвел тайылже дене Атароф-Адар да ӱлыл Беф-Оронын кечывалвелныже улшо курык деке волен.14 Тушечын Беф-Оронын кечывалвел могырыштыжо улшо курык деч кечывалвелке, теҥыз могырыш, савырнен да Иуда тукымын Кириаф-Ваал олаж дене – вес семынже Кириаф-Иарим дене – мучашлалтын. Тиде – касвел чек.
15 Кечывалвел чек Кириаф-Иарим дечын теҥыз деке каен да Нефтоах вӱд деке миен шуын.16 Тушечын тудо курыкйол деке волен – тудыжо Енном эрге-влакын лапверже воктене, Рефаим лапвер деч йӱдвелныла, лийын. Вара Енном лапвер гоч иевусей-влакын олаштын кечывалвел тайылже дене Рогель памаш деке волен.17 Вара чек йӱдвелкыла, Ен-Шемеш деке, савырнен да Адуммим кӱкшака ваштареш улшо Гелилоф деке каен, тушечын Рувим эрге Боганын кӱжӧ деке волен.18 Умбакыже лапвер ваштареш улшо тайыл дене йӱдвелкыла каен, вара тӧрверышке волен.19 Тушечын тудо Беф-Хогла деч йӱдвелныла эртен да Шинчалан теҥызын йӱдвел иксаж деке, Иорданын кечывалвел аҥже деке, миен шуын. Тиде – кечывалвел чек. Эрвел чеклан гын Иордан шотлалтын.20 Теве Вениамин тукымлан, тудын урлыкшо-влаклан пуымо мланде чыла вел чекше-влак дене.
21 Вениамин тукымын, тудын урлыкшо-шамычын тыгай ола-влак лийыныт: Иерихон, Беф-Хогла, Емек-Кециц,22 Беф-Арава, Цемараим, Вефиль,23 Аввим, Фара, Офра,24 Кефар-Аммонай, Афни да Гева – чылаже латкок ола да нунын йыр улшо илем-влак.25 Гаваон, Рама, Бероф,26 Мицфэ, Кефира, Моца,27 Рекем, Ирфеил, Фарала,28 Цела, Елеф, Иевус – вес семынже Иерусалим, Гива да Кириаф – чылаже латныл ола да нунын йыр улшо илем-влак. Теве Вениамин тукымын, тудын урлыкшо-влакын мландышт.
Глава 18