Выбрать язык
Книги Ветхого Завета
Книги Нового Завета
с русским текстом1 Адониседек, Иерусалим кугыжа, пален налын: Иисус Гай олам сеҥен налын да, Господьлан надыр шотеш пӧлеклен, пӱтынек пытарен – мом Иерихон да тудын кугыжаж дене ыштен, тудымак Гай да тудын кугыжаж дене ыштен. Тудо Гаваонышто илыше-влакын [Иисус да] Израиль дене келшымаш ойпидышым ыштымышт да нунын коклаште кодмышт нергенат колын.2 Иерусалим кугыжам пеш кугу лӱдмаш авалтен, вет Гаваон кугу ола лийын. Тудо Гай ола деч кугурак, кугыжан ола-влак кокла гыч иктыж гай лийын. Тушто илыше-влакымат лӱддымӧ сарзе-влак семын паленыт.3 Садлан Адониседек, Иерусалимын кугыжаже, Хеврон кугыжа Гогам, Иармуф кугыжа Фирам, Лахис кугыжа Яфий да Эглон кугыжа Девир деке тыге каласаш колтен:4 «Толза мый декем, Иисус да израиль эрге-влак дене келшымаш ойпидышым ыштымыжлан Гаваоным кырен шалаташ полшыза».5 Вич аморрей кугыжа – Иерусалимын, Хевронын, Иармуфын, Лахисын да Эглонын кугыжашт – чыла сарзывийыштым погеныт да Гаваон дене кредалашлан, ола воктеке миен, стан дене шогалыныт.
6 Гаваонышто илыше-влак Иисус деке Галгалыш, [израиль] станыш, тыге каласаш колтеныт: «Шке тарзет-влакым ит кодо. Вашкеракын тол мемнан деке, утаре мемнам, мыланна полшо. Курыклаште илыше аморрей кугыжа-влак чыланат мемнан ваштареш погыненыт».7 Тунам Иисус уло сарзывийже дене, лӱддымӧ чыла сарзыж дене, Галгал гыч тарванен каен.8 Иисуслан Господь каласен: «Нунын деч ит лӱд. Мый нуным тыйын кидыш пуэнам, нунын кокла гыч нигӧат тыйын ваштарешет шоген ок керт».
9 Иисус Галгал гыч йӱдвошт ошкылын да аморрей-влак ӱмбаке вучыдымын кержалтын.10 Израильтян-влакын толын лекмекышт, Господь тушман-шамычым ӧрткымашыш пуртен. Израиль эрге-влак нуным Гаваонышто кырен шалатеныт, вара Беф-Ороныш кӱзышӧ корно дене поктеныт, нуным Азека ден Македа шумеш пытарен каеныт.11 Кунам нуно израильтян-влак деч Беф-Орон курык тайыл дене Азекаш куржыныт, Господь ӱмбакышт кава гыч кугу кӱ гай шолемым кышкен, да нуно коленыт. Шолем деч колышо-влакын чотышт [сӧйыштӧ] керде дене пуштмо-влак деч шукырак лийын.
12 Господь [Юмын] аморрей-влакым Израиль кидыш пуымо кечын, кунам нуно Гаваонышто израиль эрге-влак ончылно кырен шалатыме лийыныт, Иисус Господьым ӱжын кумалын да израильтян-влак ончылно тыге каласен:
«Кече, Гаваон ӱмбалне чарнен шогал,
да тый, тылзе – Аиалон лапвер ӱмбалне!»
13 Калыкын шке тушманже-влаклан ӱчым шуктымешкыже, кече чарнен шогалын, тылзат шке верыштыже шоген. Тидын нерген огыл мо «Чын ыштышын книгаштыже» возымо: «Кава покшелне кече шоген, кече мучко тудо касвелкыла каяш вашкен огыл?»14 [Тыге] Господь айдемын йодмыжым шуктен. Тыгай кече нигунам лийын огыл – тидын деч ончычат, тидын деч варат. Вет Господь Шкежак Израиль верч кредалын.15 Тидын деч вара Иисус да уло израиль калык шке станышкышт, Галгалыш, пӧртылыныт.
16 А саде вич кугыжа куржын да Македасе курыкпомышеш шылын.17 Иисуслан каласеныт: «Саде вич кугыжам мумо, нуно Македасе курыкпомышто шылын шинчат».18 Иисус каласен: «Курыкпомышыш пурымо рожым кугу кӱ-влак дене петырыза да тушко орол-шамычым шогалтыза.19 А те [тышан] ида код. Тушман-влакым поктен кайыза, нунын ӱмбак шеҥгечла кержалтса – ида пу нунылан олашкышт миен шуаш, вет Господь Юмыда нуным тендан кидыш пуэн».
20 Тыге Иисус ден израильтян-влак тушманыштым пӱтынек кырен шалатеныт, икмыняр еҥ гына чоткыдемдыме олашкыже куржын утлен.21 Тидын деч вара уло сарзывий тыныс дене станыш, Иисус деке Македаш, пӧртылын. Израиль эрге-влак ваштареш нигӧ нимом ойлаш тоштын огыл.
22 Иисус каласен: «Курыкпомыш рожым почса да саде вич кугыжам мый декем лукса».23 Кӱштымыж семынак тудын деке курыкпомыш гыч вич кугыжам – Иерусалимын, Хевронын, Иармуфын, Лахисын да Эглонын кугыжаштым – луктыныт.24 Нуным Иисус деке лукмеке, тудо чыла израильтян-влакым шкеж деке ӱжын да тудын дене пырля кредалаш коштшо сарзывуй-шамычлан каласен: «Лишемза, нине кугыжа-влакын шӱйыштым тошкалза». Нунышт лишемыныт да йолышт дене кугыжа-шамычын шӱйыштым тошкалыныт.25 Иисус сарзывуй-влаклан каласен: «Ида ӧрткӧ, ида лӱд! Пеҥгыде да патыр лийза! Чыла тушманда дене, кӧмыт дене кредалаш тӱҥалыда, Господь тыге ышта!»26 Вара Иисус нине кугыжа-влакым пуштын да колышо капыштым вич меҥгеш сакен, нуно тушто кас марте кеченыт.27 Кастене Иисус кап-влакым мучыштараш да шылын шинчыме курыкпомышкышт шуаш, а рожым кугу кӱ-влак дене петырен шындаш кӱштен. Кӱ-влак тачат туштак улыт.
28 Тиде кечынак Иисус Македам сеҥен налын. Тиде олаште илыше-влакым, тудын кугыжажым Иисус керде дене пуштын, тушто улшо чыла чонаным, Господьлан надыр шотеш пӧлеклен, пӱтынек пытарен. Нигӧ илыше кодын огыл, [нигӧ куржын утлен огыл]. Македа кугыжа дене тудо Иерихон кугыжа дене ыштыме семынак ыштен.
29 Македа гыч Иисус ден уло израиль калык Ливнаш каеныт да тудын ваштареш кредалыныт.30 Господь тудымат Израиль кидыш пуэн. [Тиде олам руалтеныт,] тудын кугыжажым пленыш налыныт. Олам, тушто улшо чыла чонаным Иисус керде дене пытарен. Нигӧ илыше кодын огыл, [нигӧ куржын утлен огыл]. Ливна кугыжа дене Иисус Иерихон кугыжа дене ыштыме семынак ыштен.
31 Ливна гыч Иисус да уло израиль калык Лахисыш каеныт, станыштым ола воктене шогалтеныт да тудын дене кредалыныт.32 Господь Лахисым Израиль кидыш пуэн: Иисус тудым кокымшо кечын сеҥен налын да, Ливна дене ыштыме семынак, тушто чыла илышым керде дене пытарен.33 Тунам Лахислан полшаш Горам, Газер кугыжа, толын. Но Иисус тудымат, калыкшымат [керде дене] пытарен. Нигӧ илыше кодын огыл, [нигӧ куржын утлен огыл].
34 Лахис гычын Иисус да уло израиль калык Эглоныш каеныт, станыштым ола воктене шогалтеныт да тудын дене кредалыныт.35 [Господь тудым Израиль кидыш пуэн.] Олам тиде кечынак руалтен налыныт да тушто илыше-влакым керде дене пуштыныт. Тиде кечын тушто улшо чыла чонаным, Лахис дене ыштыме семынак, Господьлан надыр шотеш пӧлеклен, пӱтынек пытареныт.
36 Вара Иисус да уло израиль калык Эглон гыч Хевроныш каеныт, тудын ӱмбак кержалтыныт.37 Нуно тудым сеҥен налыныт. Олам, тудын кугыжажым, йыр улшо изирак ола-влакым, тушто чыла илышым нуно керде дене пытареныт – нигӧм илышым коден огытыл. Эглон дене ыштыме семынак, олам да тушто улшо чыла чонаным, Господьлан надыр шотеш пӧлеклен, пӱтынек пытареныт.
38 Тидын деч вара Иисус да уло израиль калык, савырнен, Давирыш каеныт да тудын ӱмбак кержалтыныт.39 Олам, тудын кугыжажым, йыр улшо изирак ола-влакым, тушто улшо чыла чонаным, Господьлан надыр шотеш пӧлеклен, керде дене пӱтынек пытареныт – нигӧ илыше кодын огыл. Мом Иисус Хеврон, Ливна да нунын кугыжашт дене ыштен, тидымак Давир да тудын кугыжаж дене ыштен.
40 Тыге Иисус тусо пӱтынь кундемым – курыкласе мландым, Кечывалвел мландым, лапверлам, курык тайыллам – да нунын кугыжаштым сеҥен налын. Нигӧм илышым коден огыл, Израильын Господь Юмыжын кӱштымыж семынак, тушто илыше-влакым, Господьлан надыр шотеш пӧлеклен, пӱтынек пытарен –41 Кадес-Варни гыч Газа марте, пӱтынь Гесем мландым Гаваон марте.42 Нине кугыжам, нунын мландыштым Иисус иканаште сеҥен налын, вет Израильын Господь Юмыжо Шкежак Израиль верч кредалын.
43 Тидын деч вара Иисус да уло израиль калык станышкышт, Галгалыш, пӧртылыныт.
Глава 10