Выбрать язык
Книги Ветхого Завета
Книги Нового Завета
с русским текстом1 Тидын нерген Иордан вес вел курыклаште, лапверыште да Кугу теҥызын серлаштыже, Ливан марте шуйнышо кундемлаште вуйлатыше [аморрей] кугыжа-влак – хеттей, аморрей, [гергесей], хананей, ферезей, евей да иевусей-влакын кугыжашт – пален налыныт.2 Иисус да Израиль дене кредалаш манын, нуно чыланат иквереш погыненыт.
3 Но Гаваонышто илыше-влак, Иисусын Иерихон да Гай дене мом ыштымыж нерген колмеке,4 чояланаш шонен пыштеныт. Нуно корныш тарваненыт, корнылан кочкыш шапашым налыныт да осёлышт ӱмбак тошто мешак ден тошто, кушкедлыше да тумышан арака шувышым пыштеныт.5 Йолышкышт тошто, тумышан йолчиемым чиеныт, вургемыштат шӱкшӧ лийын. Шапаш киндыштат кукшо, пунышкышо [да пудыргылшо] лийын.6 Нуно Иисус деке Галгалыш, [Израиль] станыш, толыныт да тудлан, чыла израильтян-влаклан каласеныт: «Ме пеш тора мланде гыч толынна. Мемнан дене келшымаш ойпидышым ыштыза».7 Израильтян-влак нине евей-шамычлан каласеныт: «Те ала мемнан воктенак иледа? Кузе ме тендан дене ойпидышым ыштен кертына?»8 Нуно Иисуслан вашештеныт: «Ме тыйын тарзет улына». Иисус нунын деч йодын: «Кӧ те улыда, кушеч толында?»9-10 Нуно тудлан каласеныт: «Тыйын тарзет-влак Господь Юметын лӱмжылан кӧра пеш тора мланде гыч толыныт. Тудын чапше нерген да Египетыште мом ыштымыжым, тыгак Тудын Иордан вес велне илыше кок аморрей кугыжалан – Есевон кугыжа Сигон ден Аштарофышто [да Едрейыште] илыше Васан кугыжа Оглан – чыла мом ыштымыжым ме колын улына.11 [Тидым колмеке,] калык кугуракна ден элыштына чыла илыше-влак мыланна каласышт: ”Корнылан кочкышым налза да нунын ваштареш кайыза, тыге каласыза: ’Ме тендан тарзыда улына, мемнан дене келшымаш ойпидышым ыштыза’”.12 Теве мемнан киндына. Тендан деке толаш лекме кечын ме тудым мӧҥгӧ гыч эше шокшым налынна. А кызыт тудо кукшо да пудыргылшо.13 Теве йошкар аракам темыме шувыш-влак. Темыме годым нуно у лийыныт, а кызыт кушкедлен пытеныт. А тиде вургем ден йолчиемна кужу корнышто шӱкшем пытеныт».14 Израильтян-влак келшыме лӱмеш киндыштым тамленыт, а Господь деч йодын огытыл.15 Иисус нунын дене келшымаш ойпидышым ыштен, илышыштым арален кодаш сӧрен, а калык вуйлатыше-влак тидым товатмут дене пеҥгыдемденыт.
16 Келшымаш ойпидышым ыштымеке, кум кече гыч израильтян-влак тиде калыкын воктене илымышт нерген пален налыныт.17 Корныш лекмеке, израиль эрге-влак кумшо кечын нунын олашкышт миен лектыныт. Ола-влакын лӱмышт тыгай [лийын]: Гаваон, Кефира, Бероф да Кириаф-Иарим.18 [Иисус ден] израиль эрге-влак нине ола ӱмбак кержалтын огытыл, вет калык вуйлатыше-влак Израильын Господь Юмыжын лӱмжӧ дене нунылан товатмутым пуэныт. Тидлан уло израиль калык вуйлатыше-влаклан ӧпкелен.19 Но нуно калыклан тыге каласеныт: «Ме нунылан Израильын Господь Юмыжын лӱмжӧ дене товатленна, сандене тиде калыкым тӱкен огына керт.20 Ме теве мом ыштена: товатмутым пудыртымылан кӧра мемнан ӱмбалне шыде ынже лий манын, ме нуным илышым кодена.21 Тек илат, – вуйлатыше-влак каласеныт, – но нуно пӱтынь калыкланна пум руаш да вӱдым нумалаш тӱҥалыт». Вуйлатыше-влакын ойлымышт семынак ыштеныт.
22 Иисус гаваонитян-влакым шкеж деке ӱжын да нунылан каласен: «Молан те мемнам ”тендан деч тораште илена” манын ондален улыда? Вет те мемнан воктенак иледа.23 Тыге ыштымыланда те каргыме улыда. Те ынде эре мемнан кулна лийыда: [мыланем да мыйын] Юмемын пӧртшылан пум руаш да вӱдым нумалаш тӱҥалыда!»24 Нунышт Иисуслан вашештеныт: «Ме, тыйын тарзет-влак, пален налынна: тыйын Господь Юмет шке Моисей тарзыжлан тиде мландым пӱтынек тыланда пуаш кӱштен, а [мемнам да] тыште илыше моло калыкым – тендан чурий ончыч пытараш. Мемнам пуштыда манын, ме пеш лӱдынна, садланак тыге ыштен улына.25 Ме кызыт тыйын кидыштет улына: мом тый сайлан да чынлан шотлет, тудым мемнан дене ыште».26 Тыге Иисус гаваонитян-влакым израиль эрге-шамычын кидышт деч утарен коден, нуным пушташ пуэн огыл.27 Тиде кече гыч Иисус гаваонитян-влакым [пӱтынь] калыклан да Господьын жертвенникшылан пум руаш, вӱдым нумалаш шогалтен. [Садланак Гаваонышто илыше-влак] таче кече мартеат [Господьын] ойырен налме верыштыже [Юмын жертвенникшылан пум руышо да вӱд нумалше] улыт.
Глава 9