Выбрать язык
Книги Ветхого Завета
Книги Нового Завета
с русским текстом1 Господь Иисуслан каласен: «Ит лӱд, ит ӧрткӧ. Уло сарзывиетым нал да Гай ола ӱмбак керылт. Мый тыйын кидышкет Гай кугыжам, тудын калыкшым, олажым да мландыжым пуэм.2 Мом тый Иерихон да тудын кугыжаж дене ыштенат, Гай ден тудын кугыжаж денат тидымак ыште. Но руалтен налме пого ден вольыкым шкаланда налза. Ик кугу тӱшка еҥым ола шеҥгелне шылтыза».
3 Иисус уло сарзывийже дене Гай ӱмбак каен. Тудо кумло тӱжем лӱддымӧ еҥым ойырен да нуным йӱдым посна колтен,4 тыге кӱштен каласен: «Колыштса! Те ола шеҥгелне шылын шинчаш тӱҥалыда. Ола дечын умбаке ида кай, чыланат ямде лийза.5 А мый да пеленем улшо калык ола деке лишемына. Кунам [Гайыште илыше-влак] ончычсо семынак ваштареш лектыт, ме нунын деч куржына.6 Нуно мемнам покташ тӱҥалыт. Тыге ме нуным ола деч ондален наҥгаена. Нуно каласат: ”Мемнан дечын ончычсо семынак куржыт”. Кунам ме нунын деч куржына,7 те шылын шинчыме верда гыч кынелза да олашке пурыза. Господь Юмыда тудым тендан кидыш пуа.8 Кунам олам руалтен налыда, тудым Господьын каласымыж семынак йӱлалтыза. Тиде мыйын кӱштымашем».9 Тыге Иисус нуным колтен. Нуно каеныт да Вефиль ден Гай коклаште, Гай дечын касвелныла, шылын шинчыныт. А Иисус тиде йӱдым моло сарзе коклаште эртарен.
10 Эрдене эр кынелын, Иисус шке сарзыже-влакым ончен лектын да Израильын кугуракше-влак дене пырля нуным Гай ӱмбак наҥгаен.11 Иисус да тудын пелен улшо сарзе-влак ола деке [эрвел могырым] лишемыныт, [а шылын шичше-шамыч ола деч касвелныла лийыныт].12 Иисус ден сарзыже-влак шке станыштым Гай деч йӱдвелне шогалтеныт, а нунын ден Гай коклаште лапвер лийын. Тидын деч вара Иисус эше вич тӱжем наре еҥым Вефиль ден Гай коклашке, ола деч касвелке, засадыш колтен.13 Сарзе-влак тыге вераҥдыме лийыныт: тӱҥ ужаш – ола деч йӱдвелне, посна ужаш – касвелныла. Тиде йӱдым Иисус лапверыш волен.14 Кунам Гай кугыжа тидым ужын, тудо эрден эрак олаште илыше-влак дене пырля Израиль ваштареш кредалаш лектын. Чыла шке сарзыж дене пырля тудо тӧрвер ончылнысо палемдыме верыш тарванен. А ола шеҥгелне шылын шичше сарзе-влак нерген кугыжа пален огыл.15 Иисус да уло Израиль, сеҥалтшыла койын, ир мланде могырыш куржыныт.16 Израильтян-влакым поктен каяш олаште улшо пӱтынь калыкым ӱжыныт. Иисусым поктен каен, нуно ола деч умбаке торленыт.17 Гай ден Вефильыште ик сарзат кодын огыл – чыланат израильтян-влакым поктен каеныт, эсогыл ола капкаштым петырен огытыл.
18 Тунам Иисуслан Господь каласен: «Кидыште улшо умдетым Гай велыш савыре – Мый тудым тыйын кидышкет пуэм. [Шылын шинчыше-влак тунамак шке верышт гыч кынелыт]». Иисус кидыште улшо умдыжым ола велыш савырен.19 Шылын шичше-влак тунамак шке верышт гыч кынелыныт да олашке чымалтыныт. Нуно пуреныт, тудым сеҥен налыныт да тунамак олашке тулым чыкеныт.20 Гай калык шеҥгеке ончалын да ола гыч кавашке кӱзышӧ шикшым ужын. Нуно нигуш пурен каяш ӧрыныт – ир мландыш куржшо израильтян-влак савырненыт да нунын ӱмбаке кержалтыныт.21 Вет Иисус да уло Израиль, засадыште шинчыше-влакын олам сеҥен налмыштым да ола гыч [кавашке] шикш нӧлталтмым ужмеке, мӧҥгеш савырненыт да Гай калык ӱмбак кержалтыныт.22 А шылын шинчыше-влак ола гыч лектыныт да нунын ваштареш толыныт. Тыге израильтян-влак нуным кок могырымат авырен толыныт. Израильтян-влак нуным тыге пытарен толыныт – нигӧ илыше кодын огыл, нигӧ куржын утлен огыл.23 Но Гай кугыжам нуно илышымак налыныт да Иисус деке конденыт.
24 Кунам израильтян-влак нуным поктен толшо Гай калыкым сӧй*а пасу ден ир мландыште кырен шалатеныт да чылаштым керде дене пытареныт, шкешт Гайышке пӧртылыныт да тушто кодшо чыла еҥым керде дене пуштыныт.25 Тиде кечын латкок тӱжем пӧръеҥ ден ӱдырамаш – Гайыште илыше уло калык – пуштмо лийын.26 Гайыште илыше уло калыкым, Господьлан надыр шотеш пӧлеклен, пӱтынек пытарымешке, Иисусын умдым кучышо кидше нӧлталме лийын.27 Израиль [эрге-влак] руалтен налме вольык ден погым гына шкаланышт налыныт. Тыге ышташ Иисуслан Господь каласен.28 Иисус Гай олам йӱлалтен да тудын деч кӱ орам веле коден, олам курымешлан пуста верыш савырен. Таче кечынат тудо тыгак кодын.29 Гай кугыжам Иисус пушеҥгеш сакен, тудыжо тушто кас марте кечен. Кече шичмеке, Иисус тудын капшым мучыштараш да ола капка деке шуаш кӱштен. Еҥ-влак тудын ӱмбакше кугу кӱ орам оптен шынденыт, тудо таче кече мартеат уло.
30 Тудо жапыште Иисус Израильын Господь Юмыжлан Гевал курыкышто жертвенникым шогалтен.31 Тыге ышташ израиль эрге-влаклан Господьын Моисей тарзыже кӱштен коден. Моисейын закон книгаштыже возымо семынак, жертвенникым тудо кӱртньӧ ӱзгар тӱкныдымӧ тичмаш кӱ-влак гыч ыштен. Тушто Господьлан йӱлалтен пуымо надыр ден татулык надырым конденыт.32 Иисус нине кӱэш Моисейын израиль эрге-влак ончылно возымо законжым возен шынден.33 Уло Израиль – израиль калык гыч лекше-влакат, йотъеҥ-шамычат – шке кугуракше, вуйлатышыже да судьяже-влак дене пырля Господьын ойпидыш шондыкшо кок велым, тудым нумалше иерей левит-влак ваштареш, шоген. Пел калык Гаризим курык дене, вес пелыже Гевал курык дене шогеныт. Израиль калыкым тыге суапландараш Господьын Моисей тарзыже кӱштен улмаш.34 Вара Иисус законышто чыла мом возымым – закон книгаште возымо чыла суапландарымаш ден каргымаш шомакымат – лудын лектын.35 Уло израиль калык ончылно – [пӧръеҥ,] ӱдырамаш, йоча, тыгак нунын дене илыше йотъеҥ-влак ончылно – Иисус Моисейын [тудлан] кӱштен кодымыжым лудын, тышечын ик мутымат лудде коден огыл.
*а 8:24 Сӧй – битва.
Глава 8