Выбрать язык
Книги Ветхого Завета
Книги Нового Завета
с русским текстом1 Господь Юмыдан тыланда пуымо мландыште нуреш пуштмо еҥым муыт, а тудым пуштшо еҥ пале огыл гын,2 тек тендан кугурак ден судьяда-влак толыт да пуштмо еҥ ден йыр улшо ола-влак кокласе кужытым висат.3 Пуштмо еҥ деке могай олан лишылрак улмыжым рашемдымеке, тек тиде олан кугуракше-влак пашам ыштыдыме, омытам палыдыме тунам налыт4 да тудым вӱдйогынан лапверыш вӱден кондат, кудыжым нигунам курал-ӱден огытыл. Тек тиде вереш тунан шӱйжым пудыртат.5 Вара тушко тек Левий тукым иерей-влак толыт, вет Господь Юмет нуным Шкаланже служитлаш да Господьын лӱмжӧ дене калыкым суапландараш ойырен налын. Нуно ӱчашымашым лукшо тӱрлӧ йодыш ден тӱрлӧ эмганымаш годымат пунчалым лукшаш улыт.6 Тек пуштмо еҥ деке эн лишыл улшо олан кугуракше-влак лапверыште шӱйжым пудыртымо тунан [вуй] ӱмбалныже кидыштым мушкыт7 да тыге каласат: ”Мемнан кидна тиде вӱрым йоктарен огыл, шинчана тидым ужын огыл.8 Касаре, Господь, [Египет мланде гыч] утарыме Израиль калыкетын сулыкшым. Титакдыме вӱрым йоктарымылан шке Израиль калыкетым титаканыш ит лук”. Тунам нуно вӱр йоктарыме деч касарыме лийыт.9 Тыге Господь [Юмыдан] шинча ончылныжо [поро ден] чыным ыштен, те шке ӱмбачда титакдыме вӱрым мушкын колтеда.
10 Кунам тушман дене кредалаш каеда да Господь Юмыда нуным тендан кидыш пуа, да те нуным пленыш налыда,11 тыге лийын кертеш: пленыш логалше-влак коклаште мотор ӱдырамашым ужын, йӧратен шындет да тудым марлан налаш шонен пыштет.12 Тунам ты ӱдырамашым мӧҥгышкет кондо. Тек тудо ӱпшым нӱжын шуа, кӱчшым пӱчкеш,13 пленысе вургемжым кудашеш. Тек тудо тыйын пӧртыштет кодеш да ачаж ден аваж шотышто ик тылзе мучко шортмо йӱлам эртара. Тидын деч вара тый, тудын деке пурен, марийже лийын кертат, а тудо тыйын ватет лиеш.14 Ты ӱдырамаш варажым тылат ок келше гын, тудо кушко шона, тушко каен кертеш. Но тудым ит ужале да кулышко ит савыре, вет тый тудым шке денет илыктенат.
15 Иктаж-кӧн кок ватыже – иктыже йӧратыме, весыже йӧратыдыме – уло гын, когыньышт дечат тудын эргыж-влак улыт, да кугэргыже йӧратыдыме ватыж деч гын,16 эрге-влак коклаште югыпогым*а шелме годым ача йӧратыдыме ватыж деч шочшо кугэргыжлан пуышаш пайым йӧратыме ватыжын эргыжлан пуэн ок керт.17 Ача йӧратыдыме ватыж деч шочшо эргым кугэрге шотеш ужшаш да тудлан шке погыж гыч кок пачаш шукырак пуышаш, вет тиде эрге – пӧръеҥ вийжын икымше саскаже, кугэргылык кертыж*б – тудын дене.
18 Кӧн эргыже ӱскырт, мут колыштдымо, ача-аважым ок колышт – нунышт кеч-мыняр ушым пурташ тӧченыт, но тудо садак колыштын огыл –19 тек ачаж ден аваже тудым олан кугуракше-влак деке ола капка воктеке кондат20 да каласат: ”Мемнан эргына ӱскырт, мут колыштдымо, шомакнам ок колышт, кочкаш да аракам йӱаш веле пала”.21 Тек тиде эргым оласе калык кӱм кышкен пуштеш. Тыге ыштен, шкендан кокла гыч осалым пытарыза. Тунам уло израиль калык, тидым колын, лӱдеш.
22 Кӧ колымашым сулышо титакым ышта, да те тыгай еҥым казнитлен пуштыда да меҥгеш сакеда гын,23 йӱдлан капшым тушан ида кодо, тиде кечынак тойыза, вет [кеч-кӧ, пу меҥгеш] сакыме, Юмо ончылно каргыме улеш. Господь Юметын тылат пуымо мландыжым ит шакшыле.
*а 21:16 Югыпого – наследство.
*б 21:17 Кугэргылык – первородство. Кертыж – право.
Глава 21