Выбрать язык
Книги Ветхого Завета
Книги Нового Завета
с русским текстом1 Кунам те тушманда ваштареш сарыш каеда да тендан деч шукырак имньым, сарлык орвам да сарзе-влакым ужыда, нунын деч ида лӱд, вет Египет гыч лукшо Господь Юмыда тендан дене пырля лиеш.2 Тек кредалаш тӱҥалмыда деч ончыч сарзе-влак ончыко иерей лектеш да тыге каласа:3 ”Колышт, Израиль! Таче те тушман дене кредалаш тӱҥалыда. Лӱддымылыкым ида йомдаре, ида ӧрткӧ, ида аптыране. Тушман деч ида лӱд.4 Вет тендан дене пырля Господь Юмыда тендан верч кредалаш кая, Тудо тыланда сеҥаш полша”.
5 А сарзытӧра-влак тек шке сарзыштлан каласат: ”Кӧ тендан кокла гыч у пӧртым чоҥен, но тудым эше святитлыктен огыл – тек мӧҥгыжӧ пӧртылеш. Тыге лийын кертеш: тудо сарыште кола, да вес еҥ тудын пӧртшым шкаланже святитлыкта да тушко илаш пура.6 Кӧ тендан кокла гыч виноград аҥам шынден, но саскам эше поген огыл – тудат тек мӧҥгыжӧ пӧртылеш. Тыге лийын кертеш: тудо кредалмаште кола, да тудын виноград лектышыжым весе пога.7 Кӧ тендан коклаште ӱдырым налшаш, но тидым эше ыштен шуктен огыл – тек мӧҥгыжӧ пӧртылеш, вет тудо кредалмаш годым колен кертеш, да налшаш ӱдыржым весе марлан налеш”.8 Эше тӧра-влак сарзе-шамычлан тыге каласышаш улыт: ”Кӧ тендан кокла гыч аптырана да лӱдеш – тек мӧҥгыжӧ пӧртылеш, уке гын моло сарзымат лӱдмаш авалта”.9 Тӧра-влакын чыла каласымекышт, сарзе-шамычым вуйлатен шогаш сарзывуй-влакым ойырен налман.
10 Олам сеҥен налаш манын, тудын деке лишеммеке, ончыч тудлан тынысым темлыза.11 Темлымыда дене кӧнат да тыланда капкам почыт гын, тунам тушто илыше уло калык тыланда йозакым тӱлаш да пашам ышташ тӱҥалеш.12 Ола тендан дене тынысым ышташ ок келше да тендан ваштареш кредалаш тӱҥалеш гын, тудым авырен налза.13 Кунам Господь Юмыда тиде олам тендан кидыш пуа, тушто улшо чыла пӧръеҥым керде дене пуштса.14 Но ӱдырамаш ден икшыве-влакым, вольыкым да чыла молымат шкаланда налза. Вет тушмандам Господь Юмыда тендан кидыш пуэн, те нунын уло погыштым кучылт кертыда.
15 Тендан деч тораште улшо чыла ола дене, кудышт тысе калык-влакын огытыл, тыге ыштыза.16 А Господь Юмыдан тыланда пуымо мландыштыже илыше калык-влакын олаштым сеҥен налмеке, тушто ик илыше чонымат ида кодо.17 Нине калыкым – хеттей, аморрей, хананей, ферезей, евей, иевусей [да гергесей-влакым] – Господьлан надыр шотеш пӧлеклен, пӱтынек пытарыза. Тыланда тыге ышташ Господь, тендан Юмыда, кӱштен.18 Тунам нуно шке юмыштлан кумалме йырнык йӱлалан тендам огыт туныкто, да те Господь Юмыда ончылно сулыкыш огыда пуро.
19 [Иктаж-могай] олам сеҥен налаш шонен, тудым авырен налыда да тушто кужу жап лийыда гын, тиде ола йыр улшо пушеҥге-влакым ида ру, вет те нунын саскаштым кочкын кертыда. Нунын ӱмбак шке товардам ида нӧлтал: пушеҥге-влак айдеме огытыл, нуно чоткыдемдыме олашке куржын огыт керт.20 Лач саскадыме пушеҥге-влакым руэн кертыда. Олам сеҥен налмешке, нине пушеҥге-влакым те тушман ваштареш кредалме годым мо кӱлешлан кучылт кертыда.
Глава 20