Выбрать язык
Книги Ветхого Завета
Книги Нового Завета
с русским текстом1 Вес еҥын йомын коштшо ушкал-ӱшкыжшым але шорыкшым ужат гын, эртен ит кай, а озаж деке намиен кодо.2 Озаже лишне ок иле але вольыкын озаже кӧ улмым от пале гын, тудым мӧҥгышкет пурто. Озажын кычал толмешкыже тек тудо тый денет лиеш, вара вольыкым озажлан пӧртылтӧ.3 Вес еҥын осёлжо але вургемже денат – чылаж денат, мо тудын йомын да мом тый муынат – тыгак ыште. Эртен ит кай воктечын.4 Вес еҥын корнеш йӧрлшӧ осёлжым але ӱшкыжшым ужат гын, эртен ит кай – тудлан вольыкшым йол ӱмбаке шогалташ полшо.
5 Ӱдырамаш пӧръеҥ вургемым чийышаш огыл, пӧръеҥат тек ӱдырамаш вургемым ок чий, вет тыге ыштыше еҥ Господь Юметлан йырнык улеш.
6 Кайыме корныштет тылат пушеҥгыште але мландыште кайык пыжаш логалеш, а туштыжо кайык шке игыже-влак дене але муным пӱктен шинча гын, авам игыже-влак дене пырля ит нал.7 Кайыкиге-влакым шкаланет налын кертат, а аваштым колто. Тунам тыланет сай лиеш да тый кужу ӱмыран лият.
8 У пӧртым чоҥымет годым леведыш тӱреш пылдырым*а ыште. Тунам пӧрт ӱмбачет нигӧ ок камвоч да вӱр йоктарымылан титак пӧртет ӱмбак ок воч.
9 Виноград аҥаш вес тӱрлӧ кушкылын нӧшмыжым ит ӱдӧ – тыге ыштет гын, мо ӱдыметын саскажат, виноград лектышетат святой лийыт, тый нуным кочкын от керт.10 Ӱшкыж ден осёлым пырля кычкен, мландым ит курал.11 Кок тӱрлӧ шӱртӧ гыч – меж ден йытын гыч – куымо вургемым ит чий.
12 Ӱмбал вургеметын ныл лукешыже йолва-влакым пижыктен саке.
13 Кӧ ӱдырым марлан налеш, тудын дене мала, а вара тудым ужмыжо ок шу,14 ”мый тиде ӱдырым налынам да тудын дене возынам, а тудо ӱдыр лийын огыл” манын, тудым титаклаш да шӱктараш тӱҥалеш гын,15 тунам тек ӱдырын ачаж ден аваже шочшыштын ӱдыр лиймыж нерген ӱшандарыше палым ола капка деке кугурак-влак ончыко намият.16 Тек ӱдырын ачаже кугурак-влаклан каласа: ”Мый шке ӱдырем тиде еҥлан марлан пуэнам, а тудын [ынде] ӱдыремым ужмыжо ок шу.17 Тиде еҥ, мыйын ӱдырем шӱктарен, тыге ойла: ’Тыйын ӱдырет ӱдыр лийын огыл’. Тудын ӱдыр лиймыжым мый теве мо дене ӱшандарен кертам”. Да ӱдырын ачаж ден аваже оласе кугурак-влак ончылно тек простыньым шарен ончыктат.*б18 Тунам олан кугуракше-влак саде еҥым наказатлышаш улыт.19 Нуно тыгак израиль ӱдырым намыслымылан тудын деч штраф шотеш шӱдӧ сикль шийым налшаш да ӱдырын ачажлан пуышаш улыт. А ӱдыр тиде еҥын ватыжак кодеш, марийже тудын дене нигунам ойырлен ок керт.
20 Но марийжын каласымыже чын, тудын ӱдыр лиймыж нерген ӱшандарыше пале ок лий гын,21 тек ӱдырым ачажын пӧрт омсаж деке намият, да олаште илыше-влак тудым кӱм кышкен пуштыт. Вет тудо Израильыште намысле пашам ыштен – ачажын суртыштыжо илымыж годымак яжарланен. Пытарыза шкендан кокла гыч осалым!
22 Кӧ вес еҥын ватыж дене малымыж годым кучымо лиеш гын, когыньыштымат – пӧръеҥжымат, ӱдырамашыжымат – пуштман. Пытарыза Израиль гыч осалым!
23 Кӧ вес еҥлан марлан лекшаш ӱдырым олаште вашлиеш да тудын дене мала гын,24 когыньыштымат ола капка воктеке кондыман да кӱм кышкен пуштман: ӱдырым – олаште лийын гынат, полышым йодын кычкырен огыл, пӧръеҥым – лишылъеҥжын ончыкылык ватыжын лӱмнержым шӱктарымыжлан. Пытарыза шкендан кокла гыч осалым!
25 Кӧ вес еҥлан марлан лекшаш ӱдырым нурышто вашлиеш да, пӱтырен кучен, виешла гын, тунам пӧръеҥжым веле пуштман,26 а ӱдыр дене нимомат ида ыште. Тудын пушташ йӧрышӧ нимогай титакше уке. Пӧръеҥын тыге ыштымыже лишылъеҥ ӱмбаке кержалтме да пуштмо дене иктак.27 Вет марлан лекшаш ӱдырым ты пӧръеҥ нурышто вашлийын, да тудыжо кычкырен гынат, полшышо нигӧ лийын огыл.
28 Кӧ ӱдыръеҥым вашлиеш да, пӱтырен кучен, тудым виешла, да нуно кучымо лийыт гын,29 тек пӧръеҥ ӱдырын ачажлан витле сикль шийым тӱла да тиде ӱдырым марлан налеш, вет тудо ӱдырым намыслен. Ты пӧръеҥ тудын дене нигунам ойырлен ок керт.
30 Нигӧ ачажын изватыж дене малышаш огыл, вет тидын дене пӧръеҥ шке ачажым шӱктара.
*а 22:8 Пылдыр – перила. Акрет Израильыште пӧрт тӧр леведышан лийын, тудын дене ешартыш пӧлем семын пайдаланеныт.
*б 22:17 Простынь – Ӱдырамаш-влак сӱан йӱдысӧ вӱр вашакан простыньым, ӱдыр лиймыштым ӱшандараш манын, арален кийыктеныт.
Глава 22