Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Израиль калыклан кӱштен ойло: тек волгалтараш тыланет кид дене темден лукмо яндар олив ӱйым кондат – светильникыште лампаде-влак эре йӱлышаш улыт.3 Аарон [ден эргыж-влак] нуным Юмо дене вашлийме омашыште улшо ойпидыш шондыкын пӱрдышшӧ ончылан Господь чурий ончыко шындышаш улыт, лампаде-влак кас гыч эр марте эре йӱлышаш улыт. Тиде тыланда – курым-курымешлан тукым гыч тукымыш шуктен шогышаш закон.4 Лампаде-влакым нуно Господь чурий ончыко яндар шӧртньӧ дене ыштыме светильникыш эре шынден шогышаш улыт.
5 Эн сай ложашым нал да латкок лепошкам кӱктӧ. Кажныжлан ефан кок луымшо ужашыже ложаш кӱлеш.6 Нуным Господь ончыко, яндар шӧртньӧ гыч ыштыме ӱстембаке, кок рат дене, кажне ратыште кудыт дене, пыште.7 Кажне ратыш яндар ладыным [да шинчалым] вераҥде. Кинде олмеш нуно шарныктыше ужаш, Господьлан надыр, лийыт.8 Израиль калык деч тиде киндым Господь ончыко кажне шуматкечын пыштен шогыман. Тиде – курым-курымаш ойпидыш.9 Тиде кинде Аарон ден тудын эргыж-влаклан лиеш. Тудым нуно святой верыште кочкаш тӱҥалыт, вет тиде – поснак святой надыр. Господьлан кондымо надыр гыч ты кинде нунылан лиеш. Тиде – курым-курымешлан закон».
10 Израиль ӱдырамашын египет пӧръеҥ деч шочшо эргыже израиль эрге-влак деке лектын да станыште ик израиль еҥ дене вурседылаш тӱҥалын.11 Израиль ӱдырамашын эргыже Господьын лӱмжым вурсен да шӱктарен ойлен. Тудым Моисей деке конденыт. Аважын лӱмжӧ Шеломиф лийын, тудыжо Дан тукым Даврийын ӱдыржӧ улмаш.12 Господь деч вашмутым колмешке, тиде еҥым петырымаште кученыт.13 Господь Моисейлан каласен:14 «Шӱктарен ойлышо еҥым стан гыч лук. Кӧ тудын ойлымыжым колын, тек чыланат вуйышкыжо кидыштым пыштат. Вара уло калык тудым тек кӱм кышкен пуштеш.15 Израиль калыклан каласе: кӧ шке Юмыжым шӱктарен ойла, тудо шке сулыкшылан мутым куча.16 Господьын лӱмжым шӱктарыше еҥ колышаш. Уло калык тудым кӱм кышкен пуштшаш. Тудо йотъеҥ але израиль калык кокла гыч лийже – Господьын лӱмжым шӱктарен ойла гын, тудым пуштман.
17 Иктаж-кӧ вес еҥым пуштеш гын, тудо шкежат пуштмо лийшаш.18 Кӧ вольыкым пуштеш гын, эҥгеклан пӧртылтышаш: вольыклан – вольыкым.19 Кӧ лишылъеҥжым сусырта, тудланат тидымак ыштыман:20 лум тугымылан – тугымашым, шинчалан – шинчам, пӱйлан – пӱйым. Кузе тудо весым сусыртен, тудымат тыгак сусыртыман.21 Кӧ вольыкым пуштеш – эҥгеклан пӧртылтышаш, кӧ айдемым пуштеш – шкенжым пуштман.22 Йотъеҥланат, тендан калык гыч лекшыланат ик закон лийже. Вет Мый Господь, тендан Юмыда, улам».
23 Моисей тидым Израиль калыклан каласен. Шӱктарен ойлышо еҥым стан гыч ӧрдыжкӧ луктыныт да кӱм кышкен пуштыныт. Кузе Господь Моисейлан кӱштен, Израиль калык тыгак ыштен.
Глава 24