Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен:2 «Израиль калыклан увертаре: Господьын теве могай пайремже-влак годым те святой погынымашым эртарышаш улыда. Теве Мыйын пайремем-влак.
3 Куд кече пашам ыштыза, а шымше кече – шуматкече, каныме да святой погынымаш кече. Тунам нимогай пашам ида ыште. Кеч-кушто иледа гынат, тиде – Господьын шуматкечыже.
4 Теве Господьын моло пайремже-влак, святой погынымаш-влак. Нуным те палемдыме жапыште эртарышаш улыда.5 Икымше тылзын латнылымше кечынже кастене Господьын Кугече пайремже тӱҥалеш.6 Тиде тылзынак латвизымше кечынже – Господьын Шергинде пайремже. Шым кече шергиндым кочса.7 Икымше кечынже святой погынымашым эртарыза. Нимогай пашам ида ыште.8 Шым кече жапыште Господьлан надырым конден шогыза. Шымше кечын тыгак святой погынымаш лийшаш. Нимогай пашам ида ыште».
9 Господь Моисейлан каласен:10 «Израиль калыклан увертаре: кунам те Мыйын пуымо мландышке миен шуыда да тушто шурным тӱредаш тӱҥалыда, икымше тӱредме кылтадам иерей деке кондыза.11 Тыланда поро кумылым сулен налаш манын, тек иерей тиде кылтам Господь ончылно шуматкече эрлашыжым нӧлтал конда.12 Кылтам нӧлтал кондымо кечын Господьлан йӱлалтен пуашлан экшыкдыме икияш пачам кондыза.13 Тудын дене пырля Господьлан кинде надыр шотеш ефан кок луымшо ужашыже эн сай ложашым, олив ӱй дене йӧрен, кондыза. Тиде Господьлан келшыше тамлыпушан надыр лиеш. Тудын деке йошкар арака надыр чырык гин лийшаш.14 Шке Юмыланда надырым кондымо кече марте нимогай угиндым, пуштылмо але иле пырчым ида коч. Кеч-кушто илаш тӱҥалыда гынат, тиде тыланда курым-курымешлан тукым гыч тукымыш шуктен шогышаш закон.
15 Шуматкече деч варасе икымше кече – кылтадам рӱзалтен кондымо кече – гыч тӱҥалын, шым тичмаш арням шотлен лукса.16 Витлымше кечын, шымше шуматкече деч варасе икымше кечын, у шурно лектыш гыч Господьлан кинде надырым кондыман.17 Илыме верда гыч нӧлтал пуымо надырлан*а кок сукыр киндым кондыза. Нуно ефан кок луымшо ужашыже эн сай ложаш дене ыштыме шушо руаш гыч пыштыме лийышт. Тиде – Господьлан кондымо угинде надыр.18 Кинде дене пырля икияш шым пачам, ик ӱшкыжым да кок тагам кондыман. Нунын нимогай экшыкышт лийшаш огыл. Кинде надыр да йошкар арака надыр дене пырля нуно Господьлан йӱлалтен пуымо надыр лийыт. Тиде – Господьлан келшыше тамлыпушан надыр.19 [Угинде надыр дене пырля] тыгак сулык верч надырлан ик казатагам да татулык надырлан икияш кок пачам кондыза.20 Тек иерей нине кок пачам угинде надыр дене пырля Господь ончылно рӱзалтен конда. Тиде Господьлан кондымо святой надыр лиеш, тудым [надыр кондышо] иерейлан пуыман.21 Тиде кечынак святой погынымашым чумырыза. Нимогай пашам ида ыште. Кеч-кушто илаш тӱҥалыда гынат, тиде тыланда курым-курымешлан тукым гыч тукымыш шуктен шогышаш закон.
22 Кунам те шке мландыштыда шурным тӱредаш тӱҥалыда, пасу тӱр марте ида тӱред, тӱредме деч вара кодшо шурно парчам ида пого. Тидым йорло ден йотъеҥ-влаклан кодыза. Мый Господь, тендан Юмыда, улам».
23 Господь Моисейлан каласен:24 «Израиль калыклан ойло: тек шымше тылзын икымше кечыже тыланда каныш кече лиеш, тек тунам пучым пуалтат да святой погынымашым эртарат.25 Нимогай пашам ида ыште, Господьлан надырым кондыза».
26 Господь Моисейлан каласен:27 «Шымше тылзын индешымше кечыже – Касарымаш кече. Тиде кечын святой погынымашым эртарыза. Пӱтым кучыза да Господьлан надырым кондыза.28 Тиде кечын нимогай пашам ида ыште, вет тиде – Касарымаш кече. Тиде кечын тендам Господь Юмыда ончылно сулыкда деч эрныкташ тӱҥалыт.29 Кажне, кӧ тиде кечын пӱтым ок кучо, шке калыкше кокла гыч пытарыме лийшаш.30 Кажным, кӧ тиде кечын иктаж-могай пашам ышташ тӱҥалеш – Мый калык кокла гыч пытарем.31 Нимогай пашам ида ыште. Кеч-кушто илаш тӱҥалыда гынат, тиде тыланда – курым-курымешлан тукым гыч тукымыш шуктен шогышаш закон.32 Тиде кече тыланда шуматкече, каныш кече лиеш. Тиде тылзын индешымше кечынже кастене пӱтым кучаш тӱҥалза. Тиде кас гыч тӱҥалын, луымшо кечын касше марте шуматкече йӱлам шуктыза».
33 Господь Моисейлан ойлен:34 «Израиль калыклан каласе: шымше тылзынак латвизымше кечыж гыч Омаш пайрем тӱҥалеш. Господьын тиде пайремже шым кече шуйна.35 Икымше кечынже святой погынымашым эртарыза. Нимогай пашам ида ыште.36 Шым кече Господьлан надырым кондыза. Кандашымше кечын святой погынымашым эртарыза. Тунамат Господьлан надырым кондыза. Тиде кече пайремым мучашла, нимогай пашам ида ыште.
37 Теве Господьын пайремже-влак. Нине пайрем годым святой погынымаш-влакым эртарыман. Тыгодым те йӱлалтен пуымо надырым, кинде надырым, шӱшкылмӧ вольык надырым да йошкар арака надырым кажныжым шке кечынже Господьлан кондышаш улыда.38 Нине пайрем деч посна шуматкечымат ида мондо. Шкендан пӧлекдам, сӧрымӧ надырдам, шке кумылын пуымо надырдам Господьлан конден шогыза.
39 А шымше тылзын латвизымше кечынже – тиде жаплан те мланде лектышым поген налыда – шым кече Господьын пайремжым пайремлыза, тыгодым икымше да кандашымше кечын каныза.40 Икымше кечын пушеҥгысе эн чапле саскам, тыгак пальме укшым, кугу лышташан пушеҥге укшым, эҥер воктенысе шертне укшым налза да Господь Юмыда ончылно шым кече куанен пайремлыза.41 Господьын тиде пайремжым кажне ийын шым кече пайремлыза. Тиде тыланда – курым-курымешлан тукым гыч тукымыш шуктен шогышаш закон. Шымше тылзын тудым пайремлыза.42 Укш дене ыштыме омашлаште шым кече илыза. Кажне израиль еҥ омашыште илышаш.43 Тек тендан чыла ончыкылык тукымда палаш тӱҥалеш: Израиль калыкым Египет мланде гыч лукмеке, Мый нуным омашлашке илаш пуртенам. Мый Господь, тендан Юмыда, улам».
44 Моисей Израиль калыклан Господьын палемдыме пайремже-влак нерген увертарен.
*а 23:17 Тиде надырым, кидым кӱш нӧлталын, конденыт.
Глава 23