Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен: «Ончычсо гай кок кӱоҥам руэн лук [да Мый декем курыкыш кӱзӧ]. Шалатыме кок кӱоҥаштет возымо мут-влакымак Мый угыч нине оҥашке возем.2 Эрдене ямде лий: Синай курык вуйыш кӱзӧ да тушто Мыйын ончылнем шогал.3 Тый денет пырля нигӧ кӱзышаш огыл, пӱтынь курыкышто нигӧ ынже лий. Эсогыл тыгыде да шолдыра вольыкат тиде курык лишне коштшаш огыл».
4 Господьын кӱштымыж семынак Моисей кок кӱоҥам, ончычсо гайымак, руэн луктын да, эрден эр кынелын, Синай курыкыш кӱзен. Тудын кидыштыже кок кӱоҥа лийын.5 Господь, пыл лоҥгаште волен, Моисей лишан шогалын да шке лӱмжым увертарен.6 Господь тудын ончычшо эртен да йоҥгалтарен каласен: «Господь, Господь – айдемым йӧратыше, чаманыше, кужун чытыше, пеш поро да чын Юмо.7 Тудо – [чыным да] чаманымашым тӱжемше тукым марте шуйышо, титакым, осал пашам да языкым кудалтыше. Но титаканым Тудо мут кучаш шогалтыде ок кодо, ачаштын титакыштлан шочшыштым да шочшыштын шочшыштым кумшо да нылымше тукым марте мут кучаш шогалта».8 Моисей тунамак мландыш кумык возын, Юмылан вуйжым савен9 да каласен: «Господь, Тыйын шинчаштет поро кумылым суленам гын, Тый, Господь, мемнан дене пырля кай. Тиде калык ӱскырт гынат, осал паша ден сулыкнам кудалте, мемнам шке калыкетым ыште».
10 Господь [Моисейлан] вашештен: «Мый тендан дене ойпидышым ыштем: тыйын уло калыкет ончылно тугай ӧрыктарыше паша-влакым ыштем, могайже пӱтынь мланде мучко, нимогай калык денат лийын огытыл. Уло калык, кудын коклаште тый илет, Господьын пашажым ужеш. Вет мом Мый тыланет ыштем – кугу лӱдмашым луктеш.11 Мом Мый тыланет таче кӱштем, тудым шуктен шого. Тыйын ончычет Мый аморрей, хананей, хеттей, ферезей, евей, [гергесей] да иевусей-влакым поктен колтем.12 Шекланыза, миен пурымо мландыштыда илыше-влак дене ушемым ида ыште: нуно тыланда оптыш лийын кертыт.13 Нунын жертвенникыштым шалатыза да онакӱштым пытарыза, Ашера*а меҥгыштым руэн шуыза, [шке ыштыме юмыштым тулеш йӱлалтыза].14 Господь [Юмо] деч моло вес юмылан те кумалшаш огыдал, вет Тудо вес юмылан кумалмым чыташ ок тӱҥал.15 Тудо мландыште илыше-влак дене ушемым ида ыште. Уке гын, шояк юмыштлан яжарланен кумалын, надырым кондымышт годым нуно тендам шке декышт ӱжын кертыт, да те нунын надырыштым кочкыда.16 Нунын ӱдырыштым шке эргыда-влаклан марлан ида нал, [шке ӱдырда-влакымат нунын эргыштлан марлан ида пу.] Налыда гын, нунын ӱдырышт, шке шояк юмыштлан яжарланен кумалын, тендан эргыдамат шояк юмыштлан кумалаш туныктат.17 Велыме юмо-влакым шкаланда ида ыште.
18 Шергинде пайремым эртарен шогыза: палемдыме жапыште, авив тылзын, Мыйын кӱштымем семынак, шым кече шергиндым кочса – вет Египет гыч те авив тылзын лектында.
19 Кажне икымше шочшо – Мыйын, чыла вольыкетын икымше шочшыжо – ӱшкыжаш презат, тагаш пачат – Мыйын улыт.20 Осёлын икымше чомажым пача дене алмаштыза. Огыда алмаште гын, тудым мӧҥгеш тӱлен налза. Кажне икымше шочшо эргыдам Мый дечем тӱлен налза. Нигӧ Мыйын ончыкем яра кид дене ынже тол.
21 Куд кече пашам ыштыза, а шымше кечын – ӱдымӧ да тӱредме жапыштат – каныза.
22 Арня пайремым – шыдаҥым тӱредаш тӱҥалме пайремым – эртарен шогыза. Тыгак идалык мучаште чыла лектышым погымо пайремымат пайремлыза.23 Тендан уло пӧръеҥ тукымда идалыклан кум гана Господь, Израиль Юмо, ончыко толшаш.24 Мый тендан ончыч вес калык-влакым поктен колтем да мландыдам кумдаҥдем. Кунам те идалыклан кум гана Господь Юмыда ончыко толыда, мландыдам поген налаш шонышо нигӧ ок лий.
25 Надыр вольыкын вӱржым кондымо годым Мылам шушо руаш гыч пыштымым нимом ида кондо. Кугече пайрем годым кочмо надыр шылым эр марте ида кодо.
26 Мланде лектышдан икымше эн сай саскажым Господь Юмыдан пӧртышкыжӧ кондыза.
Казапачам аважын шӧрешыже ида шолто».
27 Господь Моисейлан каласен: «Мом ойлымем возен шынде, вет нине мут дене Мый тый денет да Израиль калык дене ойпидышым ыштем».28 Господь дене Моисей нылле кече да нылле йӱд лийын. Тудо нимомат кочкын огыл, вӱдымат йӱын огыл. Кок кӱоҥаш Моисей ойпидышын мутшо-влакым – лу кӱштымашым – возен шынден.
29 Синай курык гыч волымыж годым Моисейын кидыштыже ойпидыш кӱоҥа-влак лийыныт. Юмо дене кутырымыжлан кӧра Моисейын чурийже йолгалтын, тудыжо тидым пален огыл.30 Моисейым Аарон да уло Израиль калык ужыныт, но чурийже йолгалтмылан кӧра тудын деке лишке мияш лӱдыныт.31 Моисей нуным шкеж деке ӱжын. Аарон да чыла калык вуйлатыше-влак тудын деке лишемыныт, да Моисей нунын дене кутырен.32 Тиддеч вара уло Израиль тудын деке лишемын, да Синай курыкышто Господьын чыла кӱштымыжым Моисей калыклан увертарен.33 Ойлен пытарымекыже, Моисей шке чурийжым леведыш дене леведын.34 Кунам Моисей, Господь дене кутыраш манын, Тудын чурийже ончыко пурен, тушеч лекмешкыже, тудо чурий леведышыжым кораҥден. А лекмекше, [Господьын] чыла кӱштымыжым Израиль эрге-влаклан увертарен.35 Израиль калык Моисейын чурийже йолгалтмым ужын. Господь дене уэш кутыраш пурымыж марте Моисей чурийжым левед коштын.
*а 34:13 Ашера – Ханаан мландысе юмынйӱлаште ӱдырамаш юмо, юмо-влакын авашт.
Глава 34