Выбрать язык
Книги Ветхого Завета
Книги Нового Завета
с русским текстом1 Господь Моисейлан каласен: «Тый да Египет гыч лукмо калыкет тышеч кайыза. Мый Авраамлан, Исааклан да Иаковлан ”тендан ончыкылык тукымланда мландым пуэм” манын товатленам. Тиде мландышке кайыза.2 Мый тыйын ончычет Суксем колтем да хананей, аморрей, хеттей, ферезей, [гергесей,] евей да иевусей-влакым поктен колтем.3 Тендам тудо шӧр да мӱй йогыман мландышке намиен пурта. Но ӱскырт улмыланда кӧра тендам корнышто пытараш огыл манын, Мый Шкеже тендан дене пырля ом кай».4 Тыге пеҥгыдын каласымым колын, калык ойгыраш тӱҥалын, да нигӧат шке ӱмбакше сӧрастарыше ӱзгаржым чиен огыл.5 Вет Господь Моисейлан тыге ойлен: «Израиль эрге-влаклан каласе: ”Те ӱскырт калык улыда. Мый тендан дене каем гын, ик татыштак тендам пытарем. Ӱмбачда сӧрастарыше ӱзгардам кудашса. Мый ончалам, мом тендан дене ышташ”».6 Израиль калык шке сӧрастарыше ӱзгаржым Хорив курык воктене кудашын.
7 Моисей гын омашым стан деч ӧрдыжеш, тудын деч умбакырак шогалтен. Омашым тудо «Юмо дене вашлийме омаш» манын лӱмден. Господь деч иктаж-мом йодаш шонышо кажне еҥ стан деч ӧрдыжтӧ шогышо тиде омаш дек толын.8 Кажне гана, кунам Моисей Юмо дене вашлийме омаш деке каен, уло калык кынелын. Шке омашышкышт пурымо вер воктеке шогалын, нуно Моисейым тиде омашыш пурымешкыже ончен шогеныт.9 Моисейын омашыш пурымекыже, кӱшыч пыл меҥге волен да омашыш пурымо вер деке шогалын – Господь Моисей дене кутырен.10 Омашыш пурымо вер дене шогалше пыл меҥгым ужын, уло калык кынелын, да кажныже шке омашышкыже пурымо вер дене кумык возын.11 Айдемын шке йолташыж дене мутланыме семын Господь Моисей дене шинчаваш кутырен. Вара Моисей станыш пӧртылын. А тудын полышкалыше рвезыже Иисус, Нав эрге, омаш деч нигуш кораҥын огыл.
12 Моисей Господьлан каласен: «Тый мыланем тиде калыкым наҥгае манын ойлет. ”Мый тыйым сайын палем, тый Мыйын шинчаштем поро кумылым сулен налынат” манын каласенат гынат, мый денем кӧм колтет – тидым почын отыл.13 Тыйын шинчаштет поро кумылым суленам гын, сӧрвален йодам: ончыкто мылам шке корнетым. Тунам мый Тыйым пален налам да ончыкшымат Тыйын шинчаштет поро кумылым сулен налам ыле. Шарналте, нине еҥ-влак Тыйын калыкет улыт».14 «Мый Шке [тыйын ончычет] каем, – каласен Господь, – да тыйым тымык верыш пуртем».15 Моисей Тудлан каласен: «Тый Шкеже мемнан дене от кай гын, тугеже мемнамат тышечын ит лук.16 Мый да Тыйын тиде калыкет Тыйын шинчаштет поро кумылым сулен налмым ме кушеч пален кертына? Тыйын мемнан дене пырля кайымет гыч огыл мо? Тунам мый да Тыйын калыкет мландымбалне улшо чыла моло калык деч ойыртемалташ тӱҥалына!»17 Господь Моисейлан каласен: «Мом йодметым Мый шуктем, вет тый Мыйын шинчаштем поро кумылым сулен налынат, да Мый тыйым сайын палем».
18 «Мылам шке чапетым ончыкто», – йодын Моисей.19 Господь вашештен: «Мый тыйын ончычет шкемын уло кӱдыратлыкем колтем да ончылнет Господь лӱмым йоҥгалтарем. Кӧлан Мый порылыкым ончыктынем – ончыктем, кӧм чаманынем – тудым чаманем».20 Вара Тудо каласен: «Мыйын чурием тылат ужаш ок лий, вет кӧ Мыйым ужеш, тудо айдеме илыше кодын ок керт».21 Господь каласен: «Теве Мыйын воктенем вер уло, тиде кӱ курык ӱмбалан шогал.22 Кунам Мыйын чапем эртен каяш тӱҥалеш, Мый тыйым кӱ курыкысо кугу шелшыш вераҥдем да, эртен кайымешкем, тыйым шке кидкопам дене леведам.23 Кунам Мый кидкопамым кораҥдем, тый Мыйым шеҥгечем ужат, а Мыйын чурием [тылат] ужаш ок лий».
Глава 33