Выбрать язык
Книги Ветхого Завета
Книги Нового Завета
с русским текстом1 Господьын Израиль еҥ-влакым Египет гыч лукмыжым, Моисейлан да шке Израиль калыкшылан мом ыштымыжым Иофор – мадиам калыкын иерейже, Моисейын оньыжо – чыла колын.2 Тунам тудо шке Сепфора ӱдыржым, Моисейын ватыжым – тудым Моисей ачажын суртышкыжо колтен улмаш, –3 тыгак тудын кок эргыжым пырля налын да Моисей деке тарванен. Ик эргыжын лӱмжӧ Гирсам лийын, вет Моисей ойлен: «Мый йот элышке толшо улам».4 Весыжын лӱмжӧ – Елиезер,*а вет, [кузе ойлен Моисей,] – «Ачамын Юмыжо мыланем полшен да мыйым фараонын кердыж деч арален коден».
5 Иофор оньыжо Моисейын ватыже да кок эргыж дене пырля веҥыж деке ир мландыш толын. Моисейын станже Юмын курык воктене шоген.6 Иофор Моисейлан каласаш колтен: «Мый, тыйын Иофор оньыч, тый декет мием, мый денем пырля ватет да кок эргыч улыт».7 Моисей оньыжым вашлияш лектын, вуйжым савен да шупшалын. Ваш-ваш саламлалтме деч вара нуно омашыш пуреныт.
8 Мом Господь Израиль верч фараон да египет еҥ-влак дене ыштен, нунын корныштышт могай нелылык лийын да кузе Господь нуным [фараон ден египет еҥ-влакын кидышт деч] утарен коден, тидым Моисей оньыжлан чыла каласкален.9 Израильым египет еҥ-влакын [да фараонын] кид йымачышт утарыме годым Господьын ыштыме чыла поро пашажлан Иофор чот йывыртен.10 Иофор каласен: «Тендам Египет да фараон кид йымач утарыше, тиде калыкым египет еҥ-влакын кучемже гыч утарыше Господь моктымо лийже!11 Ынде мый пален нальым: Господь чыла моло юмо деч кугу, вет Египетын Израиль калыкым шыгыремдыме жапыште Господь тыгай пашам ыштен».12 Вара Иофор, Моисейын оньыжо, Юмылан йӱлалтен пуымо надыр ден моло надырым конден. Юмын ончылно Моисейын оньыж дене пырля киндым кочкаш Аарон да Израильын кугуракышт толыныт.
13 Вес кечынже Моисей калыкын ӱчашымашым лукшо тӱрлӧ йодышыштым ончаш шинчын, тудын ончылно калык эр гыч тӱҥалын кас марте шоген.14 Моисейын калык дене мом ыштымыжым ужын, [Иофор] оньыжо каласен: «Мом тый калык дене ыштылат? Молан тый шкетын шинчет, а уло калык тыйын ончылнет эр гыч кас марте шога?»15 Моисей оньыжлан каласен: «Калык мый декем Юмын ой-каҥашыжым йодаш толеш.16 Кунам нунын иктаж-могай йодышышт лектеш, нуно мый декем толыт. Мый нунын коклаште ӱчашымашым лукшо йодышыштлан вашмутым пуэм, Юмын законжо ден кӱштымашыжым увертарем».
17 Тидлан Моисейын оньыжо каласен: «Тый йоҥылыш ыштет.18 Тыге тый шкендымат, воктенет шогышо калыкымат улныктарет. Тиде сомыл тыланет утыждене неле, тый тудым шкетын шуктен от керт.19 Колышт мыйын мутем, мый тыланет каҥашым пуэм, тунам Юмо тый денет пырля лиеш: тый Юмын ончылно уло калык деч ойлышо еҥ лий да нунын йодышыштым Юмылан ончаш пу.20 Тый нуным [Юмын] законжо ден кӱштымашыжлан туныкто, нунылан могай корно дене каяш да мом ышташ кӱлмым ончыкто.21 Уло калык кокла гыч уста, Юмо деч лӱдшӧ, ӱшанле, шолагай оксам йӧратыдыме еҥ-влакым ойырен нал да нуным тӱжемвуй, шӱдывуй, витльывуй да лувуйлан шогалте, [тыгак возкалышат лийже].22 Тек нуно калыкын чыла йодышыжым ончен шогат да кугурак паша нерген тылат увертарат, а чыла изи йодышым шкеак рашемдышт. Тыге пырля пашам ыштеда гын, тыланетат куштылгырак лиеш.23 Тыге ыштет гын да Юмат тыланет тыгак ышташ кӱшта гын, тый чыла чытен лектат, калыкат мӧҥгышкыжӧ тыныс дене пӧртылеш».
24 Моисей оньыжым колыштын да чыла тудын ойлымыж семынак ыштен.25 Моисей Израиль калык кокла гыч уста еҥ-влакым ойырен налын да нуным калык вуйлатышылан – тӱжемвуй, шӱдывуй, витльывуй да лувуйлан, [тыгак возкалышылан] – шогалтен.26 Нуно калыкын чыла йодышыжым ончен шогеныт, кугурак паша нерген Моисейлан увертареныт, а чыла изи йодышым шкеак рашемденыт.
27 Моисей оньыжым ужатен колтен, тудыжо шке мландышкыже каен.
*а 18:4 «Елиезер» лӱм ’мыйын Юмем мыланем полша’ манмым ончыкта.
Глава 18