Выбрать язык
Книги Ветхого Завета
Книги Нового Завета
с русским текстом1 Уло Израиль калык Господьын кӱштымыжӧ почеш Син ир мланде гыч шке корныжым умбакыже шуен да варажым стан дене Рефидимеш шогалын. Тушто калыклан йӱаш вӱд лийын огыл.2 Нуно Моисейлан тыге ӧпкелен ойленыт: «Мыланна йӱаш вӱдым пуыза». Моисей нунылан каласен: «Молан те мыйым шылталеда? Молан Господьым тергеда?»3 Калыкын пеш чот йӱмыжӧ шуын, да тудо Моисейлан ӧпкелен ойлен: «Молан тый мемнам Египет гыч тышке конденат? Мыланна, йоча ден вольыкланна йӱмӧ шумо деч колаш мо?»4 Моисей Господьым кумал йодын: «Тиде калык дене мылам мом ышташ? Вашке нуно мыйым кӱм кышкен пуштыт».5 Господь Моисейлан каласен: «Тый калык деч ончыч кай, пырля Израильын икмыняр кугуракшым нал, кидыштет Нил эҥерым перыме пондет лийже.6 Мый тыйын ончылнет Хоривыште кӱ курык ӱмбалне шогаш тӱҥалам, а тый курыкым перет – тушечын вӱд йогаш тӱҥалеш, да калык вӱдым йӱын кертеш». Израильын кугуракше-влак ончылно Моисей тыгак ыштен.
7 Израиль эрге-влакын ӧпкештлан кӧра Моисей тиде верым Масса ден Мерива*а манын лӱмден. Вет нуно Господьым тыге ойлен тергеныт: «Мемнан коклаште Господь уло але уке?»
8 Рефидимыш амалик-влак толыныт да израильтян-влак дене кредалаш тӱҥалыныт.9 Моисей Иисуслан*б каласен: «[Виян] пӧръеҥ-влакым ойырен нал да амалик-влак дене кредалаш кай. А мый эрла кӱкшака ӱмбаке шогалам, кидыштем Юмын пондыжо лиеш».10 Иисус Моисейын ойлымыж семынак ыштен да амалик-влак дене кредалаш [каен], а Моисей, Аарон да Хур лӱман еҥ кӱкшака ӱмбаке кӱзеныт.11 Кунам Моисейын кидше нӧлталме лийын – Израиль сеҥен, а кунам кидшым волтен – Амалик сеҥен.12 Моисейын кидше ноен. Тунам Аарон ден Хур тудлан шинчашыже кӱм пыштеныт, тыгак кидшым нӧлтал кученыт: иктыже – ик могырым, весыже – вес могырым. Тыге Моисейын кидше кече шичмешке нӧлталме лийын.13 Иисус Амаликым да тудын калыкшым керде дене кырен шалатен.
14 Господь Моисейлан каласен: «Мондаш огыл манын, тидым книгаш возо да Иисуслан каласе: ”Мый Амалик нерген шарнымашым кава йымач йӧршынлан ӱштыл шуэм”».15 Моисей [Господьлан] жертвенникым ыштен да тудлан лӱмым пуэн: Иегова-нисси.*в16 Вет тудо, кидшым Господьын престолжо деке шуялтен,*г тыге каласен: «Господьын амалик-влак ваштареш кредалмыже тукым гыч тукымыш шуйна».
*а 17:7 «Масса ден Мерива» ’тергымаш ден ӧпкелымаш’ манмым ончыкта.
*б 17:9 Иисус – тыште: Моисей илыме жапысе сарзе вуйлатыше.
*в 17:15 «Иегова-нисси» (але «Яхве-нисси») лӱм еврей йылмыште ’Господь – мыйын тистем’ манмым ончыкта.
*г 17:16 «Кидшым Господьын престолжо деке шуялтен» – еврей текстыште тыште мо нерген возымо, раш пале огыл. Нине мут-влакым тыгеат кусараш лиеш: «кидшым Господьын тисте ӱмбакше пыштен».
Глава 17