Выбрать язык
Книги Ветхого Завета
Книги Нового Завета
с русским текстом1 Египет мланде гыч лекмышт деч вара лач кок тылзе эртымеке, израиль эрге-влак Синай ир мландыш толын шуыныт.2 Рефидим гыч тарванымеке, нуно Синай ир мландыш толыныт улмаш да тушан, курык ваштареш, станыштым шогалтеныт.3 Моисей Юмо деке [курыкыш] кӱзен. Господь тудлан курык гыч каласен: «Иаков тукымлан, Израиль эрге-влаклан увертаре:4 мом Мый египет еҥ-влак дене ыштенам, кузе тендам арыслангайык шулдыреш наҥгайыме семын коштыктенам да Шке декем конденам – те чыла ужында.5 Мыйын йӱкем колышташ да Мыйын ойпидышем шуктен шогаш тӱҥалыда гын, чыла калык кокла гыч те Мыйын калыкем лийыда. Пӱтынь мланде – Мыйын,6 а те иерей кугыжаныш, Мыйын святой калыкем лийыда. Теве нине шомакым израиль эрге-влаклан каласе».
7 Моисей пӧртылын, калыкын кугуракше-влакым поген да Господьын ойлаш кӱштымӧ чыла шомакшым нунылан каласен.8 Уло калык ик йӱкын вашештен: «Господьын чыла кӱштымыжым шуктена, [мутшым колыштына]». Калыкын вашмутшым Моисей Господьлан каласен.
9 Господь Моисейлан каласен: «Мыйын тый денет кутырымем калык колжо да тыланет ӱшанен шогыжо манын, Мый тый декет нугыдо пыл кӧргыштӧ толам». Калыкын мом каласымыжым Моисей Господьлан увертарен.10 Господь тудлан каласен: «Калык деке кае [да тудлан ойло], таче да эрла тудым святитле, тек нуно вургемыштым мушкыт.11 Кумшо кечылан ямде лийышт: вет ты кечын пӱтынь калык ончылно Синай курыкыш Господь вола.12 Курык йыр чекым ыште да калыкым шижтаре: курыкыш ынышт кӱзӧ, курыкйол деке ынышт тӱкнӧ. Кеч-кӧ, курык дек тӱкнышӧ, пуштмо лийшаш.13 Но тыгай еҥым кид дене тӱкыман огыл, тек тудым кӱм кышкен але пикш дене лӱен пуштыт. Тудо кеч вольык, янлык але айдеме лийже – илыше ынже код. Кунам [курык деч пыл кораҥеш да] кужун шоктышо пуч йӱк йоҥгалтеш, тунам веле еҥ-влак курыкышко кӱзен кертыт».
14 Моисей курык гыч калык деке волен, нуным святитлен. Нунышт вургемыштым мушкыныт.15 Калыклан каласен: «Кумшо кечылан ямде лийза. Ватыда дек ида тӱкнӧ».
16 Кумшо кечын, эр шумеке, кӱдырчӧ кӱдырташ да волгенче волгалтараш тӱҥалын. [Синай] курык ӱмбалне нугыдо пыл ора шоген да кугун пуалтыме пуч йӱк шоктен. Станыште улшо калык чытыраш тӱҥалын.17 Моисей калыкым тушеч Юмо дене вашлияш вӱден наҥгаен, да нуно курыкйол воктеке шогалыныт.18 Пӱтынь Синай курык шикшын, вет Господь тушко тул ора коклаште волен. Курык деч шикш коҥга гыч лекмыла кӱзен, да уло курык чот чытырен.19 Пуч йӱк утларак да утларак вияҥын. Моисей ойлен, а Юмо тудлан кӱдырчын йӱкшӧ дене вашештен.20 Господь Синай курык вуйыш волен да тушко Моисейым ӱжын. Тудыжо курык вуйыш кӱзен.
21 Господь Моисейлан каласен: «Калык деке воло да шижтаре: Господьым ужаш манын, чекым ынышт вончо. Тыге ыштат гын, шукын пытат.22 Господь [Юмо] деке лишемше иерей-влакат, Господь нуным ынже пытаре манын, шкеныштым святитлышаш улыт».23 Моисей Господьлан каласен: «Калык Синай курыкыш кӱзен ок керт, вет Тый мыланна шижтаренат: ”Курык йыр чекым ыште да тудо святой манын увертаре”».24 Господь тудлан каласен: «Тый кае, воло, а вара Аарон дене пырля кӱзӧ. А иерей-влак да калык, Мый декем кӱзаш манын, чекым ынышт вончо, уке гын Мый нуным пытарем».25 Моисей калык деке волен да тидым увертарен.
Глава 19