Выбрать язык
Книги Ветхого Завета
Книги Нового Завета
с русским текстом1 Тōнт ханисьтахтын хумит Ӣсус ляпан рōвсыт ос китыглахтасыт: ”Хотъют сяр янгыг Тōрум йильпи нотт паты?”2 Ӣсус мāнь ня̄врам ляпан вōвыстэ, тāн халанылн таве ӯнттыстэ,3 ос лāвыс: ”Мāк нāнанн ты лāвēгум: нāн Тōрум нупыл ё̄ӈхуӈкве ат ке патэгы̄н ос ня̄врам хурипаг ат ке ēмтэгы̄н, Тōрум йильпи нотын ат сялтэгы̄н.4 Таимāгыс, хотъют таквинāтэ ёлымты, ты ня̄врам хольт, таи сяр янгыг ōлы тах Тōрум йильпи нотт;5 ос хотъют Ам намум мāгыс акв тамле ня̄врам сымн вы̄г, таи Āнум ос сымын та вы̄гтэ.6 Ос хотъют Āнумн ня̄врам хольт агтнэ акв хōтпа карек вāрмалин хуйтытэ, тамле хōтпан сыплувēн колас сакватан āхвтас нэ̄гсалаӈкве э̄ри ос ся̄рысь вит милын уйтуптаӈкве э̄ри.7 Э̄лумхōлас карекн хуйтнэ мāгыс тыстыл мирн та паты. Тох та ēмтуӈкве паты тах. Ос тыстыл таин та паты, хотъют мāгыс тох ēмталāлы!8 Наӈ ань кāтын манос лāглын карек вāрмаль нупыл хуйтавен ке, тōнт таин хот-саграпēлын ос наӈтинāныл э̄л-вуськасэ̄лын: ёмаснув кāттал манос лāгылтал акваг э̄лаль ōлуӈкве, ман кит кāт кит лāгыл ōньсим нāй кӣвырн акваг та воськасым.9 Ос наӈти самын карек вāрмаль нупыл хартавен ке, хот-манумтэ̄лын ос наӈтинāныл э̄л-вуськасэ̄лын: ёмаснув сампалыӈыг акваг э̄лаль ōлуӈкве, манос кит сам ōньсим турман мā нāйн воськасым.10 Ӯргалахтэ̄н! Нэ̄мхотъют ты мāнь хōтпатныл лавыл ул нэ̄гылттэ̄н. Ам нāнанн ты лāвēгум: нуми тōрумт тāн Ангеланыл акваг Ам Āсюм вильтэ кāсалыяныл”.
11 ”Э̄лумхōлас Пы̄г хот-тыпылтахтум утыт кинсуӈкве ос вēстуӈкве ёхтыс.12 Нāн хумус номсэгы̄н? Хотъют яныгсāт пāля ōньсяс ке, ос акватэ хот-тыпыс ке, ос тав яныгсāт нупыл онтолов пāлянэ урыт оссувлануванэ манос тыпум пāлятэ кинсуӈкве мины?13 Ос тасир ке ēмты – пāлятэ хōнтытэ, мāк нāнанн ты лāвēгум: тōнт тав акв пāлятэ мāгыс усьпылнэ̄г ся̄гты, ман хот ат тыпылтам яныгсāт нупыл онтолов пāлянэ урыл.14 Танай, нāн Тōрум Āсин ат таӈхи, ты ня̄врамытныл сяр нэ̄мхотъют ул вос хот-порсы”.
15 ”Наӈ нупылн наӈ Тōрумн агтнэ юртын карек ке вāри, тāве нэ̄нти халынт ōлыман ёл-пōилттэлын: ос тав наӈынн хӯнтамлы ке, тōнт тав сōль наӈ юртын.16 Ос тав наӈ лāтӈанын ат ке хӯнтамлы, ос аква ман кит хōтпа ёт вуēн, ‘кит ман ос хӯрум хōтпа лāвум лāтӈыл кāсыӈ вāрмаль урыл мāк вос потыртавес’.17 Ос тāнанылн ат ке хӯнтамлы тах, тōнт ялпыӈ колт лāвен; ос ялпыӈ кол кӣвырт ат ке хӯнтамлы, тōнт таве Тōрум ат вāнэ ос пōт атнэ хум хурипаг вос ōлы.18 Мāк нāнанн ты лāвēгум: мāныр нāн ты мāт нэ̄гылы̄н, таи пуссын тōрумт ос нэ̄гим та паты; ос мāныр ты мāт хот-тāратэгы̄н, таи пуссын ос тōрумт хот-тāратаве тах.19 Ос мāк нāнанн ты лāвēгум: ты мāт нāнанныл кит хōтпа ке кāсасēг матыр утыт вōвуӈкве, Ам нуми тōрумт ōлнэ Āсюмныл тāнанылн ёхты тах.20 Хōт китыг ман хӯрум Ам намум мāгыс акван атхатым ōлэ̄гыт, тот Ам ос тāн халанылт ты ōлэ̄гум”.
21 Тōнт Пēтыр Тав пōхатэн рōвыс ос лāвыс: ”Кӯсяй! Манах сё̄с Тōрумн агтнэ юртум ам нупылум вāрнэ карек āнумн тāратаӈкве э̄ри? Сāт сё̄с ман?”22 Ӣсус тавēн лāвыс: ”Ат лāвēгум: сāт мус, ос сāт сё̄с сāтлов мус.23 Таимāгыс Тōрум йильпи нот тамле хōн хурипа, хотъют такви мēтхумиянэ ёт ловиньтахтуӈкве тахмаяс.24 Хунь тав ловиньтахтуӈкве ōвылтахтас, тав палтэ акв хōтпа тотвес, таи тавēн лов сōтыра талант*а āрумтаӈы̄г ōлыс.25 Ос таи тасāвит ат ōньсяс, тōнт хōн таквинāтэ, нэ̄тэ, тав ня̄враманэ, пуссын мāныр пормас ōньсяс тыналаӈкве лāвсанэ, ос āрнта ойтуӈкве.26 Тōнт та мēтхум тав э̄лы-пāлын мāн ёл-вуськасахтыс ос лāвыглалыс: ‘Кӯсяй! Мось āнумныл вēритэн, ам пуссын āрнтам тах ойтылум’.27 Хōнын такви мēтхум сāлиг ēмтыс, таимāгыс таве тāратастэ ос āрумтанэ хот та тāратасанэ.28 Ос та мēтхум кон-квāлмет такви акв руматэ кāсалас, таи тавēн яныгсāт динарий сāвитпа āрнта олн ōньсяс. Та руматэ пувумтастэ ос турен пухвтым лāвыглас: ‘Āрнта олнын āнумн ювле-маелн’.29 Тōнт тав руматэ тав э̄лы-пāлын мāн рагатас, таве пōйксяӈкве патыстэ ос лāвыс: ‘Мось āнум вēритэлы̄н, ам пуссын олнын ойтылум тах’.30 Ос та хум тасир ат таӈхыс, минас ос āрнтатэ ойтнэтэ мус руматэ каснаколн та ӯнттыстэ.31 Ты вāрмаль сунсум тав руманэ сака хот рутальтахтасыт. Тāн хōнаныл палт ёхтысыт, ты урыл пуссын потыртасаныл.32 Тōнт хōн таве вōвыстэ ос тавēн лāвыс: ‘Кантыӈ мēтхум! Пуссын āрнтан ам наӈын тāратаслум, наӈ āнум ты урыл пōйксын.33 Наӈын ман наӈти руман ос сāлитаӈкве ат рōвыс, хумус ам наӈын сāлитыслум?’34 Ос сака хот-кантмим хōн таве э̄лумхōлас ратнэ хумитн та мистэ, āрнта ōлнэ пуссын ойтнэтэ мус.35 Ам Тōрум Āсюм нāн ётын ос тах тох вāри, нāн нāнти сыманынныл Тōрумн агтнэ юртанын карек хот ат ке тāратылын”.
*а 24 18:24 талант – таи хōт сōтыр динарий. Ос акв динарий – тай хōтал ōлнэ олн.
Глава 18