Выбрать язык
Книги Ветхого Завета
Книги Нового Завета
с русским текстом1 Хōт хōтал минам юи-пāлт Ӣсус Пēтыр ос кит ягпыгыг Яков ос Иоан ёт-висанэ, ос тувыл карыс урын танкеныл нōх-хāхмыстанэ.2 Тāн э̄лы-пāланылт Тав мōтхурипаг ēмтапас: Тав вильтэ аквтупыл хōтал хольт вольгуӈкве патыс, Тав маснутанэ пос хурипаг я̄ӈкыг ēмтапасыт.3 Тыт ань тāн палтаныл Моисей ос Ӣлия, Ӣсус ёт потрамим ты нэ̄глысы̄г.4 Тōнт Пēтыр Ӣсус нупыл лāвыс: ”Кӯсяй! Мāнавн тыт такем ёмас ōлуӈкве. Таӈхēгын ке, тыт хӯрум колпāл вāрēв: аква Наӈ мāгсылын, аква – Моисейн ос аква – Ӣлиян”.5 Хунь тав потыртас, войкан тулын тāн лап-тотвēсыт. Тул халныл турсуй суйтыс: ”Ты Ам я̄тил Пы̄гум, Ам сымум э̄рнэ Пы̄гквем! Тавēн хӯнтлэ̄н”.6 Тыи хӯлым, ханисьтахтын хумит хоми-вуськасахтасыт, сяр хот-рохтысыт.7 Ос Ӣсус тāн ляпанылн минас, тāн палтаныл карсмахтас ос лāвыс: ”Нōх-лю̄лēн, ул пилэ̄н”.8 Саманылныл нōӈхаль āӈкватасыт, ос Ӣсус коны-пāл нэ̄мхотъют атпыл кāсаласыт.9 Урныл ёл-вāглуманыл порат Ӣсусн лāввēсыт: ”Нэ̄мхотъютн ул потыртэ̄н, мāнарыл нāн тыт нэ̄глыглāлвесын, та пора мус ул потыртэ̄н, хунь тах Э̄лумхōлас Пы̄г сорме юи-пāлт тах нōх-ялты”.10 Ханисьтахтын хумиянэ̄н Тав китыглавес: ”Манрыг сāккон тотнэ хумит лāвēгыт, э̄рттэм сāртын Ӣлиян э̄ри ёхтуӈкве?”11 Ӣсус тāнанылн ю̄вле-лāвыс: ”Сōль, Ӣлиян э̄ри сāртын ёхтуӈкве ос пуссын вāрмале сё̄питаӈкве.12 Ос Ам нāнāн лāвēгум, Ӣлия ань ёхтыс. Ос тāн таве ат ханьсисāныл, тав ётэ хумус тахсыт, тох та вāрсыт. Тасир тāнаны̄лныл Э̄лумхолас Пы̄г ос савалы тах”.13 Тōнт ханисьтахтын хумит торгамтасаныл, Тав витн тӯлнэ хум Иоан урыл потыртас.
14 Тāн мир палт ювле миныманылт, Ӣсус пōхат акв э̄лумхōлас йис. Тав э̄лы-пāлэ̄н сāнспуӈкаге тармыл воськасахтас,15 лāвыс: ”Кӯсяй! Ам пы̄гум сāлитэ̄лын; тав лунатикыг ēмтум ос сака савалы, вāтихал нāйин ос витын лайхаталы.16 Ам таве Наӈ ханисьтахтын хумиянын палт тотыгласлум кос, ос тāн таве пусмалтаӈкве ат вēрмысāныл”.17 Ӣсус ювле-лāвыс: ”А-на-на, агттāл ос хот-сакум мāхум! Хоты мус Āнумн нāн ётын ōлуӈкве ос нāнан вēритаӈкве? Таве Ам палтум тотэ̄лын”.18 Ӣсус кульн пōхан-минуӈкве лāвыс. Куль тавēныл кон та минас, ос та сё̄ст пы̄грись тāра та пусмыс.19 Тувыл ханисьтахтын хумиянэ, хунь Ӣсус ёт тāнкеныл хультсыт, Таве китыгласаныл: ”Манрыг мāн таве кон-ня̄влуӈкве ат вēрмыслув?”20 Ӣсус тāнāныл лāвыс: ”Ат агтнэ̄н мāгыс. Сōль Ам нāнāн ты лāвēгум: нāн агтылын кортница сам янытыг ōлнув ке, тōнт ты ур нупыл лāвегы̄н: ‘тыгыл тувле ӯнтэн’, тав тах тув ӯнтхāты. Ос нэ̄матыр, матыр нāн вāруӈкве ат вēрмегы̄н ат та ōлы.21 Тамле куль пōйкилыл ос поститахтын вāрмалил туп кон-ня̄влуӈкве рōви”.
22 Галилея мāт ōлманыл порат Ӣсус тāнанылн лāвыс: ”Э̄лумхōлас Пы̄г мāхум кāтын миве тах.23 Тувыл сяма алаве тах, ос хӯрмит хōталэт нōх-ялты”. Тāн хот рутальтахтасыт.
24 Тāн хунь Капернаумн ёхтысыт, Пēтыр палт ялпыӈ кол мāгыс пōт атнэ хумит ёхтысыт ос лāвсыт: ”Нāн Ханисьтан хумын ос нэ̄матыр пōт ялпыӈ кōл мāгыс ат ойты?”25 Тав лāвыс: ”Мы̄г”. Пēтыр кол кивырн сялтмет ос иӈ нэ̄матр ат алымас лāвуӈкве, Ӣсусн та китапавес: ”Симон, хотъютыл ты мир хōныт пōт олн атэ̄гыт, тāнти ня̄враманылныл манос мōт мāхумныл?”26 Пēтыр Тавēн лāвыс: ”Мōт мāхумныл”. Ӣсус тавēн лāвыс: ”Тасир ня̄врамыт пōтныл лыпасит.27 Ос тāнаныл ат саватан мāгыс, ся̄рысьн минэн, нясын витын воськасэ̄лын. Ōвыл нясын хōйнэ хӯл вуēлын, сӯпе палыг хартэ̄лын. Тот ся̄лыг олн хōнтэ̄гын тах. Та олн вуēлын ос Āнумныл ос наӈтинāнныл таи маēлын”.
Глава 17