Выбрать язык
Книги Ветхого Завета
Книги Нового Завета
с русским текстом1 Хунь Ӣсус Такви потре потыртастэ, Тав Галилея мāныл Иордан я̄ та палт ōлнэ Юдея мāн минас.2 Тав юи-пāлэт сāв мир минасыт, ос Тав тāнаныл пусмалтасанэ.3 Тав палтэ фарисейт ёхтысыт, ос Таве āрталан мāгыс китыгласаныл: ”Кāсыӈ матыр вāрмаль мāгыс сāккон сирыл хум нэ̄тэ ёт китты̄г минуӈкве вēрми?”4 Ӣсус тāнанылн ювле-лāвыс: ”Нāн ман ат ловиньталсын, Тōрум сāртын хум ос нэ̄ вāрыс,5 ос лāвыс: ‘Таимāгыс хум āсяге-ся̄няге та хультуптыяге ос э̄кватэ̄нт аквъёт ōлуӈкве патэ̄г. Тэ̄н китыгыг акв алпи-харыг ты ēмтэ̄г’?6 Тэ̄н воссыг кит хōтпаг ат ōлэ̄г, тэ̄н акв хōтпаг ēмтэ̄г. Ос мāныр Тōрум акван ōлтыстэ, э̄лумхōласн китты̄г маныгтаӈкве ат рōви”.7 Тāн Тавēн лāвēгыт: ”Ос хумус Моисей май лāвыглас китты̄г миннэ нэ̄пак хансуӈкве ос тувыл хумн нэ̄тэ ёт киттыг минуӈкве?”8 Ӣсус тāнанылн лāвыс: ”Моисей, нāн кантыӈ сыманы̄н мāгыс, э̄кванын ёт китты̄г минуӈкве нāнан тāратасанэ. Ос сāртын тох ат ōлыс.9 Ос Ам нāнанн ты лāвēгум: хотъют нэ̄тэ мори мōт хум ёт хайтнэ вāрмаль ат ке ōньси, тōнт та хумн китты̄г минуӈкве нэ̄тэ ёт ат рōви ос тувыл хум йильпииг мōт нэ̄ тоты ке, – карекын та паты. Ос хумитэ ёт китты̄г минам э̄ква нэ̄г тотытэ ке, тыи ос карекыг ōлы”.10 ”Хум хōтпан тох ке нэ̄ тотнэ вāрмаль нупыл сунсуӈкве э̄ри, тасир тавēн нэ̄ тотуӈкве сяр ат э̄ри!” – Тавēн ханисьтахтын хумиянэ лāвсыт.11 ”Кāсыӈ хумн нэ̄тал ōлуӈкве ат вēрми, туп таи, хотъют Тōрумн ё̄рыл майвес”, – Тав тāнанылн ювле-лāвыс. –12 ”Тамле хōтпат ōлэ̄гыт, хотъютыт ат вēрмегыт нэ̄ тотуӈкве, тāн тамлег самын патсыт. Мōтаныт евнухыг э̄лумхōласн вāрвесыт, ос тамле хōтпат ōлэ̄гыт, хотъютыт Тōрум йильпи нот мāгыс нэ̄ ат тотэ̄гыт. Таи хотъют сымын виӈкве вēрми, вос выгтэ!”
13 Ӣсус палт ня̄врамыт тотвēсыт, Тав тāн палтаныл кāтаге вос пины ос пōйкси. Ос ханисьтахтын хумиянэ тāнаныл ля̄выльтасаныл.14 ”Ня̄врамыт Ам палтум вос ёхталэ̄гыт, тāнаныл ул торастэ̄н! Тōрум йильпи нот ня̄врамыт хурипаг ты ōлы!” – Ӣсус тāнанылн лāвыс.15 Ос кāтаге тāн пуӈканылн пиныгласаге, тувыл Тав та минас.
16 Аквматнакт Тав палтэ э̄лумхōлас ёхтыс ос китыглахтас: ”Ханисьтан ёмас хум, āнумн мāныр ёмас вāруӈкве э̄ри, акваг э̄лаль ōлнэм мāгыс?”17 ”Мāнрыг наӈ Āнум ёмас урыл китыглылын? Акв Тōрум, Тав туп ёмас”, – Ӣсус тавēн ювле-лāвыс. ”Ос таӈхēгын ке акваг э̄лаль ōлуӈкве, Тōрум сāкконыт сирыл ōлэн”.18 Хум Тавēн лāвыс: ”Манхурипат?” Ӣсус лāвыс: ”Нэ̄мхотъют ул алэн, нэ̄гы̄г-хумы̄г халн ул сялтэн, ул тӯлмантэн, ул уркен,19 āсин ос ся̄нин янытлэ̄гын, ос наӈтинан хольт ляпа хōтпан э̄руптэ̄лын”.20 Мāньлат хум Тавēн лāвыс: ”Пуссын тыит сирыл ам мāнь тāгыл ōлсум; мāныр āнумн иӈ ат тōвылхаты?”21 Ӣсус тавēн лāвыс: ”Сяр вēськат хōтпаг таӈхēгын ке ōлуӈкве, минэн ос мāныр ōньсēгын, пуссын тыналэ̄лын. Тувыл нуса мирын олнанын лакква-уртэ̄лын. Тōнт тах наӈын тōрумт сёл ēмты. Тувыл ёхтэн ос Ам юи-пāлумт йиен”.
22 Тамле потыр хулым, хум кāсталы̄г пōхан ё̄мантас, тав яныг ōлтул ōньсис.23 Ӣсус Такви ханисьтахтын хумиянэ̄н лāвыс: ”Сōль нāнанн ты лāвēгум: сёлыӈ хōтпан тāрвит Тōрум йильпи нотн сялтуӈкве.24 Ос нāнанн лāвēгум: верблюдын ю̄нтуп ас тāра кӯпнитнуве сялтуӈкве, ман сёлыӈ хōтпан Тōрум йильпи нотн сялтуӈкве”.25 Ты урыл хӯлым, ханисьтахтын хумиянэ сака ōсятахтыгласыт ос лāвсыт: ”Ос хотъют тах вēстхатуӈкве вēрми?”26 Ос Ӣсус тāн нупланыл сунсым тāнанылн лāвыс: ”Э̄лумхōласыт тох ат вēрмегыт, Тōрум тай пуссын вēрми”.
27 Тōнт Пēтыр Тавēн лāвыс: ”Мāн, танай вāрмалянув пуссын оссувласанув ос Наӈ юй-пāлынт та йисув. Мāнавн тувыл тах ос мāныр паты?”28 Ӣсус тāнанылн лāвыс: ”Мāк нāнанн ты лāвēгум: нāн, хотъютыт Ам юй-пāлумт йисы̄н, йильпи Тōрум мāт тах, хунь Э̄лумхōлас Пы̄г Такви пос хōн-пасанэ̄н ӯнты, нāн ос китхуйплов хōн-пасант ӯнлэгы̄н тах ос Израиль китхуйплов рӯт мир сутытэгы̄н тах.29 Ос кāсыӈ хōтпа, хотъют коланыл, ягпыганыл, ягāгияныл, āсяныл, ся̄няныл, ня̄враманыл, ман тэ̄пкананыл хот-хультупты тах Ам намум мāгыс, тав яныгсāт сёс сāвнув вы̄г тах ос акваг э̄лаль ōлуӈкве тах паты.30 Сāв сāртын ōлум мāхум юи-ōвлыг патэ̄гыт тах. Ос сāв юи-ōвыл мāхум сяр ōвылы̄г патэ̄гыт тах”.
Глава 19