Выбрать язык
Книги Ветхого Завета
Книги Нового Завета
с русским текстом1 Ӣсус палт фарисейт ос садукейт ёхтысыт ос, Таве āрталан мāгыс, Тавēныл вōвсыт: тōрумныл матыр пōс вос ēмты тах.2 Ос Тав тāнанылн ювле-лāвыс: ”Э̄типалāг нāн лāвēгын: ‘Тōрум вы̄грыг ōлы, ёмас хōтал тах ēмты’3 ос āлпыл: ‘Тōрум сатум ос вы̄гыр, тыхōтал яныг вōт ēмты тах’. Китвильтупыт! Тōрум нупыл сунсым, манхурип хōтал ēмты нāн таи тах вāглын, ос ань ōлнэ йис пōсыт ханьсюӈкве нāн ат вēрмегы̄н.4 Урккыӈ ос Тōрумныл сысы ё̄ӈхум мир пōс кинсы, Тōрум лāтыӈ тотнэ хум Иона пōс коны-пāл, нāнанн пōс ат паты тах”. Тāнаныл хӯлим, пōхан та минас.
5 Тав ханисьтан хумиянэ мōт палн пāг-пӯхтуманылт, ня̄няныл виӈкве хот-ёрувласаныл.6 Ӣсус тāнанылн лāвыс: ”Ӯрхатым ōлэ̄н! Фарисейт ос садукейт ня̄ньсум витныл ӯргалахтэ̄н”.7 Тāн ос тāнти халанылт номсысыт ос потыртасыт: ”Мāн ань ня̄нит ат висанув”.8 Ӣсус та урыл торгамтастэ ос тāнанылн лāвыс: ”Нāн мосься агтылыӈ мāхум! Ня̄нь ат ōсьнэн урыл манрыг потыртэгы̄н?9 Нāн ман иӈ ат торгамтэгы̄н? Ат ня̄нил ат сōтыра э̄лумхōлас тыттым, ат номилы̄н, ос мансāвит хусап тōнт атсын?10 Сāт ня̄нь нила сōтыран, ос мансāвит корсинка тōнт атсаны̄н?11 Хумус нāн ат торгамтылы̄н, Ам ня̄нь урыл хунь потыртэ̄гум: фарисейт ос садукейт ня̄ньсум витныл ӯргалахтэ̄н?”12 Тōнт тāн усьта торгамтасаныл, Тав тāнанылн ня̄ньсум витыл ӯргалахтын урыл хунь потыртас, фарисейт ос садукейт ханисьтапныл ӯргалахтаӈкве э̄ри.
13 Хунь Ӣсус Филиппос Кесария мāн ёхтыс, Ӣсус Такви ханисьтан хумиянэ китыгласанэ: ”Хотъюты̄г Āнум, Э̄лумхōлас Пы̄г, мāхум ловиньтыя̄ныл?”14 Тāн лāвсыт: ”Тōват витн тӯлнэ хумыг Иоаныг ловиньтыя̄ныл, мōтаныт Ӣлияг, ос тōват Еремеяг ман ос хотты Тōрум лāтыӈ тотнэ хумыг ловиньтыя̄ныл”.15 Тав тāнанылн лāвыс: ”Ос нāн хотъютыг Āнум ловиньтылы̄н?”16 Симон Пēтыр лāвыс: ”Наӈ – Кристос, Лылыӈ Тōрум Пы̄г ты”.17 Тōнт Ӣсус тавēн лāвыс: ”Симон, Ионин пы̄г, наӈ сōтыӈыг ōлэ̄гын. Э̄лумхōласын наӈ ат хӯлтвесын, тōрумт ōлнэ Ам Āсюмн ты урыл хӯлтвесын.18 Ос Ам наӈын ты лāвēгум: наӈ – Пēтыр*а, ос ты кēрас тармыл Ам тах Амти Ялпыӈ колум Āнумн агтнэ мāхум мāгыс ӯнттэ̄гум, ёлы-мā ё̄рытн таве ёлымтаӈкве ат вēрмаве.19 Ос Ам наӈын Тōрум йильпи нот туман нēлмыт мыганум. Мāныр ты мāт нэ̄гсалэ̄гын, таи тōрумт нэ̄гсалаве тах; мāныр ты мāт тāратэ̄гын, таи тах тōрумт тāратаве”.20 Тōнт Ӣсус Такви ханисьтан хумиянэ̄н потыртаӈкве ат тāртахтас, Тав Кристосыг ōлы.21 Та пасныл Ӣсус Такви ханисьтахтын хумиянэ̄н потыртаӈкве патыс, Тавēн Иерусалимн минуӈкве э̄ри. Тот мир пуӈкхумитныл*б, пӯп-ōйкат кӯсяитныл ос Сāккон ханисьтан хумитныл Тав тах савалаӈкве паты. Тав ань алаве тах ос хӯрмит хōталэт нōх-ялты тах.22 Пōхан Таве вōвим, Пēтыр Ӣсус нупыл лю̄камтаӈкве патыс: ”Тōрум Наӈын вос сāлитытэ, Кӯсяй! Тысир Наӈ ётын ул вос паты!”23 Тав Пēтыр нупыл ё̄ӈхыгпим, ювле-лāвыс: ”Āнумныл пōхан минэ̄н, сатана! Наӈ Āнум карек вāруӈкве хуйты̄лын, наӈ Тōрум сирыл ат номсэ̄гын, наӈ э̄лумхōлас номтыл номсэ̄гын”.
24 Тōнт Ӣсус Такви ханисьтахтын хумиянэ̄н лāвыс: ”Хотъют Ам юи-пāлумт минуӈкве ке таӈхи, таи таквинāтэ хот вос ёрувлытэ. Такви пēрнатэ вос выгтэ ос Ам юй-пāлумт вос мины.25 Хотъют такви ōлупсатэ ӯргалаӈкве таӈхи, таи ōлупсатэ хот-тыпылтытэ. Ос хотъют Ам мāгсылум ōлупсатэ тыпылтытэ, таи ōлупсатэ хōнтытэ.26 Мāныр пāрс э̄лумхōласын ēмты, хунь пуссын мир тавēн ке паты, ос лылытэ тыпылтытэ? Манос мāныр э̄лумхōлас такви лылытэ мāгыс миӈкве вēрми?27 Э̄лумхōлас Пы̄г Такви Āсе посе ёт ос Такви Ангеланэ ёт ёхты, тōнт тах кāсыӈ хōтпан такви вāрум вāрмалянэ сирыл хōйхатнэг уртытэ.28 Мāк нāнанн ты лāвēгум: тыт лю̄льнэ хōтпат халт тōват сорумн патнэ̄ныл э̄лы-пāлт Э̄лумхōлас Пы̄г тах такви йильпи нот хōныг ёхтынэ̄тэ кāсалыяныл”.
*а 18 16:18 Пēтыр – та грек лāтӈыл кēрас
*б 21 16:21 мир пуӈкхум – ты русь лāтӈыл старейшина
Глава 16