Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 7
Мый мортлӧ буржык?
1 Бур мортӧ пуктӧ́мыс буржык дона вися,
кула́н луныс ─ чужа́н лунся.
2 Гажӧтчанiнӧ мунӧ́мся буржык мунны сэтчӧ,
кытӧн кулӧм морт понда герьясьӧны.
Сэтӧн эд вежӧртан,
мый быдӧннысӧ видзчисьӧ.
Ловья морт сійӧ ась видзӧ тӧдвылын.
3 Тӧждісьӧ́мыс сералӧ́мся буржык.
Мортыс гажтӧм чужӧма кӧ, сэк сьӧлӧмыс лоӧ буржык.
4 Мывкыда мортсӧ сьӧлӧмыс кыскӧ горзiссез дынӧ,
мывкыдтӧмсӧ ─ гажӧтчиссез дынӧ.
5 Мывкыдтӧммезлісь сьылӧ́мсӧ кывзӧ́мись абу бурыс,
буржык кывзыны мывкыда мортлісь ӧлӧ́мсӧ.
6 Мывкыдтӧм мортлӧн сералӧ́мыс
кыдз пӧрт
*а увтын уввезлӧн сотчӧ́м-чажӧтӧ́м.
И сія быдӧс весись педзӧ́м.
7 Мывкыда морт мӧдікӧс дзескӧтлӧ кӧ,
сэк ачыс лоӧ мывкыдтӧмӧн.
Гусьӧн сетӧм козиннэз
*б тшыкӧтӧны мортсӧ.
8 Керсьӧм уджыс буржык пондӧтӧ́мся.
Ыджыт мылаӧн видзсьӧ́мыс
буржык асьӧс вылына лэбтӧ́мся.
9 Эн тэрмась лӧгасьны.
Лӧгыс эд поздiсьӧ мывкыдтӧм мортлӧн сьӧлӧмын.
10 Эн юась, мыля нӧ одзжык вӧлі буржык.
Сідз юалӧ́мыс не мывкыда мортлӧн.
11 Мывкыдыс айсянь дӧнзьӧм пай кодь.
Шонді увтын олісьлӧ сія бурсӧ вайӧ.
12 Мывкыдыс сьӧм моз дорйӧ.
А тӧдӧ́мыс сьӧмся буржык,
сія эд мывкыда мортлӧ сетӧ ола́н.
13 Видзӧт Енлӧн керӧ́ммез вылӧ.
Кин вермас веськӧтны сійӧ,
мый Сія керӧм чукыляӧн?
14 Бур луннэзӧ бура ов,
а сьӧкыт кадӧ тӧд:
ӧтыс и мӧдыс Енсянь.
Сійӧн Сылӧ паныт морт нем оз вермы висьтавны.
Эн мыччав асьтӧ ӧддьӧн мывкыдаӧн
15 Олікам ме уна мый весись кери,
уна мый адззылі.
Адззылі, кыдз веськыта олісь кулӧ,
кӧть веськыта керӧ,
а умӧльсӧ керись дыр олӧ,
кӧть умӧльсӧ керӧ.
16 Эн мыччав асьтӧ ӧддьӧн веськыта олісьӧн.
Ӧддьӧн мывкыда мортӧ асьтӧ эн пукты.
Мыйлӧ тэныт кулӧ́мсӧ сибӧтны?
17 Эн лэдзчись умӧльсӧ керны,
мывкыдтӧ эн ӧшты.
Мыйлӧ тэныт одзся-одз кувны?
18 Бур, олан кӧ одзза тшӧктӧ́м сьӧрті,
да и мӧд тшӧктӧ́мӧс он вунӧт.
Енiсь полісьсӧ эд уна умӧльыс орддьӧ.
19 Мывкыда мортсӧ мывкыдыс керӧ
карись дас веськӧтлісься вынажыкӧн.
20 Му вылас абу ӧтік морт,
кӧда некӧр бы эз кер умӧльсӧ,
а дзир бурсӧ керис.
21 Сійӧн пельтӧ эн бергӧт быдӧс кывзыны,
медбы эн кыв раблісь тэ йылісь умӧля баитӧ́мсӧ.
22 Тэнат эд аслат тӧдвылат,
кыдз тэ ачыт отир йылісь умӧля баитлін.
23 Этӧ быдӧс ме тӧдмалі-видзӧті мывкыд отсӧтӧн. Ме шуи: «Ме лоа мывкыда мортӧн». Но мывкыдыс месянь ылын вӧлі.
24 Сія быдӧс ─ ӧддьӧн ылын да пыдынся-пыдын,
кин вермас сійӧ судзӧтны?
25 Ме лолӧс пукті, медбы тӧдмавны-видзӧтны, кошшыны мывкыдсӧ да вежӧртны ола́нсӧ. Ме вежӧрті: Ентӧг олӧ́м петӧ мывкыд ӧштӧ́мсянь, авйытӧг олӧ́м ─ вежӧр ӧштӧ́мсянь.
Инькаэз кузя тӧждісьӧ́м
26 Ме вежӧрті: кулӧ́мся курытжык ─ инька,
кӧда кыдз кыйся́н.
Сылӧн сьӧлӧмыс ─ нальк, киэс ─ цеппез.
Сы шогья сайӧвтчас морт,
кӧда Енлӧ сьӧлӧмви.
А умӧльсӧ керись сылӧн кыйся́нӧ шедӧ.
27 Велӧтісь шуис: «То мый ме вежӧрті сьӧрсьӧн-бӧрсьӧн быдӧс видзӧтiкӧ:28 мый ме дыр кошши, сійӧ эг адззы. Сюрс мужик коласiсь ме адззи дзир ӧтік веськыта олісьӧс. Сюрс инька коласiсь ─ некинӧс.29 Ӧтiкӧ ме вежӧрті: Еныс мортсӧ керис веськыта олісьӧн, а отирыс лэдзчисисӧ чукыля туйез кошшыны».
*а 7:6 пӧрт ─ котёл
*б 7:7 гусьӧн сетӧм козин ─ взятка
Глава 7
