Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 8
Морт оз тӧд, мый сійӧ видзчисьӧ
1 Кин ыджыт мывкыда морт кодь?
Кин вермас быдӧс вежӧртны?
Мортлісь чужӧ́мсӧ мывкыдыс югдӧтӧ,
чорыта видзӧтӧ́мсӧ сылісь небзьӧтӧ.
2 Кер ӧксулӧн висьталӧ́м сьӧрті,
тэ эд Ен одзын сылӧ кыв сетiн.
3 Ӧксу одзись мунны эн тэрмась.
И мый оз ков керны,
сія керӧ́м дор эн сулав.
Ӧксу эд керӧ, мый сылӧ колӧ.
4 Ӧксулӧн висьталӧ́мыс вына.
Кин вермас сылӧ висьтавны:
«Мый тэ керан?»
5 Кин сылӧн тшӧктӧ́м сьӧрті керӧ,
сыкӧт умӧльыс оз пет.
Мывкыда морт тӧдӧ,
кӧр мый керны.
6 Быдӧслӧ эд эм аслас кад да лӧсьӧтӧм арт
*а.
Но мортсӧ ёна тӧждісьӧ́мыс личкӧ:
7 сія эд оз тӧд,
мый сійӧ видзчисьӧ
да кыдз мый лоас.
Кин вермас мортлӧ висьтавны
локта́н кадӧ лоӧ́м йылісь?
8 Морт оз вермы веськӧтлыны лолӧн,
оз вермы сійӧ видзны.
И кула́н луныс абу сы киын.
Воин тышкасьӧ́мись оз пышшы.
Умӧльсӧ керисьӧс умӧльыс оз мезды.
9 Этӧ ме быдӧс адззылі
и вынсьӧтчи вежӧртны,
мый керсьӧ шонді увтас.
Овлӧ сідз, морт морт вылын ыждалӧ
и сійӧ умӧльӧдз вайӧтӧ.
Енлісь керӧ́ммесӧ он вежӧрт
10 Ме адззылі, кыдз дзебисӧ умӧль кериссезӧс. Нiя кӧркӧ пыралісӧ вежаинӧ. Но бӧрынжык сія карись отир вунӧтісӧ нылісь умӧль керӧ́мсӧ. И эта весись педзӧ́м.11 Кӧр умӧльсӧ керӧ́м понда мортсӧ дыр озӧ судитӧ, сэк сія оз пов керны умӧльсӧ.12 Умӧльсӧ керись сёись*б керӧ умӧльсӧ да дыр олӧ. Но ме тӧда: бур лоас Енiсь поліссезлӧ, кӧдна полӧны-кывзiсьӧны Сійӧ.13 А Ентӧг олісьлӧ оз ло бурыс. Кӧда оз пов Енiсь, сія оз дыр ов. Сылӧн ола́н луннэс вуджӧ́р моз ӧшӧны.
14 Му вылас ме адззылі и сэтшӧм керсьӧ́м: веськыта оліськӧт петӧ сія, мый бы коліс петны аслас керӧ́ммез понда Ентӧг оліськӧт. А Ентӧг оліськӧт петӧ сія, мый бы коліс петны аслас керӧ́ммез понда веськыта оліськӧт. Ме висьталі: и эта весись.15 Сэк ме ошки гажӧтчӧ́мсӧ. Мортлӧ му вылын овтӧн медбурыс ─ сёйны-юны да гажӧтчыны. Еныс мымда сетӧ сылӧ овны шонді увтын, сія быд лун мырсьӧмӧн уджалӧ, но и гажӧтчӧ.
16 Ме вынсьӧтчи тӧдны мывкыдсӧ да видзӧтны отирлісь уджсӧ, мый нiя лун и ой керӧны. Нылӧ некӧр и синнэз куньлыны.17 Ме казялі: мортыс оз вермы вежӧртны Енлісь быдӧс уджсӧ, мый керсьӧ шонді увтас. Мымда бы морт эз вынсьӧтчы быдӧс тӧдмавны, сія оз понды тӧдны. Ыджыт мывкыда морт вермас висьтавны, ме пӧ быдӧс тӧда. Но и сія оз вермы быдӧс вежӧртны.
*а 8:6 арт ─ порядок
*б 8:12 сёись ─ сто раз
Глава 8
