1 Быдӧслӧ эм аслас кад, енӧж увтас быдӧс керсьӧ аскадӧ. 2 Эм кад чужны и кад кувны, кад садитны и кад нетшкыны, 3 кад вийны и кад веськӧтны, кад керку разьны и кад лэбтыны, 4 кад горзыны и кад серавны, кад тӧждiсьны и кад йӧктыны, 5 кад шентавны*а иззэз и кад нійӧ ӧктыны, кад сывтыртны*б и кад вешшыны, 6 кад кошшыны и кад ӧштыны, кад видзны и кад чапкыны, 7 кад косявны и кад вурны, кад чӧвны и кад баитны, 8 кад радейтны, и кад, кӧр синӧн бы эн видзӧт, кад тышкасьны и кад овны лӧньын.
9 Мортлӧ мый бурыс сьӧкыта уджалӧ́мись? 10 Ме адззылі сьӧкыт удж, кӧдӧ Ен сетӧм керны мортлӧ. 11 Еныс аскадӧ керӧм быдӧс ӧддьӧн бура. Морт сьӧлӧмӧ Сія пуктӧм пырсясӧ тӧдны. Но Сылісь одззасянь медбӧрӧдз керӧ́мсӧ мортыс оз вермы вежӧртны. 12 Ме вежӧрті, мортлӧ медбур шудыс ─ лоны гаж сьӧлӧмаӧн да овтӧнняс керны бурсӧ. 13 Мортыс кӧ сёйӧ-юӧ да аслас уджӧн бурмӧтӧ сьӧлӧмсӧ, сія сылӧ ─ Енсянь козин. 14 Ме вежӧрті: Енлӧн керӧ́мыс пыр кежӧ кольччӧ. Сэтчӧ нем оз ков содтыны и нем оз туй чинтны. Еныс сідз лӧсьӧтӧм, медбы отир олісӧ Сыись полӧмӧн. 15 Мый вӧлӧм, сія и ӧнi эм. Мый лоас, сія одзжык вӧлӧма ни. Еныс вились вайӧтӧ одззасясӧ.
с русским текстом