Библия
Выбрать язык
Книги Ветхого Завета
Книги Нового Завета
с русским текстом
ЕКЛЕСИАСТЛОН НЕБОГ
Глава 4
1 Ме видзӧті да казялі быд моз дзескӧтлӧ́м, кӧда керсьӧ шонді увтын:
дзескӧтӧм отир синва кисьтӧ,
а бурӧтiсьыс нылӧн абу.
Выныс дзескӧтліссез киын,
а бурӧтiсьыс абу.
2 Кулӧммесӧ ме шуи ӧнi оліссезся шудажыккезӧн*а.3 А кыкнаннысся шудажык сія, кӧда эз на шогмы да эз адззыв лёк керӧ́мсӧ, кӧда керсьӧ шонді увтын.
4 Сідз жӧ ме адззылі: мортлӧн кужӧ́м-вермӧ́мсянь быдкодь удж петӧ кӧ, сысянь отирсӧ завид кутӧ. И эта весись педзӧ́м, кыдз тӧв сьӧрын вӧтлісьӧ́м.
5 Мывкыдтӧм морт пукалӧ киэсӧ тэчӧмӧн
да тшыгьялӧ́мсянь вынтӧмсялӧ.
6 Мортыс кыдз тӧв сьӧрын вӧтлісьӧ,
мырсьӧмӧн уджалӧ,
медбы содззезӧн куравны.
А мортлӧ буржык
лӧнь сьӧлӧмӧн ӧтік шамыр*б босьтны.
Кыкӧн буржык
7 Ме видзӧті да казялі шонді увтас весись педзӧ́мсӧ:
8 морт олӧ ӧтнас,
сылӧн абу зон, абу вон,
а сія дугдывтӧг мырсьӧмӧн уджалӧ.
Но ӧктӧм пажытьыс
*в сылісь сьӧлӧмсӧ оз гажӧт.
Сія шуӧ:
«И кин понда ме сідз уджала,
ассим сьӧлӧмӧс немӧн ог бурмӧт?»
Сэтiсь абу бурыс,
дзир весись педзӧ́м.
9 Кыкӧн овны буржык ӧтікӧн олӧ́мся.
Ӧтлаын уджалӧ́мись нiя унажык босьтӧны.
10 Ӧтыс усяс кӧ, мӧдыс сійӧ лэбтас.
Но ӧтікӧн олісьлӧ сьӧлӧм шог:
сія усяс кӧ, сійӧ некинлӧ лэбтыны.
11 Кыкӧн кӧ водасӧ, нылӧ шоныт,
а ӧтіклӧ кыдз шонавны?
12 Ӧтiксӧ кокнит вермыны, а кыкӧн озӧ сетчӧ.
Ӧтлаӧ куим гардӧм сунис сьӧкыт орӧтны.
Мортлісь вылына лэбтісьӧ́мсӧ вунӧтӧны
13 Пӧрись да учӧт вежӧра ӧксусянь абу бурыс,
оз кӧ сія кывзы туйдӧтӧ́мсӧ.
Мывкыда том морт сысся буржык,
кӧть и пажытьтӧм.
14 Мывкыда зонкаӧс чижовкаын
*г пукалӧ́м бӧрын
сувтӧтісӧ ӧксуӧн,
кӧть сія и чужис пажытьтӧмӧн
мӧдік ӧксу юралӧ́м дырни.
15 Ме казялі:
шонді увтын оліссез вӧлісӧ том зон дор,
кӧда пуксис юравны пӧрись ӧксу туйӧ.
16 Унася-уна отир вӧлі сы дор.
А сы бӧрын оліссез сійӧ бурӧн эзӧ касьтылӧ.
И эта весись педзӧ́м, кыдз тӧв сьӧрын вӧтлісьӧ́м.
Енлӧ кыв сетӧ́м йылісь
17 Енлӧн керкуӧ мунiкӧ видзӧт ас сьӧрат.
Лӧсьӧтчы бура кывзыны.
Эн лӧсьӧтчы езъяла́н козин вайны сідз,
кыдз керӧ учӧт вежӧра морт.
Ассис умӧль керӧ́мсӧ эд сія оз вежӧрт.
*а 4:2 шуда ─ счастливый
*б 4:6 шамыр ─ горсть
*в 4:8 пажыть ─ имущество
*г 4:14 чижовка ─ тюрьма
Глава 4
