Выбрать язык
Книги Ветхого Завета
Книги Нового Завета
с русским текстом1 Ме аслым висьталі: «Ноко, пондыла гажӧтчыны, сійӧн сьӧлӧмӧс бурмӧта». Но и сія вӧлі весись педзӧ́м.2 Сералӧ́м йылісь ме висьталі: «Вежӧртӧг керӧ́м», а гажӧтчӧ́м йылісь шуи: «Мый сыын бурыс?»
3 Ме шуи ассим вывты́рӧс бурмӧтны винаӧн да керны вежӧрттӧммез моз. Но сы коста юрсим мывкыдӧс эг лэдзлы. Ме эд мӧді вежӧртны, мый вайӧ мортлӧ бурсӧ, и мый сылӧ колӧ керны енӧж увтас ассис дженытик ола́нсӧ овтӧн.
4 Ме кери ыджыт уджжез: аслым лэбтi керкуэз, садитi виноград,5 лӧсьӧтi сад йӧррез да рассэз, сэтчӧ садитi быдкодь пуэз, кӧдна сетӧны ассиныс воӧ́мсӧ*а.6 Киськавны быдма́н пуэсӧ кери ва видза́ннэз.7 Неби мужик да инька раббезӧс. Менам вӧлісӧ и раббез, кӧдна чужисӧ гортын. Гырись да учӧт пода менам вӧлі унажык ны сьӧрті, кӧдна ме одзын юралісӧ Ерусалимас.8 Ме ӧктi зарни да эзы́сь, мӧдік муэзісь ӧксуэзлісь да отиррезлісь быд дона торсӧ. Ме босьтi уна сьылісьӧс: мужиккезӧс да инькаэзӧс. Босьтi уна инь, медбы нiя гажӧтiсӧ менӧ.9 Ме вы́лына лэбтiси, менам лоис пажытьӧ*б унажык ны сьӧрті, кӧдна юралісӧ Ерусалимас ме одзын. Но ассим мывкыдӧс ме эг ӧшты.10 Мый син вылӧ усьліс, ме сійӧ и босьтлі. Сьӧлӧмӧс бурмӧтны гажӧтчӧ́мӧн эг падмӧтчывлы. Сьӧкыт удж аркмӧ́мсянь сьӧлӧмӧ гажмывліс, и сія вӧлі козинӧн мырсьӧ́мӧ понда.11 Ме видзӧті аслам сьӧкыт удж вылӧ, мый ме кери аслам киэзӧн. Ме казялі: эта быдӧс весись педзӧ́м, кыдз тӧв сьӧрын вӧтлісьӧ́м. Шонді увтас сысянь нем абу бурыс.
12 Ме юрам пондi бергӧтлыны, мый сія: мывкыдыс, вежӧртӧг олӧ́мыс да мывкыдтӧмыс*в. Мый вермас керны ӧксу бӧрын пуксьӧм мортыс унажыксӧ сы сьӧрті, мый керӧм ни?13 Ме казялі: мывкыдӧн олӧ́мыс буржык бӧбсорӧн олӧ́мся, кыдз югытыс ─ пемытысся.14 Мывкыда морт адззӧ, кытчӧ мунӧ, а мывкыдтӧм ветлӧтӧ пемытын. Но ме вежӧрті: нiйӧ кыкнаннысӧ видзчисьӧ ӧтік перьё*г.15 Ме аслым висьталі: «Мекӧт лоас сідз жӧ, кыдз и мывкыдтӧмкӧт. Мыйлӧ нӧ сэк меным ыджыт мывкыдыс?» Сэк ме висьталі: «И эта весись педзӧ́м».16 Мывкыда мортсӧ озӧ пондӧ пыр видзны тӧд вылын, кыдз и мывкыдтӧмсӧ. Недыр мыйись быдӧннысӧ вунӧтасӧ. Кулас и мывкыдаыс, и мывкыдтӧмыс.17 Меным ола́ныс син вылӧ эз понды ковны. Ме эг понды вермыны видзӧтны сы вылӧ, мый керсьӧ шонді увтын. Сія быдӧс весись педзӧ́м да тӧв сьӧрын вӧтлісьӧ́м.
18 Меным син вылӧ эз понды ковны сія, мый ме мырсьӧмӧн кери шонді увтас. Меным эд быдӧс ковсяс кольны мортлӧ, кӧда пондас юравны ме бӧрсянь.19 Кин тӧдӧ, кытшӧм мортыс лоас, мывкыда али мывкыдтӧм? Мый ме кери ыджыт мывкыдӧн, аслам киэзӧн сьӧкыта уджалі, сія быдӧс лоас сы кипод увтын. И сія весись педзӧ́м.20 Шонді увтын сьӧкыт удж керӧ́мсянь менӧ сьӧлӧм шог личкис.21 Овлӧ сідз, морт мывкыда юрӧн, тӧдӧмӧн мырсьӧ-уджалӧ. Сылӧн кисис быдӧс петӧ, сія уна мый керӧ. Сэсся сылӧ быдӧс, мый сія керис, колӧ кольны мортлӧ, кӧда нем эз кер. И эта весись педзӧ́м да ӧддьӧн умӧль.22 Мый сетӧ мортыслӧ мырсьӧмӧн уджалӧ́мыс да тӧждісьӧ́мыс, мый сія керӧ шонді увтас?23 Мортлӧн быдӧс ола́н луннэс ─ пессьӧ́м-мырсьӧ́м, сылӧн уджыс ─ тӧждісьӧ́м. Нельки ойнас сылӧн сьӧлӧмыс зника оз тӧд. И эта быдӧс весись.
24 Мырсьӧмӧн олікас мортлӧ сёя́н-юа́нся да гажӧтчӧ́мся буржыкыс нем абу. Ме вежӧрті: и эта быдӧс Енсянь.25 Вермас разь мортыс сёйны-юны да гажӧтчыны Ентӧг?26 Кин Енлӧ сьӧлӧмви, сылӧ Сія сетӧ мывкыд, тӧдӧ́м да гаж. А умӧльсӧ керисьлӧ Ен сетӧ сьӧкыт ноп*д: тӧждісьӧмӧн ӧктыны пажыть да кольны мортлӧ, кӧда Енлӧ сьӧлӧмви. Но и эта весись педзӧ́м, кыдз тӧв сьӧрын вӧтлісьӧ́м.
*а 2:5 воӧ́м ─ плод
*б 2:9 пажыть ─ имущество
*в 2:12 мывкыдтӧмыс ─ глупость
*г 2:14 перьё ─ судьба
*д 2:26 ноп ─ бремя
Глава 2