Библия
Выбрать язык
Книги Ветхого Завета
Книги Нового Завета
с русским текстом
ВЕЛОТАН ВИСЬТАЛОММЕЗ
Глава 2
Мывкыдыс видзӧ умӧлись
1 Зонӧ, менчим кыввезӧс пыртан кӧ юрат,
тшӧктӧ́ммезӧс
*а пондан видзны тӧдвылат,
2 пельтӧ бергӧтан кӧ мывкыдсӧ бура кывзыны,
сьӧлӧмтӧ осьтан вежӧртны,
3 пондан кӧ корны тӧдӧ́мсӧ,
кытсалан кӧ вежӧрсӧ,
4 пондан кӧ сійӧ кошшыны эзы́сь
*б моз,
донася-дона берся моз,
5 сэк вежӧртан,
мый сія сэтшӧмыс ─ Дӧсвидзисись полӧ́мыс,
ылӧстан, мый сія ─ Енсӧ тӧдӧ́мыс.
6 Мывкыдсӧ эд сетӧ Дӧсвидзись,
тӧдӧ́мыс да вежӧрыс локтӧ Сысянь.
7 Веськыта оліссесӧ Сія мездӧ,
сӧстӧма оліссесӧ сайӧвтӧ.
8 Веськыта кериссезлісь туйесӧ Сія видзӧтӧ,
Аслас надейнӧй отирлісь туйесӧ видзӧ.
9 Тэ менӧ кывзан кӧ,
сэк вежӧртан, мыйез нія ─
быльыс, веськыта олӧ́мыс да веськыта керӧ́мыс.
Тэ пондан тӧдны быд бур туй.
10 Кӧр мывкыдыс тэнат сьӧлӧмӧ пырас,
сэк тӧдӧ́мытсянь сьӧлӧм вылат долыт лоас.
11 Бура авйӧ́мыт тэнӧ пондас дорйыны,
вежӧртӧ́мыт пондас видзны.
12 Мывкыдыс отсалас тэныт
лёк кериссезлісь туйсӧ орддьыны,
мездас бӧбӧтчиссез дынісь,
13 веськыт туйсӧ колиссез дынісь,
пемыт туй вылӧт ветлӧтіссез дынісь,
14 лёк керӧ́мсянь гажӧтчиссез дынісь,
кӧдна асланыс ылалӧ́мӧн ошшасьӧны.
15 Нылӧн туйезныс чукыляӧсь,
нія асланыс туйезын и ӧшӧны.
16 Мывкыдыс тэнӧ мӧдіклӧн инь дынісь
ылынжыка видзас,
йӧз инька дынісь кежӧтас.
Сія небыта баитӧ́мнас бӧбӧтлӧ.
17 Сія томся жӧниксӧ кольӧм,
Ен одзын керӧм йитӧ́тсӧ вунӧтӧм.
18 Сы керкуӧ пырӧм морт кулӧ́мӧ мунӧ,
сылӧн туйыс кулӧммез дынӧ вайӧтӧ.
19 Сы ордӧ пырӧммес бӧр озӧ петӧ,
ола́н туй вылас озӧ ни сувтӧ.
20 Сідзкӧ, ветлӧт бурсӧ кериссезлӧн туй кузя,
ов веськыта оліссез моз.
21 Веськыта оліссес му вылас
и одзлань овны пондасӧ,
сӧстӧма оліссес сы вылын кольччасӧ.
22 А Ентӧг оліссесӧ му вывсис шентасӧ
*в,
ылӧтліссесӧ вуджнас нетшкӧвтасӧ.
*а 2:1 тшӧктӧ́м ─ заповедь
*б 2:4 эзы́сь ─ серебро
*в 2:22 шентны ─ выкинуть, выбросить
Глава 2
