Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
95 Псалом
[Давидлӧн ошка́н сьыланкы́в. Сьылӧны керку лэбтікӧ.]1 Дӧсвидзисьлӧ сьылӧ виль сьыланкы́в!
Сьылӧ Дӧсвидзисьлӧ,
му вылын оліссез быдӧнныт!
2 Сьылӧ Дӧсвидзисьлӧ,
ошкӧ Сылісь нимсӧ,
лунісь-лунӧ висьтасьӧ:
«Сія ─ Мездісь».
3 Отиррезлӧ висьтасьӧ Сылӧн югьялӧ́м йылісь,
быд кыв вылын баитіссезлӧ ─
Сылӧн адззывлытӧм керӧ́ммез йылісь.
4 Дӧсвидзисьыс эд вына,
Сійӧ ӧддьӧн колӧ ошкыны.
Мӧдік еннэз сьӧрті Сыись медӧддьӧн колӧ повны.
5 Мӧдік отиррезлӧн еннэзныс ас керӧмӧсь,
а Дӧсвидзись енӧжжесӧ аркмӧтіс.
6 Сійӧ кытшӧвтӧны ошкӧ́м-лэбтӧ́мыс да юрала́н выныс,
вежаинас Сылӧн ─ выныс да югьялӧ́мыс.
7 Отиррез, ошкӧ-лэбтӧ Дӧсвидзисьсӧ!
Сьылӧтӧ вына Дӧсвидзисьсӧ!
8 Дӧсвидзисьлісь югьяла́н нимсӧ ошкӧ,
Сылӧн Вежа Керку йӧррезӧ козиннэзӧн локтӧ!
9 Дӧсвидзисьлӧн вежа югьялӧ́м одзын Сылӧ копыртчӧ!
Му вылын оліссез быдӧнныт, Сы одзын зэгсьӧ-полӧ!
10 Отиррезлӧ висьталӧ:
«Дӧсвидзисьыс ─ Юралісь Ӧксу!
Сійӧн ола́н муыс чорыта сулалӧ,
сія оз вӧрзьы.
Отирресӧ Сія пондас веськыта судитны».
11 Енӧжжез ась гажӧтчӧны,
муыс ась радуйтчӧ,
саридзыс ванырресӧ горӧн ась лэбтӧ,
ваын оліссез быдӧнныс ась гажӧтчӧны!
12-13 Дӧсвидзисьлӧн син одзын
ыбыс и быдӧс, мый эм сы вылын,
ась гажӧтчӧ!
Вӧрись быд пу ась радуйтчӧ!
Сія эд локтӧ,
Сія локтӧ судитны мусӧ.
Ола́н мусӧ Сія пондас судитны веськыта,
отирресӧ ─ Аслас быль сьӧрті.
Глава 95
