Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
96 Псалом
[Давидлӧн псалом, кӧдӧ сія сьыліс, кӧр Израиль му лоис сылӧн юраланінӧн.]1 Дӧсвидзисьыс ─ Юралісь Ӧксу!
Ась радуйтчӧ муыс,
ась гажӧтчӧны ваэз шӧрись быдӧс муэс!
2 Сійӧ кытшӧвтӧны сьӧд кымӧррез и са пемытыс.
Сылӧн юралӧ́мыс видзсьӧ
веськыта олӧ́м да веськыта судитӧ́м вылын.
3 Дӧсвидзись одзын мунӧ би,
Сы вылӧ лэбтісьӧммесӧ быдӧннысӧ сотӧ.
4 Сылӧн чарньӧ́ввес ола́н мусӧ югдӧтӧны,
нійӧ муыс адззӧ да зэгсьӧ.
5 Дӧсвидзисьлӧн чужӧ́мсянь
керӧссэз масісь моз сылӧны,
Сія эд Дӧсвидзисьыс быдсӧн му вылын.
6 Енӧжжез юӧртӧны Сылісь веськыта керӧ́мсӧ,
быд отир адззӧ Сылісь югьялӧ́мсӧ.
7 Кӧдна бовба́ннэзлӧ
*а юрби́тӧны
да ас керӧм еннэзӧн ошшасьӧны,
нія ась рожа куля́нӧдз локтӧны.
Копыртчӧ Дӧсвидзисьлӧ, еннэз быдӧнныт!
8 Дӧсвидзисьӧ,
Тэнчит веськыта судитӧ́мметӧ кылӧ́мсянь
Сионыс гажӧтчӧ,
гажӧтчӧны Иудеяись каррез.
9 Дӧсвидзисьӧ,
Тэ эд му выліссезся быдӧннысся вылынжык.
Мӧдік еннэз сьӧрті Медвылісьыс ─ Тэ.
10 Дӧсвидзисьсӧ радейтіссез,
тіянлӧ мед син вылӧ оз ков лёк керӧ́мыс!
Аслас надейнӧй отирлісь ола́нсӧ Сія видзӧ,
Ентӧг оліссезлӧн киэзісь нійӧ мездӧ.
11 Веськыта оліссезӧс югытыс югдӧтӧ,
сӧстӧм сьӧлӧмаэзлӧ Сія гаж сетӧ.
12 Веськыта оліссез, гажӧтчӧ,
тіян эд эм Дӧсвидзись!
Видзӧ тӧдвыланыт да ошкӧ Сылісь вежа нимсӧ!
Ошкӧ́м.
*а 96:7 бовба́н ─ истукан
Глава 96
