Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
83 Псалом
1 Сьыліссезӧн веськӧтлісьлӧ. Орсӧны Гефись орса́н вылын. Корей зоннэзлӧн псалом.2 Вына Дӧсвидзисьӧ,
сьӧлӧмӧ кыскӧ Тэнат оланіннэзӧ!
3 Менам лолӧ гажтӧмтчӧ,
пырӧ бы Дӧсвидзисьлӧн Вежа Керку йӧрӧ.
Менам сьӧлӧмӧ и вывты́рӧ
гажӧн сьылӧны ловья Енлӧ.
4 Вына Дӧсвидзисьӧ,
менам Ӧксуӧ, менам Енӧ!
Тэнат езъяланін дынын
нельки пышкайыс
*а оланін адззӧ,
чикисьыс
*б аслыс поз керӧ,
сэтӧн пияннэсӧ пӧжӧ.
5 Шудаӧсь Тэнат керкуын оліссез,
нія дугдывтӧг пондасӧ ошкыны Тэнӧ.
6 Шуда мортыс,
кӧдалӧн выныс Тэсянь,
кӧдӧ сьӧлӧмыс пыр кыскӧ мунны
Тэнат Вежа Керкуӧ.
7 «Горза́н лажмытінӧт
*в» муніканыс
нія адззӧны ва петаніннэз,
и зэрыс кисьтӧ ны вылӧ бласлӧвитӧ́мсӧ.
8 Лунісь лунӧ нылӧн выныс содӧ
и нія локтӧны Ен одзӧ Сион вылӧ.
9 Дӧсвидзисьӧ, вына Енӧ, кыв менчим кеймӧ́мӧс!
Яковлӧн Ен, кывзы!
10 Енным, миян Дорйисьным,
чужӧ́мтӧ бергӧт,
Аслат ма́втӧм
*г вылӧ видзӧт.
11 Тэнат Вежа Керку йӧрын ӧтік чулӧтӧм луныс
буржык мӧдіклаын сюрс
*д лун олӧ́мся.
Меным буржык лоны Тэнат керкуын ыбӧс дорас,
нежели овны Ентӧг оліссезлӧн керкуэзын.
12 Дӧсвидзись Еныс ─ шонді да сайӧвтча́н.
Дӧсвидзись миянлӧ бурсетӧ́мсӧ да ошкӧ́мсӧ козьналӧ.
Кӧдна озӧ керӧ умӧльсӧ, Сія нылӧ бурсӧ лыдтӧг сетӧ.
13 Вына Дӧсвидзисьӧ!
Шуда мортыс,
кӧда надейтчӧ Тэ вылӧ.
*а 83:4 пышкай ─ воробей
*б 83:4 чикись ─ ласточка
*в 83:7 Горза́н лажмытін ─ долина Плача
*г 83:10 ма́втӧм ─ помазанник
*д 83:11 сюрс ─ тысяча
Глава 83
