Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
82 Псалом
1 Асафлӧн сьыла́н псалом.2 Енӧ, эн чӧв, мыля шы он сет!
Енӧ, кер мыйкӧ!
3 Тэ вылӧ лэбтісьӧммес зык лэбтӧны.
Киннэз Тэ вылӧ синӧн озӧ вермӧ видзӧтны,
нія юррезнысӧ лэбтісӧ.
4 Нія гусьӧн лӧсьӧтчӧны
Тэнат отирлӧ умӧльсӧ керны.
Нія баитчисӧ лёксӧ керны нылӧ,
кӧдна сьӧрын Тэ видзӧтан.
5 Нія шуисӧ:
«Мунам да му вылын оліссез коласісь
Израиль отирсӧ быдӧннысӧ виям,
медбы нылӧн нельки нимыс сэсся эз кывсьы».
6 Тэныт паныт мунны нія баитчисӧ,
ӧтдор керны лӧсьӧтчисӧ:
7 Едомын оліссез, Измаил увтыр,
моав да агар отир,
8 Гевалын оліссез, Аммон да Амалик увтыр,
филистим отир да Тирын оліссез.
9 Ныкӧт и Ассирия муын оліссез ӧтлаасисӧ.
Лотлӧн увтырлӧ вынсӧ нія содтісӧ.
10 Енӧ, нылӧ кер сійӧ жӧ,
мый керин мадиансалӧ,
мый керин Киссон ю дорын Сисарлӧ да Иавинлӧ.
11 Аэндорын Нія вӧлісӧ вийӧмӧсь,
и муыслӧ назёмӧн лоисӧ.
12 Ныкӧт да нылӧн юраліссезкӧт кер сідз жӧ,
кыдз керин Оривкӧт да Зивкӧт.
Нылӧн веськӧтліссезкӧт кер сідз,
кыдз Зевейкӧт да Салманкӧт.
13 Нія баитісӧ:
«Еныслісь муэсӧ босьтам асланым кипод увтӧ».
14 Менам Енӧ!
Нія ась лоӧны тӧвчикын бус кодьӧсь,
тӧлӧн нӧбӧтӧм идзас кодьӧсь.
15 Кыдз биыс сотӧ вӧрсӧ,
и бикыввез нюлӧны керӧссэсӧ,
16 сідз Тэ вашӧт нійӧ Аслат тӧвнырӧн,
повзьӧт нійӧ Аслат тӧвчикӧн.
17 Дӧсвидзисьӧ,
уськӧт нійӧ отир сералӧ́мӧдз,
медбы нія пондісӧ кошшыны Тэнӧ.
18 Нія ась гӧрдӧтӧны да ӧшӧны,
рожа куля́нӧдз усьӧны.
Нылӧн ола́нныс ась орӧ.
19 Нія ась пондӧны тӧдны:
Дӧсвидзись нимыс ─ Тэнат ӧтнатлӧн,
и му вылас Медвылісьыс ─ Тэ.
Тэ быдӧнныс вылын юралан!
Глава 82
