Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
78 Псалом
Асафлӧн псалом.1 Енӧ, Тэнат муӧ ентӧдтӧммез локтісӧ.
Тэнчит Вежа Керкутӧ нія сэрпӧсьтісӧ,
Ерусалимсӧ муӧдз паздісӧ.
2 Тэнат раббезлісь шойесӧ
сетісӧ кокавны енӧжись кайезлӧ,
Тэнат надейнӧй отирлісь шойесӧ ─ вӧрпаэзлӧ.
3 Нылісь вирсӧ Ерусалим пасьта ва моз кисьтісӧ,
нійӧ некинлӧ вӧлі дзебны.
4 Ордчӧн олісь йӧз миян вылын сералӧ,
миян гӧгӧрись отир миянӧс видӧ да умӧльтӧ.
5 Дӧсвидзисьӧ,
дыр я пондан миян вылӧ лӧгавны?
Мый дырна Тэнат лӧгалӧ́мыт
пондас би моз ыпьявны?
6 Кисьт Ассит лӧгтӧ отиррез вылӧ,
кӧдна Тэнӧ озӧ тӧдӧ.
Кисьт Ассит лӧгтӧ нія муэз вылӧ,
кытӧн отирыс Тэнӧ нимнат озӧ корӧ.
7 Нія эд Яков увтырись отирсӧ вийисӧ,
нылісь оланінсӧ куштісӧ.
8 Миян айезлісь умӧль керӧ́ммесӧ
эн вайӧт миян вылӧ.
Аслат небыт сьӧлӧмсянь
тэрмась миянлӧ отсавны,
мийӧ вынтӧмсялім.
9 Енным, миян Мездісьным,
отсав миянлӧ,
медбы отирыс ошкисӧ Тэнчит нимтӧ.
Аслат ним понда мезды миянӧс
да простит миянлісь умӧль керӧ́ммесӧ.
10 Мыйлӧ ентӧдтӧммеслӧ баитны:
«Кытӧн нӧ нылӧн Енныс?»
Вештісь нылӧ миян син одзын
Тэнат раббезлісь кисьтӧм вир понда,
медбы эта йылісь тӧдісӧ ентӧдтӧммес быдӧнныс.
11 Домӧттэзын мырсиссезлісь ойзӧ́мсӧ кыв.
Аслат вына киӧн видз ола́ннысӧ нылісь,
кӧднӧ мӧдӧны вийны.
12 Дӧсвидзисьным,
миян гӧгӧр олісь отир Тэнӧ умӧльтіс.
Сы понда нылӧ сизимпӧв вештісь.
13 А мийӧ отирыс Тэнат,
Тэнат йӧрись баляэс.
Тэнӧ пырся-пыр пондам сьылӧтны,
айезсянь челядьӧдз пондам ошкыны.
Глава 78
