Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
79 Псалом
1 Сьыліссезӧн веськӧтлісьлӧ. Орсӧны «шошанним-эдуф» орса́н вылын. Асафлӧн псалом.2 Израиль сьӧрын Видзӧтісь, кыв миянӧс!
Баляэз сьӧрын видзӧтісь моз
Тэ новйӧтан Ӧсиплісь увтырсӧ.
Тэ, Кӧдалісь юрала́н пукӧ́ссӧ видзӧны керуви́ммез
*а,
мыччась миянлӧ!
3 Ефрем увтыр одзын,
Вениамин да Манассия увтыррез одзын
мыччав Ассит вынтӧ,
лок миянӧс мездыны!
4 Енӧ, миянӧс бӧра сувтӧт!
Тэнат чужӧ́мыт ась югйӧвтӧ,
и мийӧ мезмам.
5 Дӧсвидзисьӧ, вына Енӧ,
пыр разь пондан лӧгавны?
Кытчӧдз он понды кывны
Аслат отирлісь кеймӧ́мсӧ?
6 Тэ миянӧс синванас няньӧн моз вердін,
синванас миянӧс пӧттӧдз юкталін.
7 Миян гӧгӧр оліссесӧ Тэ лэдзин миянкӧт етшасьны,
миян вылӧ лэбтісьӧм йӧзыс изгаляйтчӧны
*б.
8 Вына Енӧ, миянӧс бӧра сувтӧт!
Тэнат чужӧ́мыт ась югйӧвтӧ,
и мийӧ мезмам.
9 Египетісь Тэ вуджӧтін виноград пу
*в,
отирресӧ вашӧтін,
а сійӧ садитін.
10 Сэтісь мусӧ весӧтін,
сылісь вуджжесӧ сэтчӧ босьтсьӧтін,
и сія мусӧ тыртіс.
11 Сылӧн вуджӧ́рыс вевттис керӧссэз,
сылӧн уввес вевттисӧ ыджыт сыспуэз
*г.
12 Сія уввесӧ лэдзис саридз дорӧдз,
вожжес
*д нюжалісӧ Евфрат ю дорӧдз.
13 Мыйлӧ Тэ сылісь йӧрресӧ разин?
Сы дынӧт мунікӧ
сылісь роззэсӧ быдӧнныс нетшкӧны.
14 Вӧрись порссез сійӧ нырйӧны,
ыб вылісь вӧрпаэз сійӧ куштӧны.
15 Вына Енӧ, бергӧтчы миянланьӧ,
енӧжсяняс видзӧт да казяв виноградтӧ,
вовлы сы сьӧрын видзӧтны.
16 Видз сійӧ, мый садитіс Тэнат веськыт киыт.
Видз морт зонсӧ, кӧдӧ Тэ Аслыт вынсьӧтін.
17 Тэнат виноградыт кералӧм, сотӧм биӧн.
Тэнат лӧгасьӧ́мсянь отирыт кулӧ.
18 Тэнат киыт ась видзӧ сійӧ,
кӧда веськыт ладорат,
ась видзӧ морт зонсӧ,
кӧдӧ Тэ Аслыт вынсьӧтін.
19 Сэк мийӧ огӧ мунӧ Тэ дынісь.
Сет миянлӧ одзлань овны,
и мийӧ Тэнӧ нимнат пондам корны.
20 Дӧсвидзисьӧ, вына Енӧ,
сувтӧт бӧра миянӧс!
Тэнат чужӧ́мыт ась югйӧвтӧ,
и мийӧ мезмам.
*а 79:2 керувим ─ вына ангел
*б 79:7 изгаляйтчыны ─ насмехаться
*в 79:9 виноград пу ─ Эстӧн гижӧны Израиль отир йылісь.
*г 79:11 сыспу ─ кедр
*д 79:12 вож ─ отрасль, побег
Глава 79
