Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
77 Псалом
Асафлӧн велӧтӧ́м.1 Менам отир, кывзӧ менчим велӧтӧ́мӧс,
кылӧ менчим висьталӧ́мӧс.
2 Ме понда баитны велӧта́н висьттэзӧн
да важся юржугда́ннэзӧн
*а.
3 Мый мийӧ кывлім, мый пондім тӧдны,
мый миянлӧ висьтасьлісӧ айезным,
4 сійӧ висьтасям челядьнымлӧ,
огӧ пондӧ чӧвны.
Локта́н каддэзӧ чужа́н отирлӧ висьтасям
Дӧсвидзисьлӧн югьялӧ́м да вын йылісь,
Сылӧн адззывлытӧм керӧ́ммез йылісь.
5 Еныс сетіс тшӧктӧ́ммез Яковлӧ,
сетіс Туйдӧ́т Израильлӧ.
Сія айезнымӧс тшӧктіс
велӧтны челядьсӧ Енлӧн Туйдӧ́тӧ.
6 Сэк одзланься оліссез,
челядьыс, кӧдна чужасӧ,
пондасӧ тӧдны Сылісь тшӧктӧ́ммесӧ,
а нія сэсся асланыс челядьлӧ висьтасясӧ,
7 медбы челядьыс Ен вылӧ надейтчисӧ,
Енлісь керӧ́ммесӧ эзӧ вунӧтӧ
да Сылӧн тшӧктӧ́ммез сьӧрті олісӧ.
8 Нія ась озӧ лоӧ айезныс кодьӧсь,
кӧдна асныралісӧ да зык
*б лэбтывлісӧ.
Нія тай Ен дынісь кежисӧ,
мӧдӧрӧ ылалісӧ.
9 Ефрем отирлӧн быдӧнныслӧн вӧлісӧ ньӧввез,
но тышкасьӧ́м коста нія пышшисӧ.
10 Енкӧт керӧм йитӧ́тсӧ
*в нія вунӧтісӧ,
Сылӧн Туйдӧ́т сьӧрті эзӧ олӧ.
11 Сылісь уджсӧ да адззывлытӧм керӧ́ммесӧ,
кӧднӧ нылӧ мыччаліс,
нія вунӧтісӧ.
12 Еныс нылӧн айез син одзын
адззы́влытӧммесӧ керліс Египет муын,
Цоан карлӧн ыббез вылын.
13 Саридзись васӧ Сія янсӧтіс,
ӧтмӧдӧрсянь стенаӧн сувтӧтіс,
сэті айезнымӧс вуджӧтіс.
14 Луннас нылӧ туйсӧ мыччаліс кымӧрӧн,
а ойнас ─ югдӧтіс биӧн.
15 Кушмуын из поткӧтіс,
кыдз пыдын ваись нійӧ юкталіс.
16 Сія изісь сетіс ва,
и ваыс ю моз пондіс котӧртны.
17 Но нія Еныс одзын одзза моз умӧльсӧ керисӧ,
Медвылісьсӧ кушмуас лӧгӧтлісӧ.
18 Нія юрӧ пыртісӧ Енлісь мыласӧ видзӧтны-тӧдмавны
*г.
Сылісь корисӧ сёя́н,
кӧда нылӧ вӧлі сьӧлӧмныс сьӧрті.
19 Нія Енсӧ умӧльтісӧ этадз шуӧ́мнаныс:
«Вермас разь Еныс кушмуас
сетны миянлӧ чӧскыт сёя́нсӧ?
20 Сія сӧтіс изас,
и пондіс петны ва
да котӧртісӧ шоррез.
Но вермас разь Сія сетны нянь,
вермас разь Аслас отирлӧ сетны яй?»
21 Дӧсвидзись этӧ кыліс да лӧгасис.
Яковлӧн отир коласын Сылӧн биыс ыпнитіс.
Израиль отир вылӧ Еныс ӧддьӧн лӧгасис,
22 мыля нія Сылӧ эзӧ веритӧ,
Сылӧн мездӧтӧ́м вылӧ эзӧ надейтчӧ.
23 Сэк Еныс енӧжсис ыбӧссӧ осьтіс,
вылісь кымӧрресӧ тшӧктіс
24 ны вылӧ зэр моз кисьтны манна,
енӧжсянь нылӧ нянь сетіс.
25 Отирыс сёйисӧ няньсӧ ангеллэзлісь,
Еныс сетіс нылӧ сёя́нсӧ пӧттӧдз.
26 Енӧжсянь Сія лэбтіс асывланись тӧв,
Аслас вынӧн вайӧтіс лунланись тӧв.
27 Отирлӧ яйсӧ Сія бус моз кисьтіс,
борда кайесӧ саридзись лы чиррез мымда вайӧтіс.
28 Кайесӧ нылӧн сувтчанінӧ уськӧтіс,
оланіннэз дынӧ вайӧтіс,
29 и нія пӧттӧдз сёйисӧ.
Еныс сетіс нылӧ сёя́нсӧ корӧ́мныс сьӧрті.
30 Но нылӧн эз на ешты чулавны номсӧтныс,
сёя́нныс вӧлі эшӧ ӧманыс,
31 кӧр Енлӧн лӧгыс ны вылӧ локтіс.
Ны коласісь медвынаэсӧ
да том зонкаэсӧ Сія вийис.
32 Но и эта бӧрсянь
нія одзза моз умӧльсӧ керисӧ,
Сылӧн адззывлытӧм керӧ́ммезӧ эзӧ веритӧ.
33 Эта понда нылӧн ола́н луннэс тӧвчик моз ӧшисӧ,
нылӧн ола́н воэз
*д видзчисьтӧг орисӧ.
34 Кӧр Еныс нійӧ вийліс,
сэк нія Сійӧ кошшисӧ,
Сы дынӧ бӧр бергӧтчывлісӧ.
Одз асывсянь нія Енсӧ корлісӧ
35 да тӧдвыланыс уськӧтлісӧ:
нылӧн дзебсисяніныс ─ Еныс,
нійӧ Мездісьыс ─ Медвылісь Еныс.
36 Но асланыс кыввезӧн нія Сы дынӧ леститчисӧ,
асланыс ӧмӧн Сійӧ бӧбӧтлісӧ.
37 Еныс одзын нылӧн сьӧлӧмныс эз вӧв сӧстӧм,
Енкӧт керӧм йитӧ́т сьӧрті нія эзӧ олӧ.
38 Но Еныс ны дынӧ вӧлі небыт сьӧлӧма.
Нылісь умӧль керӧ́ммезнысӧ Сія проститліс,
нійӧ эз вийлы.
Лӧгасьӧ́мсӧ унаись кусӧтліс,
Ассис лӧгсӧ ны вылӧ быдсӧн эз кисьтлы.
39 Сія тӧдіс: нія дзир вир-яйись отир.
Нія кыдз тӧв, кӧда мунӧ да бӧр оз берт.
40 Кынымись нія кушмуас Сылӧ паныт сувтлісӧ,
оланінтӧм муас Сійӧ лӧгӧтлісӧ!
41 Нія бӧра и бӧра
Енлісь мыласӧ видзӧтлісӧ-тӧдмавлісӧ,
Израильлісь вежа Енсӧ умӧльтісӧ.
42 Нія вунӧтісӧ Енлісь вына кисӧ да сійӧ лунсӧ,
кӧр Сія мездӧтіс нійӧ йӧз кипод увтын мырсьӧ́мись.
43 Нія вунӧтісӧ Египетын Сылісь мыччалӧм пассэсӧ,
Цоан карлӧн ыббез вылын адззывлытӧм керӧ́ммесӧ.
44 Египет отирлісь юэсӧ да ваэсӧ Сія пӧртіс вирӧ,
медбы нылӧ нем вӧлі юны.
45 Ны вылӧ ыстіс гуттэз-лӧдззез,
медбы нійӧ чушкисӧ.
Ыстіс лягушаэз,
медбы нылісь мусӧ тшыкӧтісӧ.
46 Му вылісь быдӧс быдмассэсӧ сетіс гаггезлӧ,
нылісь уджсӧ ─ саранчалӧ.
47 Нылісь виноградсӧ вартіс шерӧн,
инжир пуэсӧ ─ йыа зэрӧн.
48 Нылісь подасӧ шерӧн дойдіс,
пода чукӧрресӧ чарӧтіс.
49 Еныс ны вылӧ ӧддьӧн лӧгасис, лёксяліс.
Сія Ассис би моз ыпьяла́н лӧгсӧ, сьӧкыт шогсӧ,
ны вылӧ кисьтіс,
маитісь ангеллэзӧс ыстіс.
50 Сія Аслас лӧглӧ туйсӧ лӧсьӧтіс,
эз видз нійӧ кулӧ́мись.
Нылӧн пода вылӧ пӧрӧс ыстіс.
51 Сія ола́ннысӧ орӧтіс
Египетас медодзза чу́жӧм зоннэзлісь,
Хамлӧн оланіннэзісь медодзза чу́жӧммезлісь.
52 А Ассис отирсӧ баляэзӧс моз нуӧтіс,
баля чукӧр моз нійӧ кушмуӧт новйӧтіс.
53 Сія ны сьӧрын видзӧтіс,
нылӧ немись эз ков повны,
а ны вылӧ лэбтісьӧм йӧзсӧ саридз пӧдтіс.
54 Израиль отирсӧ Аслас вежа муӧ вайӧтіс,
керӧс вылӧ, кӧдӧ Сылӧн веськыт киыс шедтіс.
55 Ны одзын мӧдік отирресӧ вашӧтіс,
нылісь мусӧ Аслас отирлӧ янсӧтіс,
Израиль увтырсӧ ны оланіннэзӧ пыртіс.
56 Но Израиль отирыс Медвылісь Енлісь мыласӧ
бӧра видзӧтісӧ-тӧдмалісӧ,
Сылісь сьӧлӧмсӧ дзугыльтісӧ,
эзӧ олӧ Сылӧн тшӧктӧ́ммез сьӧрті.
57 Асланыс айез моз
нія Еныс дынісь бергӧтчывлісӧ,
Сійӧ кольлісӧ,
чукыля ньӧвьёсь моз мӧдӧрӧ ылавлісӧ.
58 Мыссэз вылын
ас керӧм еннэзлӧ сувтӧтӧм езъяланіннэзӧн
нія Сійӧ лӧгӧтлісӧ.
Ас керӧм еннэзлӧ копрасьӧ́мнаныс
Сы пытшкын вежӧктӧ́м ӧзтывлісӧ.
59 Этӧ адззӧ́мсянь Енлӧн лӧгыс ӧзйис,
Израиль отир вылӧ Сія ӧддьӧн лӧгасис.
60 Силом вылын скиния оланінісь Сія муніс.
Сэтӧн эд Сія отир коласын оліс.
61 Йитӧ́тӧн Коробьясӧ
*е Сія йӧз отирлӧ сетіс,
Ассис вынсӧ да югьялӧ́мсӧ мыччала́н Коробьясӧ
йӧз киӧ колис.
62 Аслас отир вылӧ Сія лӧгасис,
нійӧ шыпуртӧн вийны сетіс.
63 Нылісь том зоннэсӧ би сотіс,
нывкаэзлӧ жӧник сайӧ пета́н сьыланкы́ввез
эзӧ сьылӧ.
64 Вежауджаліссез шыпуртсянь усисӧ,
а дӧваэзныс эзӧ горзӧ.
65 Сэк Дӧсвидзисьыс жыв онісь саймис,
жыв кодззӧм вына морт лэбтісис.
66 Аслас отир вылӧ лэбтісьӧм йӧзсӧ
Сія бӧрсяняныс вачкис,
рожа куля́нас пыр кежӧ уськӧтіс.
67 Ӧсиплӧн увтыр дынісь Еныс бергӧтчис,
Ефремлісь увтырсӧ эз бӧрйы.
68 Сія бӧрйис Иудалісь увтырсӧ,
Сион керӧссӧ, кӧдӧ радейтіс.
69 Сэтчӧ Ассис вежаинсӧ сувтӧтіс,
сійӧ енӧжсӧ моз вылына лэбтіс,
мусӧ моз пыр кежӧ чорыта сувтӧтіс.
70 Бӧрйис Давидсӧ, Ассис рабсӧ,
босьтіс сійӧ баля йӧрись,
71 дзеля баляэз дынісь.
Сійӧ вайӧтіс видзӧтны Аслас отир сьӧрын,
новйӧтны Яковлісь увтырсӧ,
Израиль отирсӧ ─ Ассис бӧрйӧммесӧ.
72 Давидыс видзӧтіс ны сьӧрын сӧстӧм сьӧлӧмӧн,
новйӧтіс нійӧ кужӧмӧн.
Ошкӧ́м.
*а 77:2 юржугда́н ─ загадка
*б 77:8 зык ─ шум, мятеж
*в 77:10 йитӧ́т ─ завет
*г 77:18 видзӧтны-тӧдмавны ─ испытывать
*д 77:33 во ─ год
*е 77:61 Йитӧ́тӧн Коробья ─ Ковчег Завета
Глава 77
