Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
76 Псалом
1 Сьыліссезӧн веськӧтлісь Идифунлӧ. Асафлӧн псалом.2 Ме горӧн кеймися Еныслӧ,
горӧн кора Енсӧ,
и Сія кылас менӧ.
3 Сьӧкыт кадӧ ме кошша Дӧсвидзисьсӧ.
Ме киэзӧс лэбта Сыланьӧ, ойбыт ог лэдзлы.
Менам сьӧлӧмӧ немӧн оз бурась.
4 Кӧр тӧдвылам уськӧта Енсӧ,
сэк ме лӧньсьыны ог вермы.
Кӧр Сійӧ юрам пырта,
сэк сьӧлӧм вылам ӧддьӧн сьӧкыт.
5 Тэ он сет меным синнэз куньны,
менам лолӧ зэгсьӧ,
нельки баитны ог вермы.
6 Кӧркӧся олӧ́мсӧ тӧдвылам вайӧта,
одзза каддэсӧ касьтывла.
7 Ойнас сьыланкы́ввезӧс тӧдвылам уськӧта,
аскӧттям баита,
и лолӧ кошшӧ, мый висьтавны:
8 «Неужто Дӧсвидзисьыс миянӧс пыр кежӧ колис
и миян дынӧ оз ни ло небыт сьӧлӧма?
9 Неужто Сія пыр кежӧ дугдіс
миянлӧ небыт сьӧлӧмсянь отсасьны
и некӧр оз понды миянкӧт баитны?
10 Неужто Еныс вунӧтіс
миянӧс небыт сьӧлӧмсянь жалейтны?
Лӧгувьяс неужто сьӧлӧмсӧ пӧдналіс?»
11 Сэк ме шуи:
«То менам медыджыт шогыс:
Медвылісьыс оз ни нюжӧт кисӧ миянӧс дорйыны».
12 Ме понда касьтывлыны
Дӧсвидзисьлісь керӧ́ммесӧ,
понда тӧдвылам вайӧтны
Сылісь кӧркӧся адззывлытӧм керӧ́ммесӧ.
13 Тэнчит ыджыт керӧ́мметӧ
понда юрам бергӧтлыны.
Тэнчит быд керӧ́мтӧ
понда бура видзӧтны.
14 Енӧ, Тэнат туйыт вежа!
[Миян] Енся ыджытжык еныс эм разь?
15 Тэ адззы́влытӧммесӧ керись Ен!
Тэ мыччалін Ассит вынтӧ отиррез коласын.
16 Тэ Аслат вынӧн мездін отиртӧ,
Яковлісь да Ӧсиплісь челядьсӧ.
17 Енӧ, Тэнӧ ваэз адззылісӧ.
Нія Тэнӧ адззылісӧ да повзисӧ,
ва пыдӧссэз зэгалісӧ.
18 Кымӧррезісь ва киссис,
енӧжас чарлаліс-гымаліс,
чарньӧ́ввез, Тэнат биа ньӧвьёссез, лэбалісӧ.
19 Тэнат гымалӧ́мыт енӧж пасьта чарлаліс,
чарньӧ́ввет енӧжсӧ югдӧтісӧ,
муыс вӧрис да зэгаліс.
20 Тэнат туйыт саридзӧт муніс,
Тэ пыдын ваэзӧт оськалін,
кӧть оськӧвветӧ некин эз адззыв.
21 Ассит отиртӧ Тэ Моисей да Аарон киӧн
пода чукӧр моз нуӧтін.
Ошкӧ́м.
Глава 76
