Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
75 Псалом
1 Сьыліссезӧн веськӧтлісьлӧ. Орсӧны сиа орса́ннэз вылын. Асафлӧн сьыла́н псалом.2 Иудеяын Енсӧ тӧдӧны,
Израиляс Сылісь нимсӧ лэбтӧны.
3 Салимын оланін Сылӧн,
Сион вылын Сія олӧ.
4 Сэтчин Сія паздіс биа ньӧвьёссесӧ,
сайӧвтча́ннэсӧ, шыпурттэсӧ
да мӧд тышкася́ннэсӧ
*а.
5 Тэ югьялан,
Тэ вылынжык керӧссэзся,
кытӧн тыр вӧрпаыс.
6 Повтӧм воиннэз кыйся́нӧ шедісӧ,
некин и киӧн эз вермы вӧрзьӧтны.
Нія медбӧрья онӧн онмӧссисӧ.
7 Яковлӧн Ен, Тэнат горӧтӧ́мсянь
колесницаись отир да вӧввез ловтӧмӧсь усисӧ.
8 Тэись ӧддьӧн поламӧ.
Лӧгасьӧ́мыт коста
кин вермас сулавны Тэнат син одзын?
9 Енӧжсянь Тэ юӧртін Аслат суд йылісь.
Муыс повзис да лӧньсис,
10 кӧр Еныс сувтіс судитны,
медбы му вылын оліссез коласісь
быдӧс дзескӧтӧммесӧ мездыны.
11 Нельки отирлӧн лӧгныс Тэныт ошкӧ́мсӧ ваяс,
а кольччӧм лӧг отирсӧ Тэ раммӧтан.
12 Дӧсвидзись Еннытлӧ кӧсйисьӧ
да керӧ кӧсйисьӧ́мныт сьӧрті.
Маті гӧгӧрись отиррез,
вайӧ Сылӧ козиннэз, быдӧнныт!
Сія эд ӧддьӧн повзьӧтісь Ен.
13 Сія юраліссесӧ раммӧтӧ,
му вылісь ӧксуэз Сыись полӧны.
*а 75:4 тышкася́н ─ оружие
Глава 75
