Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
71 Псалом
Соломон йылісь. [Давидлӧн псалом.]1 Енӧ, велӧт ӧксусӧ Тэ моз веськыта судитны,
ӧксу зонлӧ сет Тэ моз веськыта керны.
2 Ӧксуыс Тэнчит отиртӧ ась веськыта судитӧ,
умӧля оліссезкӧт ась веськыта бӧрйисьӧ.
3 Керӧссэз ась вайӧны отирлӧ лӧньсӧ,
мыссэз ─ веськыта олӧ́мсӧ.
4 Отир коласісь умӧля оліссесӧ ӧксуыс ась дорйӧ,
кортӧн ветлӧтіссезлісь челядьсӧ ась мездӧ,
а дзескӧтлісьсӧ ась зэлӧтӧ.
5 Енӧ, Тэись отирыс пондасӧ повны пырся-пыр,
кытчӧдз эм шонді тӧліськӧт.
6 Ӧксуыс ась лоӧ
ытшкӧм видз вылӧ киссьӧм зэр кодь,
мусӧ киськала́н воттез кодь.
7 Сылӧн юрала́н луннэзӧ
веськыта олісьыс дзоридз
*а моз лэбтісяс,
и му вылас тӧлісь ӧштӧдз лоас лӧнь ола́н.
8 Сы кипод увтын муыс лоас саридзсянь саридзӧдз,
Евфрат ю дынсянь мупонӧдз.
9 Сы одзын кушмуын оліссез ась копыртчӧны,
сы вылӧ лэбтісьӧммез буссӧ ась нюлӧны.
10 Ваэз шӧрын муэзісь да Фарсисісь
ӧксуэз сылӧ вот
*б ась вештӧны,
Аравияись да Саваись ӧксуэз козиннэз ась вайӧны.
11 Сылӧ ӧксуэз быдӧнныс ась копыртчӧны,
отиррез быдӧнныс ась кысъялӧны
*в.
12 Сія мездас корисьӧс,
кӧда кеймисьӧ,
мездас умӧля олісьӧс,
кинлӧ отир озӧ отсасьӧ.
13 Сія лоас небыт сьӧлӧма
кортӧн ветлӧтісь да умӧля олісь дынӧ,
нылісь ола́ннысӧ видзас.
14 Сія мездас нійӧ дзескӧтлісь да ыждалісь дынісь.
Нылӧн ола́нныс сылӧ дона.
15 Ӧксулӧн ась лоӧ кузь ола́н.
Сылӧ ась вайӧны Аравияись зарни.
Сы понда ась пыр кеймӧны
да быд лун сійӧ бласлӧви́тӧны.
16 Му вылас и керӧссэз вылын
няньыс ась лоӧ тырмӧмви.
Шеппез пондасӧ окласьны Ливанын вӧр моз.
Каррезын отир ась содӧ му вылын турун моз.
17 Ӧксулісь нимсӧ ась пыр ошкӧны.
Кытчӧдз эм шонді,
сылісь нимсӧ ась озӧ вунӧтӧ.
[Му вылісь быдӧс] йӧзсӧ сы пыр бласлӧви́тасӧ,
отиррез сійӧ шудаӧн шуасӧ.
18 Ошкӧ Дӧсвидзись Енсӧ, Израильлісь Енсӧ!
Дзир Сія ӧтнас керӧ адззы́влытӧммесӧ!
19 Сылӧн югьяла́н нимлӧ ошкӧ́мыс
пырся-пыр ась горалӧ!
Сылӧн югьялӧ́мыс быдсӧн мусӧ ась тыртӧ!
Аминь и аминь.
20 Давидлӧн, Ессей зонлӧн, эта медбӧрья кеймӧ́м.
Ошкӧ́м.
*а 71:7 дзоридз ─ цветок
*б 71:10 вот ─ дань
*в 71:11 кысъявны ─ служить
Глава 71
