Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
72 Псалом
Асафлӧн псалом.1 Кытшӧм бур Еныс Израиль отир дынӧ,
сӧстӧм сьӧлӧмаэз дынӧ!
2 А ме ӧдва эг джӧмды,
ӧдва эзӧ нильдӧ коккезӧ.
3 Ме завидуйті асьнысӧ лэбтісь отирлӧ,
Ентӧг оліссезлісь бура олӧ́мнысӧ адззикӧ.
4 Нія кувтӧдз озӧ пессьӧ-мырсьӧ,
нія вынаӧсь, озӧ шогалӧ.
5 Отиркӧт нія озӧ уджалӧ садь быртӧдз,
нійӧ сьӧкыт ола́ныс оз пур, кыдз мӧдіккезӧс.
6 Сійӧн вышитчӧ́мныс нійӧ пристеж моз кытшӧвтӧм,
ыждалӧ́м-дзескӧтлӧ́мныс паськӧм моз вевттьӧм.
7 Госсялӧ́мсянь нылӧн син бугыллезныс петӧмась.
Юраныс ковтӧм пыртӧ́ммес гудыртӧны.
8 Нія быдӧнныс вылын сералӧны,
лӧгувьяныс вӧвлытӧмсӧ висьтавлӧны,
вышитчӧмӧн баитӧны.
9 Баитӧ́мнаныс енӧжлӧ паныт мунӧны,
кыввезныс му вылӧттяс паськалӧны.
10 Ны сьӧрӧ и Енлӧн отир вӧтчӧны,
нылісь баитӧ́мсӧ
кыдз тыра дозісь ва ньылалӧны.
11 Нія шуӧны:
«Кытісь Еныс вермас тӧдны?
Медвылісьыс тӧдӧ разь эта йылісь?»
12 Ентӧг оліссез пыр бура олӧны,
дона пажыть
*а аслыныс ӧктӧны.
13 [Ме шуи:]
«Эг я весь видз ассим сьӧлӧмӧс сӧстӧмӧн?
Эг я весь видз киэзӧс умӧль керӧ́мись?»
14 Быд лун менӧ дойдісӧ,
быд асыв ӧмалісӧ.
15 Ме кӧбы висьталі:
«Ны моз понда баитны»,
сэк Тэнат челядь одзын
ме вӧлі бы умӧльсӧ керисьӧн.
16 Ме юрам видзи,
кыдз сэтшӧмсӧ вежӧртны,
но меным вежӧртны вӧлі сьӧкыт,
17 кытчӧдз ме эг пыр Енлӧн вежаинӧ.
Сэтӧн ме вежӧрті,
мый видзчисьӧ Ентӧг оліссесӧ.
18 Тэ нійӧ нильыг туй вылӧ сувтӧтан,
нійӧ пыдӧстӧминӧ чапкан.
19 Видзчисьтӧг нійӧ паздасӧ, нія ӧшасӧ.
Ӧддьӧн повзьӧ́мсянь нія ола́ннысӧ ӧштасӧ.
20 Кыдз саймӧ́м бӧрын вӧттӧ вунӧтан,
сідз Тэ, Дӧсвидзисьӧ, сувтан
да нійӧ абутӧм туйӧ пуктан.
21 Кӧр менам сьӧлӧмӧ пессис,
и лолӧ зника
*б эз тӧд,
22 сэк ме нем эг тӧд и нем эг вежӧрт,
Тэ одзын ме вӧлі кыдз пода.
23 Но ме пыр Тэкӧт,
Тэ менӧ веськыт киӧттям видзан.
24 Велӧтӧ́ммезнат Тэ менӧ туйдӧтан,
а сэсся Аслат югьялӧ́мӧ нуӧтан.
25 Енӧжас менам Тэсся некин абу,
и му вылас меным колан дзир Тэ.
26 Менам сьӧлӧмӧ да вывты́рӧ вынтӧмся́лӧны,
но Еныс менӧ вынсьӧтӧ.
Сія ─ пыр кежӧ менам ола́н пайӧ.
27 Тэ дынісь мунӧммез кулӧны,
Тэ дынісь мӧдӧрӧ ылалӧммезлісь
Тэ ола́ннысӧ орӧтан.
28 А меным бур сибӧтчыны Еныс дынӧ.
Дӧсвидзись Ен вылӧ ме надейтча,
медбы [Сион ыбӧссэз дорын]
висьтасьны Сылӧн керӧ́ммез йылісь.
*а 72:12 пажыть ─ имущество
*б 72:21 зника ─ покой
Глава 72
