Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
70 Псалом
1 Дӧсвидзисьӧ, ме Тэ вылӧ надейтча,
и меным некӧр оз ковсьы гӧрдӧтны.
2 Веськыта керись Енӧ,
дорйы менӧ да мезды!
Бергӧт пельтӧ меланьӧ, мезды менӧ!
3 Тэ ло меным ён дзебсисянінӧн,
кытчӧ ме пыр бы верми дзебсисьны.
Тэ кӧсйисин менӧ мездыны,
Тэ эд менам чорыт из керӧсӧ да сайӧвтчанінӧ
*а.
4 Менам Енӧ, мезды менӧ Ентӧг оліссез дынісь,
лёк кериссез да дзескӧтліссез дынісь.
5 Дӧсвидзисьӧ, Тэ менам надеяыс.
Енӧ, ме томсянь Тэ вылӧ надейтча.
6 Шогмӧ́мсянь ни Тэ меным отсалан.
Мамӧ кынӧмись Тэ менӧ петкӧтін.
Ме дугдывтӧг Тэнӧ ошка.
7 Месянь унаӧс диво кутӧ,
а ме Тэ вылӧ ёна надейтча.
8 Менам ӧмӧ тыра ошкӧ́мнас,
[медбы сьылӧтны Тэнчит югьялӧ́мтӧ,]
медбы быд лун ошкыны басӧк югьялӧ́мтӧ.
9 Эн бергӧтчы ме дынісь пӧрисьувьям,
кӧр вынтӧмсяла, эн коль менӧ.
10 Ме вылӧ лэбтісьӧммес
баитӧны меным паныт сувтны.
Нія баитчӧны ас коласаныс,
вӧджжӧны
*б менчим лолӧс босьтны.
11 Нія шуӧны:
«Еныс колис сійӧ.
Вӧтчӧ да кутӧ сійӧ,
мездісьыс абу сылӧн!»
12 Енӧ, эн мун ме дынісь!
Менам Енӧ, тэрмась меным отсавны!
13 Меным паныт муніссес ась гӧрдӧтӧны да ӧшӧны.
Киннэз меным мӧдӧны керны умӧльсӧ,
нія ась рожа куля́нӧдз локтӧны,
медбы отирыс ны вылын сералісӧ.
14 А ме пыр понда Тэ вылӧ надейтчыны
да ӧддьӧнжык Тэнӧ ошкыны.
15 Менам ӧмӧ пондас юӧртны
Тэнат веськыта керӧ́ммет йылісь.
Быд лун понда висьтасьны
Тэнат мездӧтӧ́м йылісь.
Тэнчит бур керӧ́мметӧ
ме и лыддьыны ог вермы.
16 Дӧсвидзись Енӧ,
понда баитны Тэнат ыджыт керӧ́ммез йылісь,
касьтыла Тэнчит веськыта керӧ́мметӧ,
дзир Тэнчит.
17 Енӧ, Тэ менӧ томсянь велӧтін-мывкыдсьӧтін.
Ме ӧнӧдз висьтася
Тэнат адззывлытӧм керӧ́ммез
*в йылісь.
18 Енӧ, ме пӧрисьма да дзорма,
и сэк эн коль менӧ,
медбы ме верми висьтавны
му вылас оліссезлӧ
да одзланься каддэзӧ чу́жӧммезлӧ
Тэнат ыджыт вын йылісь.
19 Енӧ, Тэнат веськыта керӧ́ммет енӧжӧдз,
Тэнат керӧ́ммет ыджытӧсь.
Енӧ, эм разь кинкӧ Тэ кодьыс?
20 Тэ ыстывлін меным уна сьӧкыт шог,
но сэсся бӧра вынсьӧтлін менӧ одзлань овны,
му пыдӧссис бӧра лэбтывлін.
21 Тэ менӧ вылына лэбтывлін да бурӧтлін,
му пыдӧссис менӧ кыскывлін.
22 Менам Енӧ, ме понда ошкыны Тэнӧ,
Тэнчит быльтӧ сиа орса́н вылын орсӧмӧн ошка.
Израильлӧн вежа Ен,
гусли вылын орсӧмӧн понда сьылӧтны Тэнӧ.
23 Кӧр ме сьыла Тэныт,
менам ӧмӧ гажӧтчӧ.
Менам лолӧ тырӧ гажнас,
Тэ эд менӧ мездін.
24 Менам кылӧ быд лун пондас висьтасьны
Тэнчит веськыта керӧ́мтӧ.
Киннэз эд мӧдісӧ меным керны умӧльсӧ,
нія рожа куля́нӧдз усисӧ,
и отирыс ны вылын сералӧны.
*а 70:3 сайӧвтчанін ─ крепость, прибежище
*б 70:10 вӧджжыны ─ подкараулить, заниматься слежкой
*в 70:17 адззывлытӧм керӧ́м ─ чудо
Глава 70
