Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
63 Псалом
1 Сьыліссезӧн веськӧтлісьлӧ. Давидлӧн псалом.2 Енӧ, кыв менчим кеймӧ́мӧс.
Видз менчим ола́нӧс,
кӧр ме вылӧ лэбтісьӧммез повзьӧтлӧны.
3 Сайӧвт менӧ ны шогья,
кӧдна гусьӧн умӧльсӧ керӧны.
Лёк кериссезлӧн зык
*а лэбтӧ́мись
менӧ сайӧвт.
4 Нылӧн кыввезныс шыпурт
*б кодь лэчытӧсь.
Дойда́н кыввезныс нылӧн ─
зэлӧтӧм ньӧлын яда ньӧвьёссез кодьӧсь.
5 Нія гусьӧн лыйӧны мортлӧ,
кӧда эз кер умӧльсӧ,
лыйӧны видзчисьтӧг, озӧ полӧ.
6 Умӧльсӧ керны нія ӧтамӧднысӧ ызйӧтӧны,
кыйся́н гусьӧн пуктыны баитчӧны.
«Кин сійӧ казялас?» ─ нія шуӧны.
7 Мортын нія пыр кошшӧны умӧльсӧ,
дугдывтӧг вынсьӧтчӧны тӧдмавны,
мый мортлӧн сьӧлӧм пытшкас да юрас.
8 Но Еныс нійӧ ньӧвьёсьӧн лыяс,
видзчисьтӧг нійӧ дойдас.
9 Асланыс кылӧн нія асьнысӧ уськӧтасӧ.
Ныкӧт лоӧ́мсӧ адззыліссез ны дынісь бергӧтчасӧ.
10 Быдӧс отирыс повзясӧ,
Енлӧн керӧ́м йылісь висьтасьны пондасӧ.
Нія вежӧртасӧ: этӧ керис Еныс.
11 А веськыта олісь пондас гажӧтчыны:
сылӧн эд эм Дӧсвидзись.
Сы вылӧ сія пондас надейтчыны.
Сӧстӧм сьӧлӧмаэз Сійӧ пондасӧ ошкыны.
Ошкӧ́м.
*а 63:3 зык ─ шум, мятеж
*б 63:4 шыпурт ─ меч
Глава 63
