Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
64 Псалом
1 Сьыліссезӧн веськӧтлісьлӧ. Давидлӧн сьыла́н псалом.2 Енӧ, Сион вылын Тэнӧ ошкӧ́мыс горалӧ!
[Ерусалимын] отир керасӧ сійӧ,
мый Тэныт кыв сетӧмӧн кӧсйисисӧ.
3 Тэ дынӧ быд морт локтас,
Тэ эд кылан кеймӧ́мсӧ.
4 Лёк керӧ́ммезным миянӧс личкӧны,
но Тэ миянлісь умӧль керӧ́ммесӧ проститан.
5 Шуда мортыс, кӧдӧ Тэ бӧрйин
да дынат сибӧтін,
медбы сія оліс Тэнат вежаинын.
Тэнат Вежа керкуын мийӧ бурнас пӧтамӧ,
Тэнат вежаинын бласлӧвитӧ́мнас тырамӧ.
6 Енным, миян Мездісьным, кыв миянӧс!
Тэнат веськыта керӧ́ммет повзьӧтӧны.
Мулӧн быд пельӧсісь отир
да саридз дорись ылыніннэзын оліссез
Тэ вылӧ надейтчӧны.
7 Аслат вынӧн Тэ сувтӧтін керӧссэз,
юрала́н выныт Тэнӧ кытшӧвтӧ.
8 Тэ лӧньсьӧтан саридззезлісь гора шысӧ,
ыджыт ваныррезлісь койсьӧ́м-бузгӧ́мсӧ,
зык лэбтӧ́м коста отиррез раммӧтан.
9 Тэнат мыччалӧм пассэзісь мупонын оліссез повзясӧ.
Асывланись и рытланись отир Тэнӧ ошкыны пондасӧ.
10 Тэ тӧждісян муыс понда,
юкталан сійӧ ваӧн,
Тэ сетан сылӧ быдтыны уна воӧ́м
*а.
Енлӧн юэз тырӧмась ваӧн.
Отирлӧ Тэ быдтан нянь.
Тэ эд Ачыт сідз лӧсьӧтін мусӧ.
11 Бороздаэсӧ тыртан ваӧн,
му комоккесӧ пазӧтан.
Зэр воттезнас мусӧ небзьӧтан,
сылісь быдмассэсӧ бласлӧви́тан.
12 Восӧ
*б Тэ Аслат бурсетӧ́ммезӧн
кыдз юркытшӧн
*в баситан.
Быдкодь быдмассэзӧн да уна воӧ́мӧн
Тэнат муна́н туйет тыраӧсь.
13 Кушмуэсӧ
*г турун вевттьӧ,
мыссэсӧ гажыс кытшӧвтӧ.
14 Видззез подаӧн тырӧны,
ыббез вылын сюэз шепьясьӧны.
Быдӧс гажӧн горӧтӧ-сьылӧ.
*а 64:10 воӧ́м ─ плод
*б 64:12 во ─ год
*в 64:12 юркытш ─ венок, венец, корона
*г 64:13 кушму ─ пустыня
Глава 64
