Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
49 Псалом
Асафлӧн псалом.1 Дӧсвидзисьыс ─ медвына Ен.
Сія баитӧ,
корӧ му вывсис быдӧс отирсӧ,
асывланьсянь рытланьӧдз оліссесӧ.
2 Еныс Аслас югьялӧ́мӧн мыччисяс Сионсянь,
медбасӧк керӧс вывсянь.
3 Миян Енным локтас гора шыӧн:
Сы одзын ─ быдӧс сота́н би,
Сы гӧгӧр ─ вына ыджыт тӧвныр.
4 Еныс корӧ енӧжсӧ да мусӧ видзӧтны,
кыдз Сія пондас судитны Ассис отирсӧ:
5 «Ӧктӧ Ме дынӧ надейнӧй отирӧс,
кӧдна Мекӧт керисӧ йитӧ́тсӧ
*а езъяла́н козин вайӧмӧн».
6 Енӧжжез юӧртасӧ
Сылӧн веськыта керӧ́м йылісь,
Судитісьыс эд Ачыс Еныс.
7 «Менам отир, кывзӧ,
Ме понда баитны.
Израиль,
Ме тэнчит умӧль керӧ́мметӧ понда висьтавлыны.
Ме ─ Ен, тэнат Ен.
8 Езъяла́н козиннэт понда
ог понды тэнӧ ӧмавны,
сотӧм езъяла́н козиннэт
пыр эд Менам син одзын.
9 Меным оз ков гортсит порозыт,
озӧ колӧ йӧрсит кӧзаэт.
10 Вӧрись вӧрпаэс эд быдӧс Менам,
Менам подаӧ сюрс
*б керӧс вылын.
11 Керӧссэз вылісь быдӧс кайесӧ Ме тӧда,
ыббез вылас подаыс Менам син одзын.
12 Понді бы Ме тшыгьявны
и сэк бы эг висьтав тэныт.
Ола́н муыс и мый эм сэтчин,
сія эд быдӧс Менам.
13 Ме разь сёя пороз яйсӧ,
юа разь кӧза вирсӧ?
14 Езъяла́н козин туйӧ вай Еныслӧ ошка́н кывтӧ,
Медвылісьлӧ мый кӧсйисин, сійӧ кер.
15 Кор Менӧ сьӧкыт кадӧ,
сэк Ме мезда тэнӧ,
и Тэ ошкан Менӧ».
16 Умӧльсӧ кериссезлӧ Еныс шуӧ:
«Мый тэ висьтасян Менам туйдӧтӧ́ммез йылісь
да баитан Менам йитӧ́т йылісь?
17 Ачыт тай Менчим велӧтӧ́мӧс кывзыны он вермы,
Менчим кыввезӧс мышкат чапкан.
18 Адззан кӧ гусясисьӧс,
сыкӧт ӧтдор керан.
Тэ вовлісян морткӧт,
кӧда гозйӧн овтӧн кыскасьӧ.
19 Тэ ӧмтӧ осьтан умӧля видны,
кылыт висьтавлӧ вӧвлытӧмсӧ.
20 Пукалан да висьтавлан умӧльсӧ аслат вон вылӧ,
вӧвлытӧмсӧ баитан мамыт зон йылісь.
21 Тэ сідз керин, но Ме шы эг сет.
Тэ чайтін, Ме тэ кодь жӧ.
Ме висьтала умӧль керӧ́ммет йылісь,
нійӧ син одзат петкӧта.
22 Енсӧ вунӧтіссез, этӧ вежӧртӧ,
а то Ме тіянӧс лета,
сэк некин тіянӧс оз мезды.
23 Кин езъяла́н козин туйӧ
Меным вайӧ ошка́н кыввез,
сія Менӧ бурӧ пуктӧ.
Кин видзӧтӧ аслас ола́н туй сьӧрын,
сылӧ Ме осьта Ассим мездӧтӧ́мӧс».
*а 49:5 йитӧ́т ─ завет
*б 49:10 сюрс ─ тысяча
Глава 49
