Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
48 Псалом
1 Сьыліссезӧн веськӧтлісьлӧ. Корей зоннэзлӧн псалом.2 Кывзӧ этӧ, быд кыв вылын баитіссез,
му вылас быдӧс оліссез:
3 учӧтӧ пуктӧммез да вылына лэбтӧммез,
бура оліссез да умӧля оліссез.
4 Менам ӧмись петасӧ мывкыда кыввез,
сьӧлӧмсим петӧмыс вежӧртӧтас.
5 Ассим пельӧс лӧсьӧта кывзыны велӧта́н висьталӧ́мсӧ
*а,
гусли вылын орсікӧ осьта юржугда́нӧс
*б.
6 Мый меным повны сьӧкыт кадӧ,
кӧр лёк бӧбӧтчиссез кытшӧвтасӧ менӧ?
7 Нія асланыс вын вылӧ надейтчӧны,
асланыс уна пажытьӧн
*в ошшасьӧны.
8 Мортыс оз вермы небны
аслас вонлӧ пырся ола́нсӧ.
Немӧн оз вермы вештісьны Еныслӧ
сылӧн ола́н понда.
9 Мортлӧн ола́ныс ӧддьӧн дона.
Оз эд овлы сідз,
10 медбы морт пыр оліс
да эз вӧв дзебӧм шойнаӧ.
11 Быдыс адззӧ:
кулӧны и мывкыдаэз,
кыдз и мывкыдтӧммез да вежӧрттӧммез,
и ассиныс пажытьсӧ кольӧны мӧдіклӧ.
12 Отир чайтӧны,
нылӧн керкуэс пыр пӧ пондасӧ сулавны,
оланіннэзныс челядьлӧ пондасӧ вуджны.
Нія муэсӧ шуӧны асланыс ниммезӧн.
13 Но нельки ошкӧм-лэбтӧм морт оз понды пыр овны,
сія пода моз кулӧ.
14 Вежӧрттӧммезлӧн ола́ныс ─ мывкыд ӧштӧ́м,
кӧть ны бӧрын муніссез
дорйӧны нылісь висьталӧ́мсӧ.
15 Вежӧрттӧммесӧ баляэзӧс моз
йӧртасӧ кулӧммез коласӧ,
ны сьӧрын видзӧтны пондас кулӧ́мыс
*г.
А асывнас веськыта оліссез
пондасӧ юравны ны вылын.
Нія вынтӧмсяласӧ,
нылӧн оланіныс лоас шойна.
16 А менчим лолӧс кулӧммез коласісь Еныс мездас,
кӧр менӧ босьтас дынас.
17 Тэнӧ завидыт ась оз кут,
кинкӧ богатсялӧ кӧ,
и сылӧн керкуас пажытьыс содӧ.
18 Кулӧ́м бӧрас эд сія нем оз босьт сьӧрас,
му вывся ошкӧ́м-лэбтӧ́мыс оз мун сьӧрас.
19 Кӧть овтӧнняс сія и бурмӧтӧ ассис сьӧлӧмсӧ,
и отирыс ошкӧны сійӧ бура олӧ́м понда,
20 но кулӧ́м бӧрас сія мунас аслас айез дынӧ,
кӧдна некӧр ни озӧ адззылӧ югытсӧ.
21 Мортсӧ ошкӧны-лэбтӧны кӧ,
но ачыс сія олӧ мывкыдтӧм морт моз,
сэк сія вачкисьӧ пода вылӧ, кӧда кулӧ.
Ошкӧ́м.
*а 48:5 48:5 велӧта́н висьталӧ́м ─ пословица
*б 48:5 48:5 юржугда́н ─ загадка
*в 48:7 48:7 пажыть ─ имущество
*г 48:15 48:15 кулӧ́м ─ смерть
Глава 48
