Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
47 Псалом
1 Сьыланкы́в. Корей зоннэзлӧн псалом.2 Дӧсвидзисьыс вына!
Быдӧнныт ошкӧ Сійӧ миян Енлӧн карын,
Сылӧн вежа керӧс вылын!
3 Сион керӧсыс вылын да басӧк,
быдсӧн мусӧ гажӧтӧ.
Сія кыдз Цафон
*а керӧс,
сія вына Ӧксулӧн кар.
4 Сія карын оліссез тӧдӧны:
Еныс нійӧ дорйӧ.
5 Ӧксисӧ ӧтлаӧ ӧксуэз,
медбы босьтны карсӧ.
6 Но кӧр сійӧ казялісӧ,
нійӧ диво кутіс,
нія повзисӧ да бӧр пышшисӧ.
7 Повзьӧ́м увьяныс нійӧ зэгйыны пондіс,
кыдз зэгйӧ инькаӧс кага вайикӧ.
8 Тэ паздін нійӧ,
кыдз асывланись тӧлыс
жугдӧ Фарсисісь корабллез.
9 Мый мийӧ кывлім, сійӧ и адззылім
Дӧсвидзись Саваофлӧн
*б карись,
Миян Енлӧн карись.
Еныс сійӧ пыр кежӧ ёна вынсьӧтіс.
10 Енӧ, Вежа Керкуат мийӧ авйӧмӧн баитім
Тэнат небыт сьӧлӧмсянь керӧ́ммез йылісь.
11 Енӧ, Тэнат нимыт
да Тэнӧ ошкӧ́мыс горалӧны му доррезӧдз.
Тэнат веськыт киыт тыра веськыта керӧ́мнас.
12 [Дӧсвидзисьӧ,]
Тэнчит веськыта судитӧ́мметӧ адззӧ́мсянь
ась гажӧтчӧ Сион керӧс,
ась гажӧтчӧны Иудея каррезын оліссез.
13 Мунӧ, кытшӧвтӧ Сион керӧссӧ,
лыддьӧ сылісь башняэсӧ.
14 Бура видзӧтӧ карыслісь ён из йӧрресӧ
*в,
торйӧн быд керкусӧ,
медбы вермит висьтасьны
локта́н кадӧ чу́жӧммезлӧ:
15 «Еныс ─ пырся-пыр кежӧ миян Ен.
Сія лоас миян Веськӧтлісьӧн медбӧрӧдз».
*а 47:3 Цафон ─ Xанаан отирлӧ сія вӧлі вежа керӧсӧн.
*б 47:9 Саваоф ─ Енлӧн ниммезісь ӧтікыс, сія лоӧ «тышкася́н выннэз вылын Юралісь»
*в 47:14 из йӧр ─ каменная стена
Глава 47
