Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
44 Псалом
1 Сьыліссезӧн веськӧтлісьлӧ. Орсӧны «шошан» орса́н вылын. Корей зоннэзлӧн велӧтӧ́м. Радейтӧ́м йылісь сьыланкы́в.2 Сьыланкы́лӧ Ӧксу йылісь.
Менам сьӧлӧмись бур кыввез киссьӧны,
менам кылӧ кыдз бура гижисьлӧн бордты́в
*а.
3 Тэ мичажык быдӧс отирся.
Тэнат ӧмись киссьӧ бурсетӧ́мыс,
сійӧн Тэнӧ Еныс пыр кежӧ бласлӧви́тіс.
4 Вынаӧ, косат домав Ассит шыпурттӧ,
кышав Ас вылат югьялӧ́мтӧ
да ӧксулісь юрала́н вынтӧ.
5 Сідз пасьтасьӧмӧн тэрмась пуксьыны колесницаӧ
да пет дорйыны быльсӧ, рама видзсьӧ́мсӧ
да веськыта керӧ́мсӧ.
Тэнат веськыт киӧн керӧ́ммезсянь
отирсӧ диво кутас.
6 Вынаӧ, Тэнат ньӧвьёссет лэчытӧсь.
Нія сидзӧны Ӧксу вылӧ лэбтісиссез сьӧлӧмӧ.
Отиррез Тэ одзӧ усясӧ.
7 Енӧ, Тэнат юрала́н пукӧ́сыт пыр кежӧ,
Тэнат веськӧтла́н бедьыт ─ веськыта керӧ́м.
8 Тэ радейтан веськыта керӧ́мсӧ,
синнат он вермы видзӧтны умӧль керӧ́м вылӧ.
Сійӧн Тэнат Еныт
гаж виӧн мавтіс Тэнӧ, Енӧ,
мӧдіккезся буржыка.
9 Тэнат быдӧс паськӧмись
смирна, алой да кассия дук кылӧ.
Слон лыӧн баситӧм ыджыт керкуын тэнӧ гажӧтӧны.
10 Тэ гӧгӧрын бурӧ пуктӧм отиркӧт
сулалӧны ӧксуэзлӧн ныввез.
Веськыт ладорат сулалӧ иньӧксу
*б.
Офирись зарниӧн
*в сія баситӧм.
11 Нылӧй, кывзы да видзӧт, бура кывзы:
вунӧт ассит отиртӧ да айытлісь керкусӧ.
12 Ӧксусӧ ась кыскӧ тэ дынӧ быдӧс бытшӧмыт.
Сія эд тэнат кӧзяиныт, сылӧ копыртчы.
13 Тир карись йӧз тэ дынӧ козиннэзӧн локтасӧ,
отир коласісь бура оліссез
пондасӧ кошшыны, кыдз тэкӧт пантасьны,
медбы тэ вӧлін ны дынӧ небыт сьӧлӧма.
14 Аслас жырын пукалӧ ӧксулӧн невеста,
ӧддьӧн басӧк ныв.
Сылӧн паськӧмыс серӧтӧм зарниӧн.
15 Басӧк паськӧмӧ пасьтӧтӧмӧн
сійӧ нуӧтӧны ӧксу дынӧ.
Сы бӧрын нуӧтӧны нывкаэсӧ,
сылісь модзанкаэсӧ.
16 Нійӧ нуӧтӧны ёна гажӧтчӧмӧн,
гажӧн нія пырӧны ӧксу оланінӧ.
17 Ӧксуӧ, айезыт туйӧ сувтасӧ Тэнат зоннэт,
быдсӧн му вылас Тэ пуктан нійӧ юраліссезӧн.
18 Тэнчит нимтӧ айезсянь челядьӧдз
пыр пондасӧ видзны тӧдвылын.
Отиррез пондасӧ ошкыны Тэнӧ пырся-пыр.
*а 44:2 бордты́в ─ перо
*б 44:10 иньӧксу ─ царица
*в 44:10 зарни ─ золото
Глава 44
