Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
40 Псалом
1 Сьыліссезӧн веськӧтлісьлӧ. Давидлӧн псалом.2 Шуда сія мортыс,
кӧда тӧждісьӧ умӧля олісь [да корись] понда.
Сьӧкыт кадӧ Дӧсвидзисьыс сылӧ отсалас.
3 Дӧсвидзисьыс дорьяс сійӧ,
оз сет орӧтны сылісь ола́нсӧ.
Му вылас овтӧн сія лоас шуда,
и Дӧсвидзисьыс оз сет сійӧ лёк кериссез киӧ.
4 Шогалікӧ ольпасьын куйлӧ́м коста
Дӧсвидзисьыс сійӧ вынсьӧтас
да ольпасись лэбтас.
5 Ме висьталі:
«Дӧсвидзисьӧ!
Ло ме дынӧ небыт сьӧлӧма,
веськӧт менӧ,
Тэ одзын эд ме кери умӧльсӧ».
6 Ме вылӧ лэбтісьӧммес ме йылісь лӧгӧн баитӧны:
«Кӧр ни сія кулас
да нимсӧ сылісь вунӧтасӧ?»
7 Менӧ адззывны вовліссез баитӧны бӧбӧтчӧмӧн.
Нія юраныс ме йылісь умӧльсӧ пыртӧны,
петасӧ да быдӧнныслӧ сійӧ висьтасьӧны.
8 Быдӧнныс, кинлӧ ме син вылӧ ог ков,
ас коласаныс шушкӧтчӧны,
баитчӧны меным керны умӧльсӧ.
9 Нія шуӧны:
«Кула́н шогӧтыс сійӧ водтӧтіс.
Сія оз ни чеччы».
10 Нельки мекӧт лӧсялісь морт,
кӧда вылӧ ме надейтчи,
кӧда сёйис менчим няньӧс,
ме вылӧ лэбтісис.
11 Но Тэ, Дӧсвидзисьӧ,
ло ме дынӧ небыт сьӧлӧма
да лэбты менӧ,
и ме нылӧ вештіся.
12 Ме вылӧ лэбтісьӧммес
озӧ кӧ менӧ вермӧ,
сэк ме понда тӧдны:
ме Тэныт сьӧлӧмви.
13 Сӧстӧма олӧ́мӧ понда Тэ менӧ видзан.
Одзат пыр кежӧ сувтӧтан.
14 Дӧсвидзисьлӧ, Израильлӧн Енлӧ,
ошкӧ́мыс пырся-пыр!
Аминь, аминь!
Глава 40
