Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
41 Псалом
1 Сьыліссезӧн веськӧтлісьлӧ. Корей зоннэзлӧн велӧтӧ́м.2 Кыдз горш косьмикӧ кӧр
*а кошшӧ визыв ва,
сідз менам ловлӧ колан Тэ, Енӧ.
3 Вына да ловья Ен дынӧ менӧ лолӧ кыскӧ.
Кӧр ни ме верма локны да сувтны Еныс одзӧ?
4 Лун и ой синваӧ вӧлі меным сёя́н туйӧ,
кӧр меным быд лун шувлісӧ:
«Кытӧн нӧ Тэнат Еныт?»
5 Дойма́н сьӧлӧмӧн
ме касьтыла кӧркӧся кадсӧ,
кӧр уна гажӧтчись отиркӧт
мийӧ пыравлім Енлӧн керкуӧ,
горӧн ошким-сьылӧтім Енсӧ.
6 Лолӧ, мый тэ гажтӧмся́лін, мый тӧждісян?
Надейтчы Ен вылӧ.
Ме эшӧ понда ошкыны Сійӧ,
ассим Енӧс да Мездісьӧс.
7 Менам лолӧ гажтӧмся́ліс,
сійӧн ме касьтывла Тэнӧ Иордан му вылын,
Ермон да Цоар керӧссэзын.
8 Тэнат вауся́ннэзлӧн
*б шыыс горалӧ,
сідз пыдӧстӧмин пыдӧстӧминкӧт баитӧ.
Тэнат быдӧс ваныррет
*в ме весьтӧт мунісӧ.
9 Луннас Дӧсвидзисьыс мекӧт небыт сьӧлӧма,
а ойнас ме Сійӧ сьылӧта,
кейма Енлӧ, меным ола́н Сетісьлӧ.
10 Менӧ дорйись Енлӧ висьтала:
«Мыля Тэ менӧ вунӧтін?
Мыля ме тӧждісьӧмӧн ветлӧта
ме вылӧ лэбтісьӧммезлӧн дзескӧтӧ́мсянь
*г?»
11 Жыв менчим лыэзӧс чеглалӧны,
кӧр ме вылӧ лэбтісьӧммес изгаляйтчӧны
*д,
быд лун юасьлӧны:
«Кытӧн нӧ Тэнат Еныт?»
12 Лолӧ, мый тэ гажтӧмся́лін, мый тӧждісян?
Надейтчы Ен вылӧ.
Ме эшӧ понда ошкыны Сійӧ,
ассим Енӧс да Мездісьӧс.
*а 41:2 кӧр ─ олень
*б 41:8 вауся́н ─ водопад
*в 41:8 ваныр ─ волна
*г 41:10 дзескӧтӧ́м ─ притеснение
*д 41:11 изгаляйтчыны ─ насмехаться
Глава 41
