Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
39 Псалом
1 Сьыліссезӧн веськӧтлісьлӧ. Давидлӧн псалом.2 Ме ёна надейтчи Дӧсвидзись вылӧ,
и Сія пельсӧ меланьӧ бергӧтіс
да менчим горӧн ойзӧ́мӧс кыліс.
3 Сія менӧ полӧта́н ямаись лэбтіс,
зыбуна нюрись кыскис,
менӧ из вылӧ сувтӧтіс
да коккезӧс вынсьӧтіс.
4 Менам ӧмӧ Сія пуктіс виль сьыланкы́в ─
миянлісь Енсӧ сьылӧтӧ́м.
Этӧ казяласӧ уна отир.
Дӧсвидзисись Нія повзясӧ
да пондасӧ надейтчыны Сы вылӧ.
5 Шуда сія мортыс,
кӧда надейтчӧ Дӧсвидзись вылӧ,
а оз мун асьнысӧ лэбтіссез да бӧбӧтчиссез дынӧ.
6 Дӧсвидзисьӧ, менам Енӧ,
Тэ миян понда пыр тӧждісян.
Тэ сэтшӧм уна керин адззы́влытӧммесӧ!
Кин эм Тэ кодьыс?
Ме понда висьтасьны керӧ́ммет йылісь,
но нія сымда,
быдӧс и висьтасьны он вермы.
7 Езъяла́ннэз да козиннэз Тэныт озӧ колӧ.
Сотӧм пода да умӧль керӧ́м понда езъяла́ннэз Тэ он кор.
Менчим пеллезӧс Тэ осьтін кывны.
8 Сэк ме висьталі:
«Видзӧт, ме локті.
Сераку́ас
*а гижӧм ме йылісь:
9 Менам Енӧ, ме мӧда керны Тэ сьӧрті,
Тэнат Туйдӧ́тыт менам сьӧлӧмын».
10 Тэнат ӧксьӧм отир одзын
ме висьтаси Тэнчит веськыта керӧ́мтӧ,
ӧмӧс эг пӧднавлы.
Тэ эд Ачыт сійӧ тӧдан, Дӧсвидзисьӧ.
11 Тэнчит веськыта керӧ́мтӧ сьӧлӧмам ме эг дзеблы.
Ме висьтаси, кытшӧм Тэ надейнӧй Мездісь.
Тэнат ӧксьӧм отир одзын ме висьтасьлі
Тэнат быльыт да небыт сьӧлӧмыт йылісь.
12 Дӧсвидзисьӧ,
ме шогья эн сайӧвт Ассит бурсетӧ́мтӧ.
Тэнат быльыт да небыт сьӧлӧмыт
менӧ ась пыр видзӧны.
13 Быдкодь шогыс-умӧльыс кытшӧвтіс менӧ,
менам умӧль керӧ́ммезӧ вӧтісӧ менӧ,
ны кузя синнэзӧ пемдісӧ.
Нія сэтшӧм уна,
юр вылам юрси тылӧппезӧ нысся етшажык.
Сьӧлӧмӧ дзугыльтчис.
14 Дӧсвидзисьӧ, кер меным бурсӧ, мезды менӧ!
Дӧсвидзисьӧ, тэрмась меным отсавны!
15 Кӧдна босьтӧны бы менчим лолӧс,
нія ась гӧрдӧтӧны да рожа куля́нӧдз усьӧны.
Кӧдна керӧны бы меным умӧльсӧ,
нія ась бӧр бертӧны,
и отирыс ась пондӧны ны вылын серавны.
16 Ась ӧшӧны асланыс рожа куля́нсянь нія,
кӧдна меным сералӧмӧн шуӧны:
«Сідз тэныт и колӧ!»
17 А Тэнӧ кошшиссезлӧ
Тэ сет гажмыны да гажӧтчыны.
Тэсянь локтӧм мезмӧ́мсӧ радейтіссез
ась пыр висьтавлӧны:
«Дӧсвидзисьыс вына!»
18 Ме умӧля олісь, корись морт,
но Дӧсвидзисьыс ме понда тӧждісьӧ.
Тэ меным Отсалісь да менӧ Мездісь!
Менам Енӧ, эн сёрмы!
Ошкӧ́м.
*а 39:8 сераку́ ─ свиток
Глава 39
